PONGWANG LAIPEX 22

Zang-e Abraham ang Isak Tö angkya Kaxtom#22.0: kaxtom: Tsiakle tox ang chimüikya Zang tokhange hüikya kaxhua. Kox

1 # Ibr 11.17-19. Ifüima alüile chingo homtoxle Zang-e Abraham to thwontsing; chixe Abraham nyak: “Abraham a!” Ilaxle Abraham-e lan: “Ui, ku ikhama tüile!”

2 # 2 Pp 3.1. Zang-e thüi: “Nang sasün tuita wüi tüikya, owa to nange tüle mongkünpuix, ija Isak koplax ilaxle Moriah chaxwan to paolax. Ikhato haxnukho oja kue ahoüihex, ikhama ku ang chix tö koxhüi.”

3Ofüinop swomsae tö koxkya ma lax angkya hanpakma Abraham-e ha hidaole afox. Chixe ibu chix mantsak ma hünzing laxle, chix füi tomle Isak hia da anyi koplaxle lai. Zang-e chix hama Zang-e apuakya onui alop angkya hanpakma hwom achex. 4Nyix azom lükya to Abraham-e ija onui ochu to ngün. 5Ifüima chixe da nyi ang thüi: “Ikhama mantsak füi nuibang. Nao kukhi chukha to paolaxle zangshwomle tox üntoxle hünkhi hato chathüi ang.”

6Tö kox pongma lax angkya ha Abraham-e Isak ang apai. Chixe a bitlo tuita iboma wüntak angkya hanpakma wünhandix le kop. Okhi tomtomle ahamle ngopongma, 7Isak-e okax wangle “Apa!”, le nyak.

“Ui! Chem ku sa?”, le hopae lan.

Isak-e atüi: “Nang ma ha hia wün a tüi, ikoxle tö kox angkya hanpakma chun hosa ang ojongto tüi?”

8Abraham-e lan: “Zang chix jaoe tuita kox angkya changle.” Ilaxle hokhi pangnyi tomtomle ahamle ka.

9 # Jak 2.21. Chemtue hokhi Zang-e chix hama akaxle koxkya onui to nguipuix, Abraham-e tö-tsap tuita zing ilaxle ija ding ma ha athünle dan. Chixe sasün khakle koplaxle ija tö-tsap angkya ha dingma dan. 10Ifüima chixe sasün lang angkya hanpakma bitlo tswon. 11Ikoxle Jowanpa kaxtaimixe zangkho tokhange nyakle thüi: “Abraham, Abraham!”

Chixe lanle thüi: “Ui, ku ikhama tüile.”

12Chixe thüi: “Nao to chak taxmok chichangba tütale chu taxchang. Nange hünsa tuita wüi tüikya chix ang münkoxpu le chiamongkya ngünlaxle athax kue nang ma Zang achuak-achenkya hia chix kax ma laxle tüikya ngünle laxdaoa.”

13Abraham-e akhople hukoxle zu khato ozong awünlaxle chunla tuita ngünle lax. Chixe ija kople apüi ilaxle sasün lüima ija zokle ashunkya tö ang langle kox. 14Abraham-e ija onui ang “Jowanpae Koxkya#22.14: koxkya; chichangba Ngünkya. kha”, le nyak. Athax kople khünaknue “Jowanpa haxnu ma chixe kox”#22.14: kox; chichangba ngün ang kop. le akaxle.

15Anaole chuwüi Jowanpa kaxtaimixe zangkho tokhange Abraham nyak, 16#Ibr 6.13,14.“Kue ku mün ma tsaosaxpu:Jowanpae akax ngopu: kue nang to okhonguile mohimanüi. Nange ile mokkya khoma tamchu hünsa tuita wüi tüikya ku ang kox angkya chiakhexkya khoma, 17#Ibr 11.12.Ding angkya lyettsi hia tinu kax tokya sak büta kue nang ang sixlibu kox angkya tsaopu. Nang sixli hwome zan-nokbu to tingtakle tsuaküi. 18#Mwt 3.25.Jat-li pangnusae, kue nangsu-nangsabu to mohimankya ningle hwom tochu mohimanhüi le ku ang thüiüi: ibu a nange ku kaxtom kax ma laxle tüikya khoma changpu.” 19Abraham chix dapa nyi hato chat, ilaxle Abraham ngokya khato hwom tomwüile Bersheba to chat.

Nahor Sixli-hwom

20Aluile chingo homtoxle Abraham-e Milkah-e hotüi Nahor ang naosom achyet pux-paile koxkya awan ang kop: 21Tüichongpa Uz, chix honao Buz, Aram hopa Kemuel, 22Kesed, Hazo, Pildash, Jidlaf, üntoxle Bethuel, 23Rebika hopa. Abraham honao Nahor ang ibu naosom achyet Milkah-e pux-paile kox. 24Reumah, Nahor danuchae, Tebah, Gaham, Tahash, üntoxle Makah hwom bibi pux.

Currently Selected:

PONGWANG LAIPEX 22: WANCBSI

Highlight

Copy