PONGWANG LAIPEX 25

Abraham Sixli Mamabu

(1 Pp 1.32,33)

1Abraham-e chatle chuwüi Keturah le amünkya mixcha tuita tamlax. 2She makhange chix ang Zimran, Jokshan, Medan, Midi, Ishbak üntoxle Shuah hwom bibi pux. 3Jokshan a Sheba hia Dedan nyi hopa. Dedan sasün hwom a Ashurim, Letushim, üntoxle Leumim. 4Midi sasün hwom a Efah, Efar, Hanok, Abida üntoxle Eldah. Hwom bibi a Keturah su-sa-hwom changkya.

5Chix ma atüitüi komkaile Abraham-e Isak ang kox. 6Ikoxle chix danucha mamabu sasün hwom ang a hingho-chakzun ma kox; ile chix ozün ma tüitanto wüi mwottsuak laxle hwom bibi a sasün Isak füi atsaile handünchi nok to pao ang tom.

Abraham Zikya hia Akhünkya

7-8Abraham a zangpua 175 tsünlo-khothole ngolaxle zi. 9Sasün Isak hia Ishmael nyie chix mang Makfela angkya longlua ma zu; ija a Hit nok Zohar sasün Efron haxtok changkya. Ija haxtok a Mamre zongma handün chikao ma tüikya. 10#Pon 23.3-16.Ijakha a Abraham-e Hit nok ma shakle laxkya haxtok changkya. Abraham a ikhama chix kakonu Sarah füi tomle zu. 11Abraham zi füima, Zang-e sasün Isak to mohiman. Isak a “Ku Ngünle laxkya Ozün ma Tüikya Zang Kux Tüküi” zui ma hom-hax zinglaxle ngo.

Ishmael Sixli Hwom

(1 Pp 1.28-31)

12Ibibi a Sarah dacha Ijip cha Hagar makhange ngünkya Abraham sasün Ishmael sixli hwom changle. 13Ibibi a Ishmael sasün hwom mün tüichong naoli achwotle zakya changle: Nebaioth, Kedar, Adbil, Mibsam, 14Mishma, Dumah, Massa, 15Hadad, Tema, Jetur, Nafish, ilaxle Kedemah. 16Ibibi chuwüi Ishmael sasün hwom üntoxle hwom münbu changle. Hwom tingkhua hia hwom thongnuibu mün tswonle hwome ibu mün-nyak; hwom jat-li mün a wanghom hwom 12 ang chuwüi amün. 17Ishmael a 137 zangpua tsünlole ngolaxle zi. 18Ishmael jat-li hwom a Hawilah makhange Shur alople tingkop-haxzing laxle mama Abraham su-sa hwom füi atsaile ngo. Ijongkha a Asiria chikao to Ijip nok füi asaole tüikya; ilaxle chix a ma-mixbu pomtho ma zi.

Esau hia Jakop Nyi Puxkya

19Ibu a Abraham sasün Isak pukax changpu: Abraham a Isak hopa changkya. 20Chixe Rebika laxpongma Isak a zanglao 40 nguidaokya. Rebika a Paddan-aram angkya Aramea mixsün Bethuel sacha tamchu Laban hona changkya. 21Isak-e chix kakonu ma süshix-naosom nguidongle chichangkya khoma Jowanpa to zangjop; ikoxle Jowanpae chix zangjop to lanle Rebika ma naotüi ang tom. 22She wok-kha towüi naosa anyi tüilaxle ashing-atop le changkya khoma she-e thüi: “Ija ningle ku matix chemkhoma changkya chang koxpu?” Ikhoma she a Jowanpa ma tsaipong-kaxpak tikle chang ang pao.

23 # Rom 9.12. Ilaxle Jowanpae she ang thüi:

“Nang ma jat-li anyi tüile;

nange zanpa anyi puxle alaiüi.

Tuita a ata mix füi tsak-zongle tüiüi;

Hotüie honao thothale changüi.”

24Chemtue she hato nao ngün angkya hanpak ngangle hüipuix, she wok khama naosa anyi tüikya. 25Pongwang angkya khikhile, tsangtsa ma mune awangle chwoplaxle lai; ikhoma hwome chix ang Esau#25.25: isau: Ija mün a ofüima, Esau su-sa hwom ating-anokle changkya haxtok Seir nok mün hanpak ang tswon; ija Seir a Ibri kax ma “Mun” ang nyakkya alele le tüile. le amün. 26Ifüima honao lai. Chix a hotüi Esau cha ma koplaxle lai, ikhoma hwome chix ang Jakop#25.26: Jakop: Ija mün a Ibri kax ma “Chidua” ang nyakkya füi alele le changle. le amün. Ipongma Isak a zanglao 60 nguidaokya.

Esau-e Chix Sünkho Hangle Awüt

27Okhi tsongle hüikya zuma, Esau a müihap le faokhakha to ngose tsukya mix ang achang, ikoxle Jakop a nyihom ma dangjajale ngonuikya mix ang lai. 28Esau-e langle apüikya müisüt ma azamlaxle Isak-e chix towüi akhüix, ikoxle Rebika-e Jakop towüi akhüix.

29Hanpak tuita ma Jakop-e suisong le ngokya. Ipongma Esau, faokha tokya tüle na-jua le wangle hüi. 30Esau-e Jakop ang thüi: “Ku ang ija khikhikya fialo sui shong-fahüi, ku tüle na-jua le maxle.” (Ikhoma chix ang Edom#25.30: edom: Ija a Ibri kax ma “Khikya”, le thüikya ningle changle. le nyak.)

31Jakop-e lan: “Owangpa ma nang nuput sünkho ku ang koxle shong-kop-hüi.”

32Esau-e thüi: “Ku woknuake maxle ziüikhakha thüilax koxning, ija nuput sünkho chem changkya?”

33 # Ibr 12.16. Jakop-e lan: “Pongwang ma nange tsaosaxle kopdao.”

Ikhoma chixe tsaosaxlaxle ma nuput sünkho Jakop ang koxle apao 34Ifüima Jakop-e an hia suibu Esau ang kox. Chixe ija süt sax üntoxle jipkya zokya faokhato wüi pao. Ile Esau-e ma nuput sünkho Wün-ahai.

Currently Selected:

PONGWANG LAIPEX 25: WANCBSI

Highlight

Copy