PONGWANG LAIPEX 40

Jusep-e Kun-kha to Wünmang Taile Kox

1Ifüima alüile chingo homtoxle Ijip nok wanghompa wangshem anyi, ju-mopa hia sax-mopa nyie wanghompa zongto chisukya mwot mok. 2Ija wangshem nyi füi chix ang tüle mongtsik, 3ilaxle hokhi pangnyi wüi kun ma shole thom. Ija kun a, wanghom hom nyetmix lompa akhokya hom ma tüikya. Jusep chuwüi ikhama thomle tüikya. 4Hwom a ija kun mongkha ma okuilole ngole hüi ilaxle lompa-e Jusep a hwom da ningle ngo ang tom.

5Jata ija kun khato wangshempa nyie wünmang tuipong ngün, ilaxle wünmang kaxming a malomlom to hüi. 6Chemtue Jusep hwom hato swomsa ma nguipuix, chixe hokhi künbüt-mongban ngünle lax. 7Chixe hokhi ma atüi: “Anyix a hünkhi huanuma abüt-abankya ningle büthüipu?”

8Okhie lan: “Kukhie wünmang tuipong ngünkya changa, ikoxle ija wünmang kaxming apuale fa angkya mix müntüi changa.”

Jusep-e thüi: “Wünmang tai angkya a Zang-e tix apuale faüi. Hünkhie ngünkya wünmang ku hama wünhu.”

9Idaile ju-mopae thüi: “Ku wünmang ma ku thüntho ma grep zuriak haxtok tüikya, 10ijama ozu azom tüikya. Ochakbu laikya füi tomle opua pua ilaxle grep ziakle jum. 11Ku a wanghompa laihwon chak ma twonlaxle tüikya. Kue ija laihwon ma grepti-ju fyet ilaxle wanghompa ang koxle ngünle.”

12Jusep-e chix ang thüi: “Ija wünmang a ile chang angkya hanpak changle: grep zu azom a nyix azom hanpak changle. 13Nyix azom lükya to wanghompa-e nang danle alaiüi, nang thaidaokya alaküi, ilaxle nang ang amipongkya nang mwot chatle mok ang tomüi. 14Ikoxle ile nang osho müikya hüikya zuma ku wüi taxalak. Ku bama wanghompa hama wün angkya tamchu ija kunkha angkya alaile pao angkya bama chingchalaxle ku to asunkya tüihüi. 15Ku a Ibri nok haxtok tokya koplaxle paokya changpu, ilaxle ikhatochu kunkha to shole thomtang ku ma thaikya chemchu müntüikya.”

16Chemtue sax-mopae chix zuipa wünmang taile fakya changtomtale le apale laxpuix, chixe Jusep ang thüi: “Kue chuwüi wünmang tuita ile ngünle: Saxtsap azom kue khang ma akholaxle tüikya. 17Okho angkya ma mali-mali to atsanlaxle wanghompa hanpak ang an tüikya, ikoxle ibu a osabue saxle ngopuixta le ngünle.”

18Jusep-e lan: “Ija kaxming a ile changle: Tsap azom a nyix azom hanpak changpu. 19Nyix azom lükya to wanghompa-e nang danüi ilaxle nang khang dütle awütüi! Ifüima nang zwoptho a pünkho to ashaüi ilaxle osabue nang müi saxüi.”

20Nyix azom füima wanghompa-e chix puxkya nyix mün ma chix nguakhobu pangwüi selaxle fong asüt. Chixe chix wangshem, kun to thomkya nyi alai üntoxle noknu tuntho to apüi. 21Chixe ju-mopa ang ngokya wangshempa ang amipongkya chix mwot chatle mok ang tom. 22Chix wangshempa sax-mopa ang ngokya mix a dingsomle langle awüt. Ibu pangwüi Jusep-e wünmang taile fakya lailaile chang. 23Ikoxle ija ju-mopa wangsheme Jusep ba ojao texle chitexle alak asam.

Currently Selected:

PONGWANG LAIPEX 40: WANCBSI

Highlight

Copy