WANGSHEMBU MWOT 9

Sol Mong Alüixkya

1Ibaba ma Sol-e Jisu Khrista wangpünbu lang-huakle zothup ngo. Chix nguakho hato pao, 2üntoxle Jowanpa-e ahokya lom tokyabu owawa jangbang thüiba, chixe hwom sheko lüka pangnu kop ilaxle Jerusalem to laxlaxle chat ang tsuak angkya bama, Damaska tokya Jehudi nok sinagokbu ma akhokyabu hato, chix owa hex tamchu chixe chem mok angkya zong koplaxle nguipuix, ibu apuale süntsing münwan fakya laiza jule kop.

3Chix Damaska to paoüi lom to, ija tingsho hato namle tüipongma, allele ding tokya wünnyane chix akhople nyan. 4Chix hax to düt ilaxle “Sol! Sol! Chem khoma nange ku zothuppu?”, le chix füi akaxkya kaxzing tuita atat.

5Chixe “Jowanpa, nang owa?”, le atüi. “Ku a nange zothuple ngokya mix Jisu changpu; 6ikoxlechu nang zolax üntoxle tingkhua to donglax; ikhato nange chemle moküi hex ija owawae apuale faüihex”, le ija kaxzinge thüi.

7Sol füi tomle ahan ngokya khünakbu kaxsix chidünle ajong; hwome kaxzing a atat ikoxlechu owachu chingün. 8Ikha angkya Sol ajong ilaxle mikzam ikoxle chixe chemchu chingün. Idaile hwome chix chak ma syet laxle Damaska to dün. 9Nyix azom bama chixe chemchu chingün, ilaxle ija bama chixe chemchu chisax chiling.

10Damaska to Anania le amünkya Jisu wangshem tuita tüikya. Chixe mikngün ohün ngün, ijama chix füi Jowanpa-e ile akax: “Anania.” Chixe lan: “Jowanpa, ku ikhama tüile.”

11Jowanpa-e chix ang thüi: “Achwonlax ilaxle lomnu tangthokya ma lekox, ilaxle Juda hom ma Tarsas tokya nguikya Sol ojonghex le atüikox. Chixe zangjople ngole, 12üntoxle mikngün ohün ma chixe Anania le amünkya khünak tuita nguilaxle chixe chatle ngün ang kop angkya kuxma chix to chake twonle ngündaoa.”

13Anania-e lan: “Jowanpa, chix huak bama tamchu chixe Jerusalem angkya nang khünaknu to za adünle zothupkya bama khünakbue ku hama wündaoa. 14Üntoxle chix a Damaska to nang shwomtole ngokyabu pangnu kop angkya hanpakma nguakhobu angkya laiza koplaxle hüikya changle.”

15Jowanpa-e chix ang thüi: “Paokox! Chemthüikoxle kue chix ku mwot mok ang kamdaoa. Chixe ku mün mixnokbu hia hwom wanghombu hato tsingang tomüi. 16Üntoxle ku mün awan ang kox angkya bama chixe sikngün apong angkya pangnu kue chix hama wünle koxüi.”

17Ikhoma Anania pao, ija hom to ngui ilaxle Sol to chix chak füi twon. Chixe thüi: “Tüinao Sol, Jowanpa Jisu chix jaojaoe ku tsanle ahüikya changle. Chix a nang ikhato hüiüi lom to nang füi apongkya mix changle. Nange chatle ngün ang kop angkya kuxma üntoxlechu nang Otsao Chasae awang angkya hanpakmale chixe ku tsanle ahüikya changle.” 18Ifüi tomle nyaxkhwon khao ningle Sol mik angkya düt ilaxle chixe chatle ngün ang tho. Chix ajong üntoxle bapti; 19ilaxle chixe fongsax füima, chix ang zong chatle hüi.

Sol-e Damaska to Kaxho Müikya apuk

Onox ma Sol Damaska angkya Jisu wangshembu füi nui. 20Chix tangthole sinagok to ngui ilaxle Jisu bama hwon-ano ang süt. Chixe thüi: “Jisu ang Zang Hosa changle.”

21Chix kaxzing atatkyabu pangwüi abüt ilaxle tata ma atüi: “Ija mixsün a Jerusalem ma Jisu mün ma zangshwom ngokyabu lang-huakkya mix münchangkox hia? Üntoxle chix ikhato nguikyachu wüi nguakhobu hato iningkyabu koplaxle chat ang nguikya münchang hia?” 22Ikoxsisile Sol-e chix hwon-nwot makhange khünaknu okop okople kop üntoxle Jisu a Messaiah changpu le chixe kaxkhi fakya changtomtapu le thüikya khoma Damaska ma ngokya Jehudi khünakbue chix kax to lan ang chitho.

