PONGWANG LAIPEX 38

Judah hia Tamar Nyi

1Ipongma Judah a hotüi-honao hwom dantoxlaxle Adulam nok angkya mixsün Hirah hato ngo ang pao. 2Ikhato Judah-e Kanancha, Shua le amünkya mixpa sacha tuita apong. Chixe she a ma kakonu ang apüi. 3She-e chix ang Er le amünle sasün tuita puxle kox. 4She ma chatle chuwüi nao nguidongle sasün tuita pux. Ija nao ang Onan le amün. 5Anaole chuwüi she-e sasün tuita pux. Ija nao ang Shelah le mün kox. Ija naosa ngün pongma Judah a Akzib ma tüikya.

6Chix sasün tüichongpa Er hanpakma Judah-e she tuita Tamar le amünkya atak. 7Er zanglom-saikha ojao chimüi. Ijae Zang ang mongma adün. Ikhoma Jowanpae chix lang. 8Ifüima Judah-e Er honao Onan ang thüi: “Donglaxle hünnachong füi jiplax. Nang a she lüka honao, she zongto sangmütpa tuita daile, tamchu olom ma hüile ngoünkoxle, hüitüi ang sixli alaile laxkox.” 9Ile changkoxchu naosom a chixsu chixsa ang chilaxüi le awanlaxle, chemtue she füi jip-pomle changpuix, hotüi hanpak ang sixli chitüile naxchang ang Onan-e chix oti otok to alyet. 10Chixe ile hwonkya Zang zongto chimüikya tuita ang achang, ikhoma Jowanpae chix chuwüi zile pao ang tom. 11Ifüima Judah-e chix nomcha Tamar ang thüi: “Ku sacha Shelah tsongkya tan ang nang hünpa hato chatle ngolax.” Chixe ija a, Shelah chuwüi hotüi hwom lailaile langle nak awütle zalaxle hwonkya changle. Ikhoma Tamar a hopa hwom hom to chatle ngo.

12Ifüima alüile chingo homtoxle Judah kakonu zile pao. Chemtue chixe mangsopkya mongma zakle changpuix, Adulam a chix zuikhui Hirah hokhi Timnah to pao. Chix chunbu ikhato tüikya. 13Tamar hama she hohochong, chix chunmun züt ang Timnah to hüi angkya ta le wünle kox. 14She-e awunle ngokya chunmun nyi-za lüi; thün-khung nyie she thün to alu ilaxle Timnah to leüi lom ma tüikya Enaim lompong ma thungle ngo. Judah sasün naoshukpa Shelah mixmüi ang achangle tsongle hüikoxle ngaxchu athax kople hokhi ating-anokle chang ang apong-ataile mafa.

15Chemtue Judah-e she ngünle laxpuix, chixe she a ma tsangtsa hangkya mixcha tuita changüi le thüt, chemthüikoxle she-e thün to khungle thom. 16Lommun ma chix she hato hüilaxle atüi: “Müidaoa! Obi pong saxlaxpu?” (chixe ija a ma nomcha changle le chitik.) She-e lan: “Nange ku ang chemfaüi?”

17Chixe lan: “Kue nang ang ku zwon kha angkya zwonsa tuita ahüifang.” She-e lan: “Müiüihex! IKoxle nange ku hato nang zwon ma-ahüi tanto, kaxshing kopkya ang chang ang, nange ku ang tütali thüichu tox angkya wüi!”

18“Ikoxle kue kaxshing kop ang chem dantoxüi?”, le chixe atüi. She-e lan: “Ozu füikya nang shintop ilaxle nange kople ahamkya kiathox, ibibi toxlax.” Chixe ibu she ang koxle tox. Ifüima hokhi tomle jip le she ma nao atüi. 19Tamar a hom to chat, she thün-khung nyi sik ilaxle ma zomnu nyi-za chatle lax.

20Ija mixcha hato zwon apüile tox ang tamchu kaxshing kop ang toxdaokya chix mwot-katbu lax ang Judah-e chix zuikhui Hirah tomle apao. Hirah thoma ija mixcha hom ma chibang. 21Chixe Enaim nok owawa ma atüi: “Ikha angkya tsangtsa hangle ngokya mixcha omaünpuix?” Hwome lan: “Ikhama tsangtsa hangkya mixcha jaojao münngo.”

22Chix Judah hato chatlaxle thüi: “Kue she münataktsuak. Ekha tokya khünakbue pi ikhato tsangtsa hangkya mixcha jaojao münngo le thüile.”

23Judah-e thüi: “Ibu mwot-kat she-e wüi makux angle naxthomkox. Owawae kem chanyi koxle wüi münmüiüi. Kue she ang otha thom ang lompu, ikoxle nang thoma she chibang.”

24Lyet azom tukux füima owawae Judah ang thüi: “Nang nomcha Tamar tsangtsa hangkya mixcha tuita ningle ngolaxle athaxpi she ma naotüiüna.”

Judah-e kaxkox: “She kotok to alailaxle zokle langdao.”

25Chemtue she kotok to alaile changpuix, she-e hohopa hato ija kax hole achat: “Ku ma tüikya ija zu hia kiathox owa kux changkya hex, hukoplax. Ku ma nao atüikya a, ibu tuina hopupae atüikya changpu.”

26Judah-e ibu chix kux changpule awanle lax üntoxle thüi: “Kue she ku sasün Shelah füi ating-anokle chang ang kang koxdaose changkoxa. She wüi münthai, ku wüi thaidaongüna.” Ifüima Judah she füi tomjip-tompom le chichang.

27Chemtue she ang nao ngün angkya hanpak ngangle hüipuix, she ma nao apyet le tüikya awan ang kop. 28Nao ngün ang kakkya zuma tuitae chak alai. Naotan mixnubue ija ma zükhik füi khakle kop. Hwome thüi: “Owang ma puxkya nao a ija changle.” 29Ikoxle ija naoe chix chak chatle adün ilaxle ata nao wüi thoma ngün. Ija ma naotan mixnubue thüi: “Nange nang lom ile jamle laxpia!” Idaile chix ang Perez#38.29: perez: Ija mün a Ibri kax ma “lom jamle laikya”, le changle. le mün kox. 30Ifüima honao chak ma zükhik füi khakdaole pux, ilaxle chix ang Zerah#38.30: zerah: Ija mün a Ibri kax ma dün-nyan ningle khikya le thüikya kax changle. le mün kox.

Currently Selected:

PONGWANG LAIPEX 38: WANCBSI

Highlight

Copy