LUK 14

Jisunü Tukthsürü Thsüngukhi

1Küyimki Amuni Jisunü Pharisi yakzanshuhrü yam ching tsühyungpü yükhea, api ju tsüde kheahyukde alakheah. 2Tüsho ju ching api miki bümzübümdokhi mihtsürü khülang lakheah. 3Tüsho Jisunü mahkhaprü le Pharisirü ki alojihde tha, “Amuni thsüngupü yakzan la shi?” 4Tüshe arünü zhikde la. Tüsho apinü anihbuh bea lubah thsüngujih tüsho api tsoshih. 5#Mt 12.11Judüki apinü arü ki tha, “Nüsa shepünü donki yungsho moshipung alokhün ching keamyukbah Amuni nahde muthokhitde alaba?” 6Tüsho arünü harü dünkheak api yu malokhuk.

Azhihayih tüsho Hanrü-beyuknekhi

7Jumonü küyimki arünü atsübe dangpung mokhitkhi ngükhea, jiyuka larü ki apinü shihdanglimyu khülang tha: 8“Küyimki khürünü arhangrü thünio ching nü jiyukbanü, atsübe binkiu ching dübin, jude yungsho nü kheaknü alü wüntre jihrü khülang apinü jiyuka labah; 9tüsho nü le api jiyukbuhnü arübah nü ki thabah, ‘Ha mihtsürü kilim binkiu jihang,’ tüsho nü achih ngüde abobe binkiu lubah. 10Tüshe küyimki nü jiyukbanü yüang tüsho abobe binkiu ching binang, junangde küyimki nü jiyukbuh arübanü nü ki thabah, ‘Müyambuh, achangbe ching yükihang,’ judüki nü lung dükhüm ki binrü miki nü müretah labah. 11#Mt 23.12; Lk 18.14Tümütüsho shepü küdah thsüde shuhkihchonü abobe kambah, tüsho shepünü azhihayihchonü ashuhkihbah.”

12Judüki Jisunü api jiyukbuh ki tha, “Küyimki nünü yapsu-jim yungsho are-jim tsühpü jiyukbanü, nü müyamrübo, nü keoniorübo, betsührübo yungsho yamhingrü alarübo düjiyuk, jude thsüsho arünü nü jiyukbah tüsho ashaklobah. 13Tüshe küyimki nünü thünio thsakhambanü, zhochihrü, mütsümüyangrü, jingkikrü, müktukrü jiyukang. 14Tüsho nü müngühmühi labah, tümütüsho arünü nü müshaklokhuk; tümüde thiyuro-lungkirü arhang kamlochoki nü shaklobah.”

Thünio Ato Shihdanglimyu

(Mt 22.1-10)

15Küyimki api lung dükhüm ki binrü bolung khülangnü harü sokheanü api ki tha, “Shepünü Thrünpuh kiulongthsü ching yikhap tsühbanü müngühmühi!” 16Judüki apinü anihbuh ki tha, “Mihtsürü khülangnü thünio ato thsakham tüsho ahihkhüh jiyuk. 17Thünio kim ching apinü ajiyukrü ki thashihpü yamlarü yüshih, ‘Arang, lüpdükhi thsakhama lah.’ 18Tüshe arü alalanü rukhühnü mudomürapü tankih. Akhuhbuhnü api ki tha, ‘I thulu thulodo, tüsho I yübah ju kheahbah. Muzhobah I ki neak bahjang.’ 19Tüsho püpürünü tha, ‘I moshipung dudu 5 thulodo. Arü rhimoakheahshihpü I yüchoh. Muzhobah neak bahjang.’ 20Kheaküshe püpürünü tha, ‘I niube ludo, jumonü I marükhuk.’ 21Jumonü yamlarü junü arübah api putungrü ki harü yusheak jih. Judüki thüyam putungrünü bukakhiukde api yamlarü ki tha, ‘Kiuto yo kiudunglimrobo tüsho limrobo ching nahde yüang tüsho zhochihrü, mütsümüyangrü, jingkikrü tüsho müktukrü bede arang.’ 22Tüsho yamlarünü tha, ‘Atungrü, nünü thiyukhüm jihkhi nangde rhimodo, tüsho kheaküshe binpung lah.’ 23Judüki aputungrünü yamlarü ki tha, ‘Lomi limtobo tüsho limrobo ching yübah arübo yana arüshang, junangde I yam mide akambah. 24Tümüde inü nü ki thachoh, inü ajiyukrü shenü she I jimpung mütsühake.’ ”

Jingyanrü Thsükhi Adün-amo

(Mt 10.37-38)

25Yimto atonü api dunglim yü. Tüsho apinü rholobah arü ki tha, 26#Mt 10.37“Khürünü I dunglim arübah abuh, abe, aniube, atsührübo, khiungmungrü le chiniurü, tüsho nihbuh rhangdung she müthraneansho, api I jingyanrü thsüpü müthülün. 27#Mt 10.38; 16.24; Mk 8.34; Lk 9.23Tüsho shepünü nihbuh sangkim hanbah I dunglim marübanü I jingyanrü müthsükhuk. 28Nüsa khürünü rünchang thsüpü lümkhi thsüsho, akhuhde apinü ju rhimo banpü api sho suhdahla shi yungnü akheahpü binbah adün-amo rhimokhitchoh. 29Jude yungsho apinü khimtan thsü dunglim, ju mübansho, ju ngürü alalanü api münejihpü tankihchoh. 30Arünü athabah, ‘Ha mihtsürünü athsüpü tankihdo tüshe müban.’ 31Yungsho kiulongthsürü khülangnü api azhihde 20,000 bebah arükhi, apinü mihtsürü 10,000nü bebah thirithsüpü kukla shi mukuknü akhuhde binbah lümamükheahcho de? 32Apinü mukuksho, püpürü ju limshu ching lachoki limburü yüshihbah tüsho mungtsü dünkheak keokhibah. 33Ju kiphahde, shepünü nihbuh lakhi alala mübahyuknü I jingyanrü müthsükhuk.

Thimi Mükekhi

(Mt 5.13; Mk 9.50)

34“Thimi ju tsülah; tüshe thimi ching akebe dükheaksho, ju küde akeshihba? 35Ha alo yungsho alomüdang thsungkheak yihnüpü müla, tüshe mihtsürübonü ju jipa bahchoh. Shepü anipü nükhün kihlanü apinü anishang!”

Currently Selected:

LUK 14: YIMCBSI

Highlight

Copy