LUK 15

Adükheakkhi Namfimihnu

(Mt 18.12-14)

1 # Lk 5.29,30 Judüki ruk-threrü tüsho aneakrübo alala api ki anipü thüninde arü. 2Tüsho Pharisirü le yakzan thsangyurübonü neangneangde tha, “Ha mihtsürünü aneakrübo leangkhichoh tüsho arü lung yimtsühchoh.”

3Jumonü apinü arü ki shihdanglimyu ha tha: 4“Nüsa bolung namfimihnu 100 labah 1 dükheaksho, mütüm ching 99 zojihbah amüngüyi khiungde adükheakkhi yimde müyükhi mihtsürü shepü la? 5Tüsho küyimki apinü ju yimkhitbanü asühde adubuh kheak yihkihchoh. 6Küyimki thüyam lim arübanü, apinü müyamrübo le yamhingrü jimukhungde arü ki thachoh, ‘I lung asühang, tümüde adükheakkhi namfimihnu inü ngüdo!’ 7Inü nüsa ki thachoh, junangde mulong müthripü yihnüpü mülakhi thiyuro-lungki mihtsürü 99 kheaknü aneakrü mulong müthrikhi 1 kurungkheak yinmi ching alü asühachihkhi labah.

Adükheakkhi Shonak

8“Yungsho aliberü shepünü shotoyinchi nak 10 labah shonak 1 dükheaksho, tsün takkihbah müngüyi khiungde thüyam phütde düshihde mükheahcho? 9Tüsho küyimki alibenü ju ngübanü anihbenü müyamrübo le yamhingrü jimukhungde thachoh, ‘I lung asühang, tümüde adükheakkhi shonak inü ngüdo!’ 10Inü nüsa ki thachoh, junangde Thrünpuh yunirü miki mulong müthrikhi aneakrü khülang kurungkheak asühachihkhi lah.”

Adükheakkhi Tsührü

11Judüki apinü tha: “Mihtsürü khülang tsührü 2 lakheah. 12Tüsho akheambuhnü abuh ki tha, ‘Abuh, I shihcham kukrukbo I kilim jihang.’ Jumonü apinü ane kilim lakhit chamjih. 13Nimung anükhüh dunglim, akheambuhnü api lakhi alala hanmukhungbah limshu lomi ching hantsahde yü tüsho api lakhit phinphurukabah. 14Tüshe küyimki apinü alala bahkhamkhea, ju lomi ching khümzung arü, tüsho api mükheakde akampü tankih. 15Judüki apinü ju lomi ching mihkhungrü khülang ki mubuhde yü, tüsho apinü anihbuh ju kheaknu yimkippü yüshih. 16Apinü kheaknunü tsühde alakhi bineangbo tsühnede lüm, tüshe shenü she api kilim tümü müjih. 17Tüshe küyimki apinü aküdah thsüde alümkhitkhea, apinü tha, ‘I buh ki mulomüthsürübo arü tsühpü kheaknü alü lah, tüshe I a akhümnü shechoh! 18Inü tsahmusubah I buh ki yübah, tüsho api ki thabah, “Abuh, inü yinmi azhihde tüsho nü miki neak yihbeakdo, 19tüsho kheaküa I nü tsührü de ajipü müthülün, I ju amulokhi nü yamlarübo nangde kamshang.”’ 20Tüsho apinü tsahmusubah abuh kilim arü. Tüshe api limshu ching tsahchokinü, abuhnü api ngübah muzhode lüm, tüsho alihde yübah ahung kheak kap tüsho api müthsüp. 21Tüsho atsührünü api ki tha, ‘Abuh, inü yinmi azhihde tüsho nü miki neak yihbeakdo, tüsho I kheaküa nü tsührü de ajipü müthülün.’ 22Tüshe abuhnü yamlarübo ki tha, ‘Nahnah shulünkhim atsübe lude akhiukbah api kheak phuyujang, akhah ching khahrih yukjang tüsho ajing ching jingkhümpü yukjang. 23Tüsho moshi nunu ashih-kihkhi lude arübah laksahang, tüsho isanü tsühde asühachihanü; 24tümüde I tsührü ha shea lakheah tüshe kheakü arhang lalolah; api dükheaka lakheah tüshe ngüdo.’ Tüsho arünü asühachihpü tankih.

25“Kheakü akhiung ju thulu ching lakheah. Tüsho api alungbah thüyam phünide alachoki, khün tüsho atsünkhi düsheak so. 26Jumonü apinü yamlarü bolung khülang ji tüsho harübo dünkheak keokhi. 27Tüsho apinü anihbuh ki tha, ‘Nü niurü arüa lah, tüsho apinü anihbuh tsüde ashorukhi hode, nü buhnü ashih-kihkhi moshi nunu laksahdo.’ 28Tüshe apinü bukakhiuk, tüsho müyüzah. Jumonü abuhnü akhiukbah api ki mushu. 29Jumonü apinü abuh ki tha, ‘Kheahang, kam ahihdo inü nü tankihde arüdo; küyimkishe inü nü yukhüm mülakmih; tüshe nünü küyimkishe I kilim I müyamrü lung asühachihpü thsüde mihnu nunu müjih. 30Tüshe yüliyürade nü lakhit phinphurukkhi nü tsührü ha arü müleangnü, nünü api thsungkheak ashih-kihkhi moshi nunu laksahdo.’ 31Tüsho apinü anihbuh ki tha, ‘I tsah-a, nü a I lung kamruhroro lah, tüsho I lakhi alala nü yo ah. 32Isanü asühachihpü tüsho asühpü alungki lah, tümüde nü niurü shea lakheah tüshe kheakü arhang lah, tüsho dükheaka lakheah tüshe ngüdo.’ ”

Currently Selected:

LUK 15: YIMCBSI

Highlight

Copy