PONGWANG LAIPEX 26

Isak a Gerar ma Ngo

1Kaitanto Abraham tsün to ledaokya boma athax chuwüi tuinu-nuaknu le. Filistia wanghom Abimelek hato Isak Gerar to pao. 2Jowanpae Isak hato ngailaxle chix ang thüi: “Ijip nok to taxka ikoxle kue nang hama ahokya haxtok ma ngolax. 3#Pon 22.16-18.Eja chaxwan to nang wünpa tuita ningle ngolax ilaxle ku nang füi tüile. Kue nang to mohimanüi, chemthüikoxle kue nang ang tamchu nangsix-nangli ang haxtok ibu pangwüi kox angkya changle. Ile kue hünpa Abraham füi tsaotsütdaokya ningle mokle wüi shu angkya changle. 4Kue nang sixlibu ding angkya lyettsi büta lai ang tomüi, ilaxle nang sixlibu ang ibibi haxtok komkaile koxüi. Chaxwannu angkya jat-libue ma hanpak ang mohiman, nangsix-nanglibu makhange tix koplaxüi; 5chemthüikoxle Abraham-e ku kax ma laxle chix ang fakya ku wanlom hia kaxtombu changle thom ang thodaoa.”

6Ikhoma Isak a Gerar ma hom-hax zinglaxle ngo. 7#Pon 12.13; 20.2.Chemtue ikha tokya khünakbue chix kakonu bama atüile changpuix, chixe thüi: “She a kunao changle.” Rebika a tüle osün müikya mixcha tuita changle le ngünlaxle, she khokho ma chixe mik max angkya nakatak le zalaxle chixe ile atse angkya lai. 8Isak ikhato müimamale ngole hüikya füima Filistia nok wanghompa Abimelek-e thangmik tuita makhange hule changpongma Isak-e ma kakonu Rebika to künle kopkya ngünle lax. 9Ikhoma Abimelek-e Isak sele apüilaxle atüi: “Rebika a nang kakonu changtüi ngün! Ingale ‘She a kunao changpu’ le nange büthüikoxle akax?”

Isak-e lan: “She khokho ma kue mik max angkya nakatak le zalaxle kue ile thüikya changkoxa.”

10Abimelek-e thüi: “Nange ija chichangkya hwonpu. Ku khünak owawae nang kakonu to twon-jao le chang koxba, ija thaikya a nang khangkho ma wüi düt-se.” 11Idaile Abimelek-e khünaknu ang kaxkhün koxle akax: “Owawae ija mixsün kakonu to twon-jao le jangchang thüiningle kue chix langüi.”

12Isak-e ija haxtok ma manzai ilaxle ija zangpuapua mawüi, amipongkya to othom hoponge nüile puamün ang kop. 13Jowanpae chix to mohimanle chix a saxpu-luawang ang achang. Ile chix okop-olwot ma süchong-süchongle tüle tüi-nangkya mix ang achang. 14Chix a chun, maihu hia dabu huanuma tüi-nang le hwom homkha pu-tsale changkya ngünlaxle Filistia noke Isak to miktsak ang süt. 15Ile hopa Abraham tsün towüi chix dabue thole alaikya tüküibu to ibue hax füi tix.

16Ifüima Abimelek-e Isak ang thüi: “Nang a kwom to kaile jao ahak-aluaüna. Athaxpi kwom haxtok dantoxlaxle paolax.” 17Ikhoma Isak-e ikha dantoxlaxle onox ma Gerar haxsha ma athong-anale ngo. 18Ami Abraham tsün towüi thole toxkya tüküi, chix zikya füima Filistia noke tixle changdaokya tüküibu Isak-e anaole thole alai ilaxle hopae nyakkya ningle wüi ibu tüküi ang omün nyak.

19Isak dabue haxsha to tüküi tho koxle ti bang. 20Gerar nok chun-nyetmixbue Isak chun-nyetmixbu to ahe, ilaxle hwome thüi: “Ija a kwom ti changpu.” Ikhoma Isak-e ija tüküi ang “Wukdün”, le mün kox.

21Isak dabue chatle tüküi mama tho. Ikhama chuwüi ahe. Ikhoma chixe ija ang “Fuxngai”, le nyak. 22Chix ikha angkya achexle pao. Chix nguikya khatochu chixe tüküi chatle thole alai. Ija tüküi ma atsi-alakya chemchu chitüi. Chixe ija ang “Mongtex-za-lai”, le nyak. Chixe thüi: “Athaxpi Jowanpae kem ija haxtok ma ngo angkya pandaoa. Ikhama kem a tüle tüinangle changüi.”

23Ikha dantoxlaxle Isak Bersheba to pao. 24Ija jaja wüi Jowanpa ngailaxle chix füi akax: “Ku a hünpa Abraham Jowanpa changpu. Nang taxza; ku dapa Abraham khoma kue nang to mohiman angkya changle. Nang sixlibu kue tüle pu-tsa ang tomüi.” 25Ikhoma chixe ikhama tö-tsap tuita tan. Jowanpa münlün le nyak ilaxle ikhama chixe nyihom ajongle pom zai. Isak dabue ikhama tüküibu thole alai.

Isak hia Abimelek Nyi Tsaifün-Kaxwün

26 # Pon 21.22. Ofüima Gerar tokhange, chix nguapa Ahuza hia süpahi lompa Fikol nyi koplaxle Abimelek a Isak hato ngui. 27Isak-e hwom ang thüi: “Hünzome miktsak üntoxle jwonle apao koplaxle ku hato chem to hu ang hüi?”

28Hwome thüi: “Kwome Jowanpa nang füi tüile le ngün ang kople; idaile kwome thüipu, kem bama tsaotsüt tuita thomhax ilaxle kwome nang füi Tsaotsüt le changüi. 29Kwome nang to oma chemchu chimokle zingmüi ma pao ang tompu, ilailaile nange chuwüi kwom to oma chemchu taxmok. Athax a Jowanpae nang to mohimankya atsingsho.” 30Isak-e hwome sax angkya sütling to humele kox ilaxle hwome süt sax ti-lingle chang. 31Ofüinop swomsae hwom pangnue wüi tsaotsütle Tsaotsüt lax. Ile hwom bama muamüi le changkya füima Isak-e hwom chatlax-otix le achat.

32Ija nyixkha wüio le Isak dabue hwome tüküi thole alaikya apua. Hwome thüi: “Kwome ti atakdaoa.” 33Isak-e ija tüküi ang “tsaotsüt”, le nyak. Ile Bersheba#26.33: bersheba: Ija mün a Ibri kax ma “Tsaotsütkya tüküi” chichangba “Tüküi anüt” (21.31 tochu hulax). tingnue mün kop.

Esau-e Mixnok Shekobu Laxkya

34Esau zangpua 40 nguikya füima chixe Hit nok sheko anyi lax. Tuita a Beri sacha Judit, ata mixcha a Elon sacha Basemath. 35Ija mixcha nyie Isak hia Rebika nyi to müimamale tingtui adün.

Currently Selected:

PONGWANG LAIPEX 26: WANCBSI

Highlight

Copy