THRÜNTAN 30

1Küyimki Rachelnü Jakob kilim tsührü müzübejihkheanü anihbenü achi lungkhangde kam, tüsho Jakob ki tha, “I kilim tsührübo zübeshang, jude yungsho I ashebah!” 2Jakobnü Rachel azhihde bukakhiuk, tüsho tha, “Nü kheaknü nuyam sokeang tholobuh Thrünpuh müthri I ah düpü?” 3Judüki alibenü tha, “Ha ching I yamlabe Bilha lah, anihbe kheak müyamang, tüsho alibenü I thsung thsüde tsührü zübebah, junangde anihbe hode I tsührübo labah.” 4Jumonü alibenü ayamlabe api kilim aniube thsüpü jih, tüsho Jakobnü alibe kheak müyam. 5Bilha mübünkeangde kam tüsho Jakob kilim tsührü khülang zübejih. 6Judüki Rachelnü tha, “Thrünpuhnü I dünkheak mahkhapdo; tüsho apinü I düsheak she sodo tüsho I kilim tsührü khülang jihdo.” Jumonü alibenü api mung Dan#Mahkhap de ji. 7Tüsho Rachel yamlabe Bilha kheaküshe mübünkeangde kam tüsho Jakob kilim tsührü mahnepü zübejih. 8Rachelnü tha, “Inü I chi kheak tode shochihdo, tüsho inü kukdo.” Jumonü alibenü api mung Naphtali#Shochihkhi de ji.

9Küyimki Leanü anihbe tsührü dapkhi ngükhea, anihbenü ayamlabe Zilpa ju Jakob kilim aniube thsüpü jih. 10Tüsho Lea yamlabe Zilpanü Jakob kilim tsührü khülang zübejih. 11Leanü tha, “Kuhi atsü ah!” Jumonü alibenü api mung Gad#Kuhi de ji. 12Tüsho Lea yamlabenü Jakob kilim tsührü mahnepü zübejih. 13Leanü tha, “I asühchoh, tümüde aliberübonü I ki müngühmühi de ajibah.” Jumonü alibenü api mung Asher#Asühkhi de ji.

14Wheat yimlupü kim ching Reuben thulu lim yü tüsho mandrak#Tsührü labe wophüyak. ngü, tüsho abe Lea kilim lude alung. Judüki Rachelnü Lea ki tha, “Muzhobah nü tsührü yo mandrak anükhüh I kilim jihang.” 15Leanü alo, “Nünü I niubuh bede atsokhinü musuhdah de? Nünü I tsührü yo mandrak she aluba de?” Rachelnü tha, “Jumonü nü tsührü yo mandrak dün apinü khihre nü lung müyambah.” 16Küyimki arelim Jakob thulu chingnü alungkhea, Leanü api shorupü wukhiuk tüsho tha, “Nünü I kheak müyambeah, tümüde I tsührü mandrak dün dükde inü nü mulodo.” Tüsho apinü ju re anihbe lung müyam. 17Thrünpuhnü Lea ki anijih, tüsho alibe mübünkeangde kambah Jakob kilim tsührü aphüngüpü zübejih. 18Leanü tha, “Thrünpuhnü inü amulokhi dün jihdo, tümütüsho inü I yamlabe I niubuh kilim jih.” Jumonü alibenü api mung Issakar#Amulokhi de ji. 19Judüki Lea mübünkeangde kam tüsho Jakob kilim tsührü athurukpü zübejih. 20Tüsho Leanü tha, “Thrünpuhnü I kilim atsüdak thsambah jihdo; kheakü I yamkhünbuhnü I lung labah, tümütüsho inü api kilim tsührü 6 zübejihdo.” Jumonü alibenü api mung Zebulun#Alakhi de ji. 21Ju dunglim alibenü tsührübe khülang zübe, tüsho anihbe mung Dina de ji. 22Jushu Thrünpuhnü Rachel lümkhit, tüsho Thrünpuhnü anihbe ki anijihde nuyam khimshuhjih. 23Alibe mübünkeangde kambah tsührü khülang zübe, tüsho tha, “Thrünpuhnü I mungchih lude tsodo.” 24Jumonü alibenü api mung Josep#Apinü khiolojih. de ji tüsho tha, “Atungpuhnü I kilim tsührü püpü khiolojihbah.”

