WANGSHEMBU MWOT 6

Wangshembu to Fong ang Mixsün Anüt Kam

1Ifüima aluile chingo homle, Jisu man tokyabu sütsa-sütsale tsale hüikoxle, Grik kax ma wünkya Jehudi khünak mixwün nguikyabu hia Jerusalem ma ngokya Jehudi khünakbu bama hyet lai. Grik kax ma wünkya Jehudi khünakbu thome, nyixfole ahankya hwom süntom ngun, hwom kha angkya zomnubu ang chifakya bama hwom e-ma chilaxkya kax ngai. 2Ikoxle wangshembu bün anyie Jisu wangshembu othom pangnu wüi tomle se ilaxle thüi: “Ngun-syen paktik üima kwome Zang kax apuk angkya to mong chikoxle tox angkya olom münchang. 3Idaile tüi-hi-naohom, Otsao Chasa hia hwon-je e awangle tüile le atsingshokya mix hünzomkha angkya mixsün anüt zünlax, ilaxle kwome hwom ija ngun-syen twon angkya mwot to süt ang tomüi. 4Kwome a zangjop hia hwom-ano angkya mwot to kwom hanpak komle faüi.”

5Wangshembue ija kax wünle alaikya khoma noknusa wüi mongmüi; idaile hwome mongong ma zukya tamchu Otsao Chasae awangkya Stefen kam, üntoxle Filip, Prokoras, Nikonor, Timon, Parmenas, ilaxle Jehudi zanglom laxkya Antiok nok Nikula, hwom bibi kam. 6Noke ibu wangshembu hato apüi, üntoxle hwome ibu to khangkho ma chak danle zangjople kox.

7Idaile Zang kax a thuithui le apukle atsat. Jisu man tokyabu Jerusalem ma sütsa-sütsale tsale, üntoxle nguapabu kha angkyachu Kaxho Müikya pongle kopmix huanuma lai.

Stefen Kopkya

8Stefen, Zange okhonguile mohimankya üntoxle chasa zong chongkya füikya mixsün tuita changkya. Chixe khünaknu khato khomtsikya hia ohünotün mwotbu mokle aho. 9Ikoxle züizüi chix füi apüi ang süt; hwom a da ang ngokya dandaokyabu sinagok ma mün tüikyabu changkya (hwome nyakkya ningle), ilaxle ikhama Sirini hia Alekjendria tokya Jehudi khünakbuchu wüi tüikya. Hwom bomachu Silisia hia Asia tokya mama Jehudi khünakbue Stefen füi kax ma alat ang süt. 10Ikoxlechu Chasae Stefen ang hwon-je huanuma koxkoxle chixe zangwünkya zuma hwome chix ang chisu khato le aza ang chitho. 11Idaile hwome khünak züita shak ilaxle Stefen-e Mosa hia Zang nyi ang omale thüikya hwome atatpu le akax ang tom. 12Ija ningle hwome khünaknu hia mixpa tüichongbu, ilaxlechu wanlom nwotmixbu to lüixle mwop ang tom. Hwom Stefen hato hüi ilaxle kop, ilaxle hwome thwomshing le nguawangbu hato pao. 13Stefen khohang le akax angkya khünakbuchu wüi hwome laxlax le ngui. Hwome thüi: “Ija mixsüne ojento kem Zangshwom Hom hia Mosa Wanlom mo amale wünle. 14Ija Jisu-e Zangshwom-Hom pünle ama üntoxle Mosa makhange to le hüikya bangkya kem pupa zomzang lüiüi le chixe akaxkya kwome atatle!” 15Nguawangbu tusox ma ngokya khünakbue Stefen to athangle hu ilaxle hwome chix thünza kaxtaimix thünza ningle ngün.

Currently Selected:

WANGSHEMBU MWOT 6: WANCBSI

Highlight

Copy