ROM 14

Nü Keoniorü Yudükhap

1 # Kol 2.16 Akin ching reangmüzahkhi mihtsürü leangkhiang, tüshe lümkhi atsangachihpü thsungkheak yung. 2Khürü a tümütümü she atsühpü akin lah, tüshe akin ching reangmüzahkhi mihtsürünü wokephüyak lang tsühchoh. 3Shepünü tsühchonü amütsühbuh mükhemükim düthsü, tüsho shepünü mütsühnü atsühbuh kheak mahkhap düla; tümüde Thrünpuhnü api leangkhido. 4Khürü yamlarü mahkhappü nü she a? Anihbuh putungrü ki api zhipchoh yungsho lungchoh. Tüsho api bemusubah, tümüde aputungrünü api zhipshihpü kuklah.

5Mihtsürü khülangnü nimung khülang ju püpü nimungbo kheaknü adungto, püpürünü nimungbo alala rukhüh ah de lümchoh. Mihbüm abannü nihbuh lümkhi adüngakhi labeah. 6Shepünü nimung leangkhichonü, Atungpuh wüntrekhi chingnü leangkhichoh. Shepünü tsühchonü Atungpuh wüntrekhi chingnü tsühchoh, tümütüsho apinü Thrünpuh kilim makshe jihchoh; shepünü mütsühnü Atungpuh wüntrekhi chingnü mütsühchoh tüsho Thrünpuh kilim makshe jihchoh. 7Isa shenü she nihbuh thsungkheak lang mülachoh tüsho isa shenü she nihbuh thsungkheak lang müshechoh. 8Isa lasho, isa Atungpuh thsungkheak lachoh; tüsho isa shesho Atungpuh thsungkheak shechoh. Jumonü isa lala she yungsho sheshe she, isa ju Atungpuh yo ah. 9Tümütüsho api ju asherü tüsho arhang larü chido yo Atungpuh thsüpü thsüde Khrista she tüsho arhang kamlo.

10 # 2 Kor 5.10 Tümüde nünü nü keoniorü thiyukhapcho le? Yungsho tümüde nünü nü keoniorü khenocho le? Tümütüsho isa alala Thrünpuh thiyukhappung miki zhipbah; 11tümüde ha thrüta lah,

“I lale, Atungpuhnü thachoh,

mihbüm abannü I ki khukningbah,

mihbüm abannü I Thrünpuh ah de alokhibah.”

12Jumonü isa abannü nihbuh dünkheak Thrünpuh kilim jihbah.

Nü Keoniorü Dangakshih

13Jumonü isanü khülangnü khülang thiyumükhapnü, tüshe keoniorü limro ching küyimkishe jingmükhebe yungsho limkhudo muzopü pungkhianü. 14Tümü she amüsüh müla de Atungpuh Jisu hode inü mükheahlah; tüshe mümüsüh de alümrü thsungkheaknü ju mümüsüh. 15Nünü atsühkhinü nü keoniorü yurisho, kheaküa nü amuzho ching mütsahchoh. Nünü atsühkhi junü shepü dünkheak Khrista shekheanü api düyurishih. 16Jumonü nü tsükhi ju amütsü ah de düthashih. 17Tümüde Thrünpuh kiulongthsü ju jim tüsho ayungbe yung tüshe Amüsüh Me ching thiyuro-lungki, mungtsü tüsho asühachihkhi lah; 18shepünü hanangde Khrista tankihchonü Thrünpuh kilim aleangkhikhukbe tüsho mihtsürünü am de thachoh. 19Tümünü mungtsü thsücho tüsho bekihchonü isanü yananü. 20Tsühyungbe dünkheaknü Thrünpuh rhimo düthsümünim. Lüpdükhi amüsüh ah tüshe apinü atsühkhinü püpürü angakshihkhi ju amülim ah; 21nü keoniorü jingmükhepü thsüde shih tsühpü, yukhu yungpü yungsho, tümükhüh rhimopü dükdü yung. 22Nü akin lakhi ju nü le Thrünpuh dükeak zoang; apinü am de alümkhi ching nihbuh küdah thsüde mübahyukrü asühpü. 23Tüshe shepünü dukiuhlode tsühchonü abahyukkhi lah, tümütüsho apinü atsühkhi ju akin hode yung; tüsho lüpdükhi akin hode marükhi ju neak ah.

Currently Selected:

ROM 14: YIMCBSI

Highlight

Copy