Jakobnü Laban kheak Thiyuchihchimkhi

25Rachelnü Josep zübe dunglim, Jakobnü Laban ki tha, “I yüshang, junangde inü I lomi lim yülobah. 26Inü nü tankihkhi dün I niubebo le I tsührübo I kilim jihang, tüsho I yüanü; tümüde inü nü tankihkhi nünü mükheahlah.” 27Tüsho Labannü api ki tha, “I nü miki tsüde ngüa lasho, muzhobah binloang, tümüde nü thsülimnü Atungpuhnü I müngühjihdo de akin hode inü anikhitdo.” 28Apinü tha, “I ki nü mihkhahbo thaang, tüsho inü ju jihanü.” 29Tüsho Jakobnü api ki tha, “Künangde inü nü tankihkhea, tüsho nü yo akam-shiwühbo I lung lakhi nünü mükheahlah. 30Tümüde I marüyichoki nü anikhüh lakheah, tüshe kheakü ahihkhüh kamdo; I arü shunü Atungpuhnü nü müngühjihdo. Tüsho kheakü, I yamkhün thsungkheak inü küyimki rhimoba?” 31Jumonü apinü keo, “Inü nü kilim tümü jihba?” Jakobnü alo, “Inü mihkhah dün tümü mulune. Nünü I thsungkheak ha rhimosho, inü kheaküshe nü mihnu boto yimkipde akümbah: 32Khihni I nü mihnu boto alala hode, ju chingnü amütri tüsho amütsan kihkhi namfimihnubo, tüsho namfimihnunu bolungnü amüwa alala, tüsho mihnu bolungnü aneakjik kihkhi tüsho amütribo mokhitde yüshang; tüsho harü I mihkhahbo dün labah. 33Junangde arübe kim ching nünü I mihkhah jihkhi kheahchoki I thiyuro-lungkinü amütsan jihbah: mihnu bolung mümütrikhi tüsho namfimihnunu bolung mümüwakhibo I lung laa lasho, ju ahühkhi khebah.” 34Labannü alo, “O, nünü athakhi nangde thsang.” 35Jumonü ju nimung apinü mihnu pungbo le drebo amütri tüsho aneakjik kihkhibo, amüye kihkhi aban, tüsho namfimihnunu bolung amüwabo alala mokhita api tsührübo khah ching jih. 36Jushu apinü anihbuh le Jakob dükeak nimung mahsam hantsah yü, tüsho Jakobnü aningkhi Laban mihnu botobo küm.

37Kheakü Jakobnü anihbuh thsungkheak poplar le almond tüsho Plane sangbo kheaknü akhahbo arhang ngamkhia lu tüsho aküp khuka bahbah amüye hingkhitde tsobo thsü. 38Tüsho apinü aküp khuka bahkhi tsobo ju mihnubo arübah ke yungpung arü müngüh zojih, tümütüsho shiwühbo ke yungpü arüchoki amüdungachihde alakheah. 39Junangde küyimki mihnubonü tsobo miki amüdungachihkheanü arünü panghingbo, amütribo tüsho aneakjik kihkhibo anu. 40Judüki Jakobnü namfimihnunubo büthsüde zo, tüshe aningkhi ju Laban shiwüh panghing tüsho amüwabo lim abinshih. Hanangde apinü anihbuh thsungkheak mihnu boto büthsü tüsho arübo Laban shiwüh lung müdüsah. 41Küyimki ashih-kihkhi shiwühbo amüdungachihbanü, Jakobnü tso bolung amüdungachihshihpü thsüde arü miki zojih, 42tüshe shiwühbo ju yiuhyiuh lasho, apinü ju ching muzojih. Junangde ayiuhyiuhbo Laban yo tüsho arhüngrhüngbo Jakob yo lakheah. 43Hanangde Jakob ju khide lalim tsüde kam tüsho mihnu boto ato, athrürü tüsho aliberü yamlarübo, tüsho kemelbo le donkibo lakheah.

Currently Selected:

THRÜNTAN 30: YIMCBSI

Highlight

Copy