ZEKARIA 4
4
Tsünpung-zopung Michih
1I ki asukachihbuh yunirünü kheaküshe arü, tüsho khürü ayapkhi chingnü yihmusukhi nangde I yihmusu. 2Apinü I ki tha, “ Nünü tümü ngücho?” Tüsho inü alo, “ Inü sunanü athsükhi khülang, aku kheak phurusük kihbah ngüchoh; ju kheak tsünpung thüne lah, tsünpung aban aku kheak hühpung kihlah. 3Tüsho ju ki oliv sangdung mahne lah, khülang ju phurusük tsülim peang tüsho püpü ju huzulim lah.” 4Inü I ki asukachihbuh yunirü ki tha, “ I tungpuh, harü ha tümü a?” 5Judüki I ki asukachihbuh yunirünü I ki keo, “Harü tümüanü nünü mümükheah de?” Inü alo, “ I tungpuh, mümükheah.” 6Apinü I ki tha, “Ha Zerubbabel ki Atungpuh yu lah: ‘ Sühmühnü yung yungsho wunü yung, tüshe me hode lah,’ Wuto Atungpuhnü thachoh. 7Nü she a, O müzüng ato? Zerubbabel miki nü adükhün kambah; tüsho nünü amükham-lung yukchoki mihtsürübonü azhibah, ‘ Akhamlah, akhamlah!’ ”
8Kheaküshe Atungpuh yu I ki thade arü, 9“Zerubbabel khahbonü ha yam khimtan thsüdo; api khahbonü ju she athsükhibah. Judüki Wuto Atungpuhnü I nüsa kilim thiyikheah de nüsanü amükheahbah. 10Tümüde sherünü anükhüh lang arhimokhi nimung mükhemükimkheanü asühachihbah, tüsho Zerubbabel khah ching akeara-liu ngübah.
“Harü thüne ha alomi athrünkhi ngükhi Atungpuh mükbo lah.” 11Judüki inü api ki tha, “Harü oliv sangdung mahne tsünpung-zopung tsülim tüsho huzulim lakhi ha tümü a?” 12Tüsho mahne kipü inü api ki tha, “Suna hühpung mahne chingnü abukkhitkhi müdangke, oliv sangdung khah mahne ha tümü a?” 13Apinü I ki keo, “Harü tümüanü nünü mümükheah de?” Inü alo, “ I tungpuh, mümükheah.” 14Jushu apinü tha, “Hane ha alomi athrünkhi Tungpuh ki zhiprü mujude-mokhitkhi ah.”
Currently Selected:
ZEKARIA 4: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
