JOHAN 6

Chithürü Phüngü Yimkipkhi

(Mt 14.13-21; Mk 6.30-44; Lk 9.10-17)

1Ju dunglim Jisunü Galilee keto (yungsho Tiberia keto) hode yü. 2Judüki yimto ato khülangnü api dunglim yan, tümütüsho apinü tukthsürü kheak khinthiyinbebo rhimokhi arünü ngü. 3Tüsho Jisunü awung kheak yükih, tüsho api jingyanrübo lung bin. 4Kheakü Jihudarü phungho-thünio, thüninde alakheah. 5Judüki Jisunü yimto ato api kilim arükhi abina ngübah Philip ki tha, “Harü tsühpü isanü yikhap küchingnü athuloba?” 6Tüshe apinü anihbuh rükakide athakheah, tümüde apinü tümü rhimobanü mükheahbah alakheah. 7Philipnü api ki alo, “Shotoyinchi nak 200nü athulokhi yikhapnü arü anini abanpü suhdahbah.” 8Api jingyanrü bolung khülang, Simon Peter niurü Andrianü api ki tha, 9“Ha lim azürü khülangnü Barli yikhap 5 tüsho thüngüh 2 de lah, tüshe junü hadükhüh külungki athsangpü?” 10Judüki Jisunü tha, “Mihtsürübo binshang.” Ju dangpung ching rimkiu hihde alakheah. Jumonü mihtsürübo akhekhi 5000 bande bin. 11Jisunü yikhapbo ju lu tüsho makshe jihbah jingyanrübo kilim chama jih, tüsho jingyanrübonü bina larü kilim ahiuh; tüsho apinü thüngüh she junangde thsü. 12Küyimki arü bukthsükhea, apinü ajingyanrübo ki tha, “Adütre aningkhibo mübahde hanmukhungang.” 13Jumonü arünü atsüh aning barli yikhap 5 chingnü adütre muluk 12 mide hanmukhung. 14Judüki Jisunü khinthiyinbe rhimochoki ngürü mihtsürübonü tha, “Tsükjide ha alomi ching arüpü lakhi wukihrü ah.” 15Jumonü küyimki arünü api muhde bea lubah kiulongthsürü kamshihpü Jisunü amükheahkhea, apinü alangzü awung lim yülo.

Jisunü Kemi kheak Tsahkhi

(Mt 14.22-33; Mk 6.45-52)

16Küyimki arelim kamkhea, api jingyanrübonü keto lim yükibah 17sangkung ching yüzah, tüsho Kapernaum lim keto hode yü. Judüchoki mitingde alakheah, tüsho Jisunü arü kilim marü. 18Judüki apung tode ayünkhinü ke müküpde kam. 19Jumonü küyimki arünü mail 3 yungsho 4 bekhea, arünü Jisu ju kemi kheaknü tsahde sangkung thüninde arükhi ngü; tüsho arü trede alakheah. 20Tüshe apinü arü ki tha, “I a le dütre.” 21Judüki arünü api ju asühde sangkung ching beyukpü kün, tüsho nahdü lang sangkung ju arü yülim kemungyean khiung.

Mihtsürübonü Jisu Yimkhi

22Ashidopü keto thripkhüh lakhi botonü ju ching sangkung khülang labah Jisunü ajingyanrü lung müyüzahde arü zangrü yüde ngü. 23Judüalalashe, Atungpuhnü makshe jihbah arünü yikhap tsühkhi dangpung phüni Tiberia chingnü sangkung püpübo arü. 24Küyimki mihtsürübonü Jisu le ajingyanrübo ju ching mülakhi ngükhea, arünü sangkungbo ching yüzah tüsho Jisu yimde Kapernaum lim arü.

Jisu ju Rhangdung Tsühyungbe

25Tüsho arünü api keto thripkhüh ngübah tha, “Rabbi, nü ha ching küyimki arükhea?” 26Jisunü arü ki alo tüsho tha, “Atsütsü inü nüsa ki thachoh, nüsanü khinthiyinbebo ngümonü I yimchoh yung, tüshe yikhapbo tsühbah bukthsümonü ah. 27Adükheakpü lakhi tsühyungbe thsungkheak yung, tüshe Mihtsürü Tsührünü nüsa jihpü lakhi akheam müla rhangdung rünkhiungpü tsühyungbe thsungkheak rhimoang, tümütüsho Abuh Thrünpuhnü api kheak anihbuh amütsan yümkih-a lah.” 28Judüki arünü api ki tha, “Isanü Thrünpuh rhimobo thsüpü thsüde tümü rhimoba?” 29Jisunü alo tüsho arü ki tha, “Apinü athiyibuh kheak nüsanü akinpü ju Thrünpuh rhimo ah.” 30Jumonü arünü api ki tha, “Isanü ngübah nü kinpü thsüde nünü khinthiyinbe tümü rhimoba? Nünü tümü rhimoba? 31Isa jipürünü sunglo ching manna tsüh; ha thrüta lakhi nangde, ‘Apinü yinmi chingnü arü kilim atsühpü yikhap jih.’” 32Judüki Jisunü arü ki tha, “Atsütsü inü nüsa ki thachoh, Mosanü yinmi chingnü nüsa kilim yikhap jihkhi yung, tüshe I Buhnü yinmi chingnü thiyuro yikhap nüsa kilim jihchoh. 33Tümüde Thrünpuhnü ajihkhi yikhap ju yinmi chingnü akichoh tüsho alomi ching rhangdung jihchoh.” 34Judüki arünü api ki tha, “Atungpuh, kamruhroro ha yikhap isa kilim jihang.”

