PONGWANG LAIPEX 20

Abraham hia Abimelek Nyi

1Mamre angkya Abraham Kanan haxtok shuathong chikao to achex ilaxle Kadesh hia Shur nyi zo ma ngo. Ofüima, chix Gerar ma ngole tüipongma, 2#Pon 12.13; 26.7.chixe ma kakonu Sarah a chix nanao changpule akax. Ikhoma Gerar angkya wanghompa Abimelek-e Sarah chix hato apüile thom. 3Jata wünmang chito chix hato Zangngai laxle chix füi akax: “Nange ija mixcha laxkya khoma nang a zi angkya changle; chemthüikoxle she a kakonu tuita changpu.”

4Ikoxlechu Abimelek a she zui to mahüikya, ilaxle chixe thüi: “Jowanpa, ku a mathai! Nange ku tamchu ku khünakbu amütüi hia? 5Abraham chix jaoe she a chix nanao changpule akaxpu, ilaxle she-e chuwüi ile thüipu. Kue ija küntsao-mongthakya füi mokpu, ilaxle ku thaithaxle machang.”

6Wünmang chito Zang-e lan: “Nange küntsao-mongtsaokya füi mokpu le kue awanpu; ikhoma kue nang ang, she to twonle, ku zongto ochax lyenle thaithaxkya chitüi angkya kuxmale kue abax thompu. 7Ikoxle athax a, she a hokakopa hato achatle koxdao. Chix a ajepa tuita changpu, chixe nang chizi angkya hanpakma nang bama zangjopüi. Ikoxle nange she chix ang achatle chikox jangthüiba, kue nang ang kaxkhün koxle thüipu, nang ziüi, nang bomachu nang khünaknu pangwüi ziüi.”

8Ofüinop swomsae Abimelek-e chix nguakhobu selaxle chix to chemle changpuix ija wünle kox, ikhoma hwom tüle abüt. 9Ifüima Abimelek-e Abraham selaxle atüi: “Nange ija ku to chem hwon? Ku tamchu ku wangting hato thama apüi ang tom angkya kue nang zongto thaikya chem mokdaopu? Nange ku to hwonkya ningle owaechu taxhwon. 10Nange ile chemkhoma hwonpu?”

11Abraham-e lan: “Ikhato Zang thua zakya mix owachu müntüi ikhoma ku kakonu laxüima hwome ku langle awüt-kop angkya le kue thütdaokoxa. 12She a otsingtomtata machu ku nanao changle. She a ku apa sasün changle, ikoxlechu ku anu makhange münchang, ilaxle kue she aju-asomle changpu. 13Ikhoma chemtue Zang-e ku apa hwom hom tokya mixnok chaxwan to tomle apaopuix, ‘Nange ku to e-sele tüikya a pangnusa hato nang a ku nanao changpule akaxkya makhange aho ang tsuaküi’ le akaxkya changkoxa.”

14Ifüima Abimelek-e Abraham ang Sarah achatle kox, ifüi tomle chixe chix chun, maihu, üntoxle dabu chuwüi koxle apao. 15Chixe Abraham ang thüi: “Hulax, ibibi ku chaxwan ma nang ojongkha ma ngose tsupuix ngokox.” 16Chixe Sarah angchu akax: “Kue hüntüi ang jan ngunkhix hajat tuita koxle apaopu, ijae nang füi tomle tüikya khünak pangnusa hama nang ma thaikya chemchu müntüihex le ahopu; nange thaikya chemchu mamok le noknusae awan ang kopüi.”

17-18Abraham kakonu Sarah to ile changdaokya khoma Jowanpae Abimelek hwom homkha angkya mixcha hwom opupu machu supux-sapaile chang ang chitom. Ikhoma Abraham-e Abimelek hanpakma zangjop, ilaxle Zang-e chix amüile fa. Chixe wangchanu hia dacha hwom pangwüi, supux-sapaile chang angkya hanpakma amüile kox.

Currently Selected:

PONGWANG LAIPEX 20: WANCBSI

Highlight

Copy