PONGWANG LAIPEX 41

Jusep-e Wanghompa Wünmang Taile kox

1Zanglao anyi füima Ijip nok wanghompa-e, chix a Nail shuanu kax ma ajongle tüikya hexta le wünmang tuita ngün. 2Ipongma tomnut le nünfuikya maihu hunu anüt tikha tokya lai ilaxle fumtsüt ang süt. 3Ifüima mama maihu hunu anüt, tsyatsyenle zazatuakyabu tamlai. Hwom hüi üntoxle pongwang ma laile ngonuikya hozuibu hama ajong. 4Zazatuale tüikya maihunubue haxnut-zangfex le tüikya maihunubu saxle awüt. Ile ngünkya füima wanghompa zo. 5Chix mikngüt hüile tamchatle jip, ima chuwüi wünmang mama tamngün. Tsaxtong tuita ma tsaxto owan müiwüi müile to-anüt dongkya haxmüi-zangmale münle ngün. 6Ifüima mama shushuta le tsaxto anüt dong üntoxle ija a sak-hax winjepe huisho le zokle ashunle tüikya. 7Ifüima shushuta le tüikya tsaxtobue owan müiwüi müile tüikya tsaxtobu jok. Ifüima wanghompa zokoxle ija a wünmang ang achangle bang. 8#Dan 2.2.Ngainop ningle chix ang tüle mongzangwün, ikhoma Ijip chaxwan ma atüitüi jenu-shipa hia tsingpa-wanpabu komkaile sele asox. Chixe hwom hama chix wünmang wünle kox ikoxle owaechu ija kaxming apuale fa-ang chitho.

9Ija ma chix wangshempa, ju-mopa ang ngokya mixe wanghompa ang thüi: “Ku thaikyabu kue anyix texle atakle. 10Hanpak tuita ma, nang wangshempa ku zuipa kukhi füi nang ang mongtsik dong ilaxle nange kukhi a kun to, wanghom homkha nyetmixbu lompa hwom hom ma shole thompu. 11Ikhato jata kukhie wünmang tuipong ngünpu; ija wünmang ma kaxming malom-malom tüikya. 12Ikhato kukhi füi tomle Ibri sün tuita tüikya. Chix a nyetmix khama lompa tuita dapa changkya. Kukhie chix hama kukhi wünmang wünle koxpu, ilaxle chixe ibu kaxming taile fapu. 13Chixe chemle akax fapuix ija jaojaole changle hüipu. Nange ku a owangpongkya mwot to chatle süt ang tompu ikoxle ku zuipa wangshempa tuita a dingsomle langpu.”

14Wanghompa-e Jusep se ang apao, ilaxle chix kunkha tokya momle apüi. Chixe khosex tamchu nyi-za lüile chang üntoxle wanghompa hato ngui. 15Wanghompa-e chix ang thüi: “Kue wünmang tuita ngünle tüile ikoxle ija kaxming owaechu apuale fa ang müntho. Nange wünmangbu tai ang awanle le ku hama wünle fadaoa.”

16Jusep-e lan: “Kue le münchang, O, wanghompa, ija tai ang a Zang-e tix apuale faüi.”

17Wanghompa-e thüi: “Ku a Nail shuanu kax ma ajongle ngopuixta le kue ngün. 18Ipongma haxnut-zangfexkya maihu hunubu anüt tikha tokya lailaxle fumtsüt ang süt. 19Ifüimachu maihu hunubu mama anüt lai. Ibu a zazatuale tüikya. Ibu ningle maxmaxshukya maihu kue Ijip haxtok ma otuechu mangün. 20Ibu maxmaxshukya maihubue haxnut-zangfexle tüikya maihubu saxle awüt. 21Ile changkya owaechu chiawan, chemthüikoxle hwom a otyatyale tsyatsyenle wüi ngo. Ifüima ku azangle zo. 22Kue ile chuwüi ngünle: Tsaxto anüt owan müiwüi müile tsaxtong tuita ma dongle münkya ngün. 23Ifüima mama tsaxto anüt dongle lai, ibu a owan chimüikyabu tamchu sak-hax winjepe zokle huisho le tüikyabu. 24Owan chimüikya tsaxtobue owan müikya tsaxtobu jokle ngün. Kue ija wünmang jenu-shipa hia tsingpa-wanpabu pangwüi hama wünle koxpu. Ikoxle hwom opupuechu ija wünmang kaxming apuale fa ang müntho.”

25Jusep-e wanghompa ang thüi: “Wünmang pangnyi oli tuita hanpakpak wüi changle. Ija a, Zang-e nang füi chemle mok angkya tüipuix, ija apuale fakya changpu. 26Maihu hunu nutkya anüt a zanglao anüt hanpak changle, ilaxle owa müikya tsaxto anüt chuwüi zanglao anüt hanpak changle, hokhi a tuitata wüi changpu. 27Zazatuakya maihu hunu anüt ofüima tikha tokya laikya hia owan chimüikya tsaxto anüt, sak-hax winjepe ashunlaxle tüikya nyi a zanglao anüt kaikuak-saonu le angkya hanpak changle. 28Ija a kue nang füi akax daokya ningle changpu. Zang-e, chixe chem mok angkya tüipuix, ija nang hama aho ngokya changpu. 29Ijip haxtok pangnu khato wüi zanglao anüt a tüle ahak-aluale tüiüi. 30Ifüima lüile zanglao anüt tuinu-nuaknu lekya tüiüi. Ija nuaknu lepongma, ipong müile saxlaxle ngokya zanglao anüt alakle asamüi, chemthüikoxle otui-onuake ting-nok hato thama apüiüi. 31Tüle tüinangle ngokya hanpak zanghan pangwüi alakle asamdaoüi, chemthüikoxle hüile ngokya tuinu-nuaknu a tüle chongkya changüi. 32Nang wünmang anyi ma anaole ngün ang kopkya a, ija tütakoxlechu changle hüi angkya wüile Zang-e tyadaoa ilaxle ija athax füichima changjao changüi.