35Tüsho Jisunü arü ki tha, “I rhangdung tsühyungbe ah. Shepü I kilim arüchonü küyimkishe mükhüm, tüsho shepünü I kheak kinchonü küyimkishe kemüthüri. 36Tüshe nüsanü I ngübah mükin de inü nüsa ki thachoh. 37I Buhnü I jihkhi alala I kilim arübah, tüsho shepü I kilim arüchonü inü küyimkishe müyankhit. 38Tümüde I lümkhi yungde I thiyibuh lümkhi rhimopü I yinmi chingnü akikheah. 39Ha I thiyibuh Abuh lümkhi ah, junangde apinü I jihkhi alala tümü she müdükheak tüshe akheam nimung ching arhang kamlobah. 40Tüsho ha I thiyibuh lümkhi ah, junangde atsührü ngübah api kheak kinrü aban akheam müla rhangdung labah; tüsho inü akheam nimung ching api arhang kamloshihbah.”

41Jihudarünü neangneangde api azhih, tümütüsho apinü tha, “I ju yinmi chingnü akikhi tsühyungbe ah.” 42Tüsho arünü tha, “Ha isanü abuh tüsho abe mükheahkhi Josep tsührü Jisu yung de? Apinü küde thsah, ‘I yinmi chingnü akikheah’ de thacho?” 43Jumonü Jisunü arü ki alo tüsho tha, “Nüsa bolung datsangachih. 44I thiyikhi I Buhnü bede marüsho shenü she I kilim marükhuk; tüsho akheam nimung ching inü api arhang kamloshihbah. 45Ha wukihrübonü thrüta lah, ‘Tüsho arü alala Thrünpuhnü thsangyubah.’ Jumonü Abuh kilimnü asorü tüsho anikhitrü abannü I kilim arüchoh. 46Shepü Thrünpuh kilimnü lanü apinü yungsho shenü she Abuh müngü; apinü Abuh ngüdo. 47Atsütsü inü nüsa ki thachoh, shepünü I kheak kinchonü akheam müla rhangdung lah. 48I rhangdung tsühyungbe ah. 49Nüsa jipürübo sunglo ching manna tsüh, tüsho shedo. 50Ha yinmi chingnü akikhi yikhap, junangde khürünü ju tsühbah tüsho müshe. 51I ju yinmi chingnü akikhi rhangdung tsühyungbe. Khürünü ha tsühyungbe tsühsho api lünnü alabah, tüsho inü alomi rhangdung thsungkheak jihpü lakhi yikhap ju I shih.”

52Jumonü Jihudarübonü arü bolung arhungangümde tha, “Küde thsah ha mihtsürünü isa kilim api shih tsühpü jihpü?” 53Judüki Jisunü arü ki tha, “Atsütsü inü nüsa ki thachoh, nüsanü Mihtsürü Tsührü shih mütsühsho tüsho api thiyih muyungsho, nüsa kheak nüsa rhangdung müla. 54Shepünü I shih tsühcho tüsho I thiyih yungchonü lünnü rhangdung labah, tüsho akheam nimung inü api arhang kamshihbah. 55Tümüde I shih ju jim tsütsü tüsho I thiyih ju ayungbe tsütsü ah. 56Shepünü I shih tsühcho tüsho I thiyih yungchonü I lung lachoh, tüsho l api lung lachoh. 57Arhang labuh I Buhnü I thiyikhi nangde tüsho Abuh hode I lakhi nangde, shepünü I tsühyungbanü I dünkheaknü alabah. 58Nüsa jipürünü sunglo ching manna tsühbah shea lakhi ruk yungde, ha yinmi chingnü akikhi yikhap ah. Shepünü ha yikhap tsühbanü lünnü alabah.” 59Harübo apinü Kapernaum ching thsangyuchoki sinagogbo ching thakheah.

Akheam Müla Rhangdung Yubo

60Jumonü api jingyanrübo ahihkhühnü ha sochoki tha, “Ha thakhi achak ah; shenü ju anikhitkhukba?” 61Küyimki api jingyanrübonü ha dünkheak arü bolung dapdaprarakhi mükheahkhea, apinü arü ki tha, “Hanü nüsa masühde kamshihcho shi? 62Dale tüsho Mihtsürü Tsührü akhuhlim api lapung yükihde nüsanü ngükhülaa küde? 63Rhangdung jihbuh ju me lah; shih yihnüpü müla. Inü nüsa ki asukkhi yubo ju me ah, tüsho jurü rhangdung ah. 64Tüshe nüsa amükinrü khürü lah.” Tümüde atankih chingnü amükinrübo ju she a tüsho shepünü api yinatsühbanü Jisunü mükheah. 65Tüsho apinü tha, “Jumonü I Buhnü api ki mümülüjihsho shenü she I ki marükhuk de inü nüsa ki thado.” 66Ju kim chingnü api jingyanrü ahihkhühnü tsolo tüsho api lung mütsahdebah. 67Judüki Jisunü thürükheak mahne ki ju tha, “Nüsa she tsoabahpü künla de?” 68#Mt 16.16; Mk 8.29; Lk 9.20Simon Peternü api ki alo, “Atungpuh, isanü shepü ki yüpü? Nü yubo akheam müla rhangdung lah. 69Kheaküshe nü ju Thrünpuh kilimnü arükhi Amüsüh Khülang de isanü kinlah tüsho mükheahlah.” 70Jisunü arü ki alo, “Inü nüsa thürükheak mahne mokhitkhi yung de? Tütüshe nüsa bolung khülang a arimri ah!” 71Apinü Simon tsührü Juda Iskariot dünkheak asuk, tümüde thürükheak mahne bolung anihbuh yinatsühpü ju api lakheah.

Currently Selected:

JOHAN 6: YIMCBSI

Highlight

Copy