PONGWANG LAIPEX 33

Jakop-e Esau Apong

1Athax Jakop-e mikzaple hukoxle khünak 400 koplaxle Esau hüile ngokya ngünlelax. Ikhoma chixe, sasün hwom, Liah, Rachel hia dacha hwom manunusa le ahan. 2Chixe dacha hwom sasün hwom füi thochi ma süt ang tom; ifüifüima naosom hwom füi Liah süt ang tom ilaxle Rachel sasün nyie füikom le chang ang tom. 3Chix a hwom pangnu tunthoma le. Chixe othom anüt ma hax to akhuxlaxle, hotüi ha ma-alop ma-alople ile aham. 4Ikoxle Esau a chix füi apong ang zikle hüi, chix to thüile kün ilaxle ngom ma künlaxle tun apong; ijama hokhi pangnyi sop. 5Chemtue Esau-e shekobu tamchu naosombu ngünle laxpuix, chixe atüi: “Ibu nang füi tomle hüikyabu a opang?” Jakop-e lan,

“Ibu a nang dapa ku ang Jowanpae mohimankyabu changle.” 6Ifüima danuchabu soxle hüi; hwom füi tomle naosom hwom chuwüi hüi, ilaxle Esau chitong ma akhux. 7Liah hosa hwom chuwüi hüilaxle chix chitong ma akhux. Oshuk ma Rachel hia Jusep hwom hüilaxle chix chitong ma akhux.

8Esau-e thüi: “Ami thochima ku füi apongle leünkyabu a chemningkya”?

Jakop-e lan: “Ija nang mongjua jox angkya hanpakma changle.”

9Ikoxlechu Esau-e thüi: “Ku ma tütalichu okhonguile tüingole; kunao, nangkux ibu nange wüi kopdao.”

10Jakop-e thüi: “Münchang, ile münchangüi, nange ku to mongjuakya chemchu chitüi thüiningle ku hingho chuwüi lax angkya changle; ku zongto nang thün ngünkya a otsing tomtata ma Zang thün ngün ang kopkya tukuxle sütle. Nange ku to chem mongjua chitüile ipongpongle wünpwonle pongle kopkya huanu changpu. 11Kue nang hato apüikya hingho pongle kop angkya wüi changpu, chemthüikoxle ku to Jowanpae ching-chahudaoa, ile kue alomlom pangwüi kue koptsuakdaoa.” Ile Jakop-e atsangkya khoma Esau-e ibu hingho pongle kop.

12Ifüima Esau-e thüi: “Athaxpi jo homchi to chat ang achexhax, ilaxle ku nang füi tomtomle ahamüi.”

13Ikoxlechu Jakop-e chix ang thüi: “Nange awan ngopu, naosom ma zong chitüi tamchu hosa füikya müibu paktikle aham angkya changle. Hwom nyixta ngaxchu atsangle jangjwon thüiningle ibu zile paoüi. Ibu to akhi-amikle chang angkya a ku mwot ang changle. 14Idaile nang achale chat bang, ikoxle ku a zaze-zazele azuile hüiüihex. Edom ma-alop ma-alople naosom hia müibu füi otsuaktsuak ma ahamle hüilax angpuix.”

15Esau-e lan: “Jangchangba kue ku khünakbu züizüi nang füi toxfang.”

Ikoxlechu Jakop-e thüi: “Khünakchu taxtox ngo, nange ku to mongjua chemchu chitüile#33.15: chemthüikoxle nange ku pongle kopkya wüi ku mongzom ma nguile changdaoa; chichangba nange müiüi jangthüiba. ku pongle kopkya müihudaoa.” 16Ikhoma Esau a Edom alop ang achexle chat. 17Ikoxle Jakop a Sukkoth#33.17: sukut: Ibri kax ma ija mün a “thongnuibu”, le changpu. to pao; ikhato chixe ma pombu hia müibu athong angkya nui zaile athong.

18Mesopotamia tokya chat pongma, Kanan haxtok angkya Shekem alople haxmüi-zangma lüwüi ngui. Chixe tingnu zui ma kothofa to chixe hwom thongnui zaile athong. 19#Jih 24.32; Jhn 4.5.Chixe ijakha haxtok khop ngunkhix hota koxlaxle Shekem hopa Hamor su-sa hwom ma shak. 20Chixe ikhama tö-tsap tuita tan ilaxle ijongkha ang Israel nok Zang mün ma El le nyak.

Currently Selected:

PONGWANG LAIPEX 33: WANCBSI

Highlight

Copy