33“Athax nange je-hwon hia füingün mikza füikya khünak kamlax ilaxle chix a nang haxwan pangwüi to humele chang ang tomlax. 34Nange chatle chu mama okho-olobu kamlax, ilaxle zanglao anüt ahak-aluale tüipongma kopkya kha angkya manzai othom aga pong athünle thom ang tomlax. 35Ile kop-lo angkya zangpua hüile ngopongma sütling athün angkya hwom ang kax koxlax, ilaxle hwom ang ting-ting to tsax athünlaxle ibu to nyele hungo ang tomlax. 36Ile Ijip nok to tuinu-nuaknu lekya tukma ibu sütling a tsyenle ahankoxüi. Iningle chang koxle khünaknu a woknuak ma münziüi.”

Jusep a Ijip Nok ma Gowarnor ang Zing

37Wanghompa hia nguakhobue ija zangwün changkoxa le lax. 38Wanghompa-e hwom ang thüi: “Keme Jusep ningle müikya khünak, tuita Zang Chasa füikya mix chemtuechu atak toxüi münchang.” 39Wanghompa-e Jusep ang thüi: “Zang-e nang hama ibibile ahole fa füima chatle nang lailaikya jetüi-hwonlangkya mix owa tamtüiüi. 40#Mwt 7.10.Kue nang ku chaxwan ma ija mwot to hu ang kamle koppu. Ku wangpünbue nang kax ma lax angkya changle. Hwom hanpakma, ku kaxtom fangfang ma nang kaxtom changüi. 41Athax kue nang Ijip haxtok ma Gowarnor ang kampu.” 42#Dan 5.29.Chongwang shintop füikya chix chakkhi angkya khoptüt suk üntoxle wanghompa-e Jusep chakkhi ma langle kox. Chixe Jusep to othalixkya nyie awunle kox. Chix dingkux ma liknu wai alikle kox. 43Chixe Jusep ang anyi lükya man-kanlin#41.43: man-kanlin: Mane linkya zyen. chix ngale aham ang kox. Chix le pongma nyetmixbue akhongle chix thothoma le ang tom. Hwome: “Lomshanlax-o! Lomshanlax-o!”, le akhong. Ijaningle Jusep a Ijip haxtok ma Gowarnor ang achang. 44Wanghompa-e chix ang thüi: “Ku a wanghom changle, ikoxle Ijip haxtok ma, nang-tsai nang-kax ma lüwüi chichangba, owaechu cha-chak nwonle münchangüi.” 45-46Chixe Jusep ang Ijip nok mün koxle Zafenah Paneah le nyak. Chixe Jusep ang kakonu chuwüi lomle kox. She a, Heliopolis tingnu angkya zompu-zangpa Potifera sacha Asenath changkya.

Ijip nok wanghompa thotha ang sütpongma Jusep a zanglao 30 changkya. Chixe wanghom khwa dantoxlaxle Ijip haxtok pangkhato wüi aham. 47Zanglao anüt ahak-aluale tüipongma hwom chaxwan ma tüle saxkop-linglole chang. 48Ibu pangwüi angkya afoxlaxle Jusep-e ting-ting to pung zinglaxle athün. Pangnu tingnok towüi hozui-onam tokya saile asoxlaxle Jusep tsax komle athün. 49Saxziak huanu-huanuma changkya tokhange Jusep-e thüt-zing lejao chichangle sho. Ibu saxjun a tinu kax angkya fix büta le changkya.

50Tuinu-nuaknu hüiüi tho angkya zanglaobu mong ma Asenath makhange Jusep ang sasün anyi puxle alai. 51Chixe thüi: “Zang-e ku ang ku sikngün hia apa hwom alaktsuak ang tomdaoa.” Ikhoma chixe sasün tüichongpa ang Manasseh le mün kox. 52Chixe ile chuwüi thüi: “Zang-e ku ang ku fuxtsüikya chaxwan to su-sabu fadaoa.” Idaile chixe anyi lükya sasün ang Efraim le mün kox.

53Zanglao anüt Ijip noke tüle kop-lole ngokya hanpak ashukle hüi. 54#Mwt 7.11.Ifüima zanglao anüt tuinu-nuaknu le angkya owang wang. Ibu pangwüi Jusep-e akax daokya ningle changle hüi. Tuinu-nuaknu a pangnu chaxwan towüi le, ikoxlechu Ijip haxtok ma pangnu khato wüi sax ang ling angkya ma chitüi lüwüi tüikya. 55#Jhn 2.5.Chemtue Ijip nok woknuake max ang thüipuix, hwome wanghompa ma süt jua. Ile chixe hwom Jusep hato taile tsanle apao. Jusep-e chemle akaxpuix ija kax ma laxle chang angkya hwom füi akaxle apao. 56Tui-nuak oziamale pangnu khato wüi ule hüi, ikhoma Jusep-e pangnu khatokya pungbu daplaxle Ijip nok ang hang. 57Chaxwan pangnu khato wüi oziamale nuaknu lekoxle, Jusep angkya tsax shak ang khünaknu Ijip nok lomle ngui.

Currently Selected:

PONGWANG LAIPEX 41: WANCBSI

Highlight

Copy