23 # 2 Ko 11.32,33. Hanpak namhom homkya füima, Jehudi khünakbu asox ilaxle Sol lang angkya katzua lax. 24Ikoxlechu ija hwom katzua bama chix hama wünle kox. Zangnak zangngai hwome tingnu pan ma chix lang ang tanle nui. 25Ikoxlechu Sol füito azuikyabue jata pao ilaxle katuk akhakya makhange chix thoma sholaxle akaile ajole pao ang kox.

Sol Jerusalem to Chat

26Sol Jerusalem to chatlaxle Jisu füizuimixbu othom khato hak ang azong. Ibachu hwome chix to, chixchu wüi Jisu to ongkya mix tuita changpu le chiong, ilaxle hwom pangwüi chix thua za. 27Iponge Barnaba chix to fong ang hüi ilaxle chix wangshembu hato apüi. Sol-e Damaska panja ma Jowanpa apongkya üntoxle Jowanpa-e chix füi akaxkyabu pangwüi chixe hwom hama thutle wün. Damaska to Sol-e mongchyen füi Jisu mün ma hwon-anokya bamachu wüi chixe hwom hama wün. 28Ifüima Sol-e hwom füi tomwüi saxmokle Jerusalem pangnu khato wüi zangwün ang ojao chizale Jisu mün ma hwon-anole aham. 29Grik kax ma wünkya Jehudi nokbu füi chix kax machu alat, ikoxlechu hwome chix mik amüt ang azong. 30Chix tüinaobue ija awan laxkya zuma, hwome Sol kaisaria to jo ilaxle imakhange chix Tarsas to chat. 31Ile Jehudi üntoxle Galili tamchu Samaria tokya müimüithombue sikngün apongkya zakle tumüikya hanpak atak. Jowanpa chathua zakya hia Otsao Chasa mongsom ma ngokya füi, hwom khünak huak tsale hüi.

Pitar-e Lidia hia Chopa to Ohünotün Mwot Mok

32Pitar pangnu khato aham, ilaxle hanpak tuita ma chix Lidia ma tüikya Zang khünakbu wai ang ngui. 33Ikhato chixe zangpua achyet lya angkya zo ang chitho le faile kak ngokya Anania le amünkya mixsün tuita apong. 34Pitar-e thüi: “Anania, Jisu Khrista-e nang amüile. Zolax ilaxle nang lya tswonlax.” Ima wüi thuile Anania zo. 35Lidia hia Sharon tokya khünakbu noke chix ngün, ilaxle hwom Jowanpa hato hüi.

36Chopa ma Tabitha le amünkya mixcha tuita tüikya, she a mongong mixcha tuita changkya. (Grik kax ma she ang Dorka le amün, thüikoxle müikhi le amün). She e ma hanpak pangnu müikya mwot mok ang tamchu chitüi chinang mix to fong ang ashix. 37Iponge she kaklaxle zi. Mangti ajo ilaxle she mang homdingkho angkya nui tuita ma thom. 38Chopa a Lidia makhange chemnu le chiatsai le tüikya, ilaxle otue Chopa tokya mongong mixbue Lidia to Pitar nguile tüikya kax koppuix; hwom hato chingchalaxle momle nguihüi ta le Pitar se ang mixsün anyi tsanle akat. 39Achwonlaxle Pitar a hokhi füi tomle ngui. Otue chixe ikha aloppuix, hwome chix homdingkho angkya nui to dün. Zomnubu pangwüi chix akhople asox üntoxle hwome sopngale she ozün ma tüitanto Dorka-e zingkya nyipong hia kutbu chix hato aho. 40Pitar-e hwom pangwüi homtho to alai, chikux athong ilaxle akhuxle zangjop; ifüima chix mang hato hüilaxle akax: “Tabitha, zolax!” She e mikzam ilaxle Pitar ngünkya zuma she azangle chat. 41Pitar hüi ilaxle she ajong ang asun. Ifüima chixe Jisu wangshembu tamchu zomnubuchu wüi womle nyak ilaxle she chixe hwom ang ozün ma achatle kox. 42Ija zangwün Chopa nok pangnue atat üntoxle khünakbue Jowanpa to ong. 43Pitar Chopa ma müikhwon mwot mokkya mixsün Simon le amünkya füi tomle obibi nyix hex nui.

Currently Selected:

WANGSHEMBU MWOT 9: WANCBSI

Highlight

Copy