MATHI 18

Shepü Atobe a?

(Mk 9.33-37; Lk 9.46-48)

1 # Lk 22.24 Ju kim ching jingyanrübonü arübah Jisu ki tha, “Yinmi kiulongthsü ching shepü atobe a?” 2Jisunü azürü nunu khülang api kilim jibah arü bolung zhipshih, 3#Mk 10.15; Lk 18.17tüsho tha, “Atsütsü inü nüsa ki thachoh, nüsa mulong müthribah azürü nunubo nangde mükamsho, küde thsüthsü she nüsanü yinmi kiulongthsü ching müyüzahkhuk. 4Jumonü shepünü ha azürü nunu nangde nihbuh azhihayihde kamchonü yinmi kiulongthsü ching atobe ah. 5Tüsho shepünü I mung chingnü ha azürü nunu khülang leangkhichonü I leangkhichoh.

Neak Yihbeakpü Rükaki

(Mk 9.42-48; Lk 17.1-2)

6“Tüshe shepünü I kheak kinrü harü azürü nunu bolung khülang neak yihbeakshihbanü, api hung ching hizübe-lung khülang chingkihbah keto asük ching yüzahkhi atsübe labah. 7Mihtsürü neak yihbeakshihbe lakhi dünkheaknü alomiküp are! Hadürü adünjibah, tüshe shepü hode ha akhiukshihbanü are!

8 # Mt 5.30 “Nü khah yungsho nü jingnü neak yihbeakshihsho, ju lipkhia bahang. Khah mahne tüsho jing mahne kihbah akheam müla motru ching jipyukpü dün a nü thsungkheaknü khah khülang yungsho jing khülang mabande rhangdung lapung ching yüzahkhi atsübe ah. 9#Mt 5.29Tüsho nü müknü nü neak yihbeakshihsho, nü kheaknü ju khünkhita bahang. Mük mahne kihbah thsümüchi motru ching jipyukpü dün a nü thsungkheaknü mük khülang kihbah rhangdung lapung ching yüzahkhi atsübe ah.

Adükheakkhi Namfimihnu Shihdanglimyu

(Lk 15.3-7)

10 # Lk 19.10 “Harü anini bolung khülang she mükhemükim müthsüpü kümkangang, tümüde inü nüsa ki thachoh, yinmi ching arü yunirübonü yinmi ching labuh I Buh miro kamruhroro kheahde lah. 11(Tümütüsho Mihtsürü Tsührü ju adükheakkhi khümkhitpü arü.) 12Nüsanü tümü lümcho? Mihtsürü khülang namfimihnu 100 labah arü bolung 1 dükheaksho, apinü 99 ju zojihbah adükheakkhi 1 yimde müzüngbo lim müyücho de? 13Inü nüsa ki atsütsü thachoh, apinü ju ngüsho müdükheakkhi 99 kheaknü ju namfimihnu kurungkheak alü asühachihchoh. 14Junangde harü anini bolung khülang she adükheakpü thsüde yinmi ching labuh nüsa Abuhnü mümulong.

Neak Yihbeakkhi Keoniorü

15 # Lk 17.3 “Nü keoniorünü nü azhihde neak yihbeaksho, yüang tüsho nüke dükeak api mülimkhi api ki thaang. Apinü nü yu anisho nünü nü keoniorü khümkhitdo. 16Tüshe apinü manisho, nü lung püpürü khülang yungsho mahne beang, junangde mahne yungsho mahsam thiyumütsan hode lüpdükhi mütsanmükhibah. 17Apinü arü yu manisho, borü ki thaang; tüsho apinü borü yu she manisho nüsanü api ju amükinrü yungsho ruk-threrü nangde khejang.

Mümülüjihkhi tüsho Mülüjihkhi

18 # Mt 16.19; Jhn 20.23 “Inü nüsa ki atsütsü thachoh, nüsanü tümüpürü alomi kheak rhükbanü yinmi ching rhükbah, tüsho nüsanü tümüpürü alomi kheak trünbanü yinmi ching trünbah.

19“Kheaküshe inü nüsa ki thachoh, arünü tümükhüh keokhikhi dünkheak alomi kheak nüke mahne arihsho, yinmi ching labuh I Buhnü arü thsungkheak rhimojihbah. 20Tümütüsho küching I mung chingnü mahne yungsho mahsam mukhunga lanü, arü bolung I lah.”

Neak Mübahjihkhi Yamlarü Shihdanglimyu

21 # Lk 17.3,4 Judüki Peter arü tüsho api ki tha, “Atungpuh, I keoniorünü I azhihde neak yihbeaksho inü api neak küdükhüh ki bahjihba? Thüne ki khiungde a shi?” 22Jisunü alo, “Thüne ki khiungde de inü nü ki müthanü, tüshe nerünü thüne ki khiungde.

23“Jumonü yinmi kiulongthsü ju kiulongthsürü khürünü api yamlarübo lung mütsanmükühkhi kiphahlah. 24Tüsho küyimki apinü mütsanmükühpü tankihkhea, api ki talent#khahngak 3,40,000 10,000 shozüng lakhi khürü bedarü. 25Tüshe apinü müshakkhukkhinü, anihbuh putungrünü shozüng shakpü thsüde api lung aniube le atsührübo tüsho api lakhi alala yinpü thiyukhüm jih. 26Jumonü yamlarünü api miki mükhümde tha, ‘Aputungrü, I ki arümkheamjang, tüsho inü nü alala shakbah.’ 27Judüki yamlarü putungrünü muzhode lümbah shozüng bahjih tüsho api dükhe.

28“Tüshe yamlabuh junü wukhiuk tüsho api adholi 100 shozüng lakhi rukhüh yamlarü bolung shoru; apinü zünga lubah athrukeang kheak thünitde tha, ‘Nünü I züngkhi shakang!’ 29Jumonü rukhüh yamlabuhnü ajing ki mükhümbah mushude tha, ‘I ki arümkheamjang tüsho inü nü alala shakbah.’ 30Apinü mani tüshe yübah shozüng müshakyi khiungde rihyam ching zo. 31Jumonü rukhüh yamlarübonü ju rhimokhi ngüchoki khide mulong rozhak, tüsho yübah adünjikhi alala arü putungrü ki thaa huh. 32Judüki api putungrünü anihbuh jibah tha, ‘Nü mihbukmuyuk yamlarü! Nünü I ki mushumonü nü shozüng alala bahjihkheah. 33Inü nü ki muzhokhi nangde, nünü she rukhüh yamlarü ki amuzho mülabea de?’ 34Api putungrünü bukakhiuk, tüsho api shozüng alala müshakyi khiungde athsümüchirü kilim jih. 35Junangde nüsanü nüsa mulong chingnü nüsa keoniorü neak mübahjihsho, yinmi ching labuh I Buhnü nüsa mihbüm aban ki rhimobah.”

Currently Selected:

MATHI 18: YIMCBSI

Highlight

Copy