ZEKARIA 2
2
Akebe-liu Michih
1Inü abinkih-a kheah tüsho mihtsürü khülang akhah ching akebe-liu shuhbah ngü. 2Inü keokhi, “ Nü külim yücho?” Apinü I ki alo, “Jirusalem akepü, atolim tüsho ayunglim kheahpü.” 3Judüki I ki asukachihbuh yunirü ju tsoabah, tüsho püpü yunirü api shorupü arü, 4tüsho api ki tha, “Alihang, ju athrününgtsüng mihtsürü ki thaang: Jirusalem ju mihtsürü tüsho shiwüh hihkhinü chipi mayündoride alabah. 5Tümüde ju alala mükamde I ju mo chipi labah, Atungpuhnü thachoh, tüsho ju ching I müretahkhi labah.”
Ramtsorü Thüyam lim Arüpü Jikhi
6Wusuang, Wusuang! Dukulim lomi chingnü tsoang, Atungpuhnü thachoh; tümüde thüning lim pung phüyi nangde inü khiungke lim nüsa hiumüzütshih, Atungpuhnü thachoh. 7Wusuang! Nüsa Babilon ching larübo, Zion lim tsoang. 8Sherünü nüsa shikchonü I ki khide shoto lakhi shikchoh. Jumonü api mihtsürü yankhia lurü trükshihbo thsungkheak ha yusheak hanbah I arüshih: 9Kheakü kheahang, inü arü azhihde I khah shuhkihbah, tüsho arübo ju arü nihbuh azhorübonü yankhia lupü kambah. Judüki Wuto Atungpuhnü thiyido de nüsanü mükheahbah. 10Khün thsüang tüsho asühachihang, O Zion! Tümüde kheahang, I arübah tüsho nüsa bolung labah, Atungpuhnü thachoh. 11Trükshih ahihdonü ju nimung Atungpuh lung bebah, tüsho I mihtsürü thsübah; tüsho I nüsa bolung labah. Tüsho Wuto Atungpuhnü I nüsa kilim thiyido de nüsanü mükheahbah. 12Atungpuhnü Juda ju amüsüh lomi ching api shihcham thsüde yamrüplurüp lubah, tüsho Jirusalem mokhitlobah.
13Mihtsürü alala Atungpuh miki zhikde laang; tümüde api amüsüh lapung chingnü api arüchoh.
Currently Selected:
ZEKARIA 2: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
