THRÜNTAN 23
23
Sara Shekhi
1Sara rhangdung lakhi kam 127 lakheah. 2Sara Kanan lomi Kiriath-arba (ju Hebron) ching sheabah, tüsho Abrahamnü Sara thsungkheak tüzhopü tüsho mitrippü yü. 3Judüki Abrahamnü aniube shea lakhi rheang kinü wusu tüsho Hitrü ki tha, 4“I khiungkerü ah tüsho nüsa bolung tsotsahrü ah. I kilim alo khürü yinjang, junangde inü I niube kiuyuka bahanü.” 5Hitrünü Abraham ki alo, 6“Isa ki aniang, atungrü: nü isa bolung sühmüh lakhi limberü khülang ah; isa mibahpung amokhitkhi ching nü yo ashemi kiuyuka bahang. Nü yo ashemi kiuyuka bahpü thsüde isa shepü shepünü she nü kilim mibahpung asühde ajihbah.” 7Judüki Abrahamnü zhip tüsho lomi mihtsürü, Hitrü miki mükhüm, 8tüsho tha, “Nüsanü I yo ashemi kiuyuka bahshihpü mulonglasho, I thsungkheaknü nüsanü Zohar tsührü Ephron ki keojang, 9junangde apinü anihbuh lu akheam kheak lakhi Makpela lungkhün I ki yinjihbah. Nüsa bolung mibahpung thsüpü thsüde I ki adün khiukde ayinjihpü keojang.” 10Mihtsürü bolung Hitrü Ephron bina lakheah tüsho anihbuh kiuto chipiripit ki arüa lakhi Hitrü alalanü sode apinü Abraham ki alo, 11“Yung, I tungpuh, I ki aniang; inü thulu tüsho ju ching lungkhün nü kilim jihchoh, inü ju I mihtsürübo mikinü nü kilim jihchoh. Nü yo ashemi kiuyuka bahang.” 12Kheaküshe Abrahamnü lomi mihtsürü miki mükhüm, 13tüsho arünü sode Ephron ki tha, “Nünü ajihpü lasho, muzhobah I ki aniang. Inü thulu thsungkheak nü kilim sho jihbah; I kilimnü ju luang tüsho inü I yo ashemi ju ching kiuyuka bahbah.” 14Tüsho Ephronnü Abraham ki alojihde tha, 15“I tungpuh, I ki aniang; alo ju shotoyinchi nak 400 dün ah, ike dükeak tümü la? Jumonü nü yo ashemi kiuyuka bahang.” 16Abrahamnü Ephron ki ani; tüsho Hitrünü sode anihbuhnü athakhi nangde Abrahamnü shothsümolorü amünchi adünbe ayannü shotoyinchi nak 400 adüna Ephron kilim jih.
17Jumonü Mamre phüni Makpela ching Ephron lu, thulu tüsho lungkhün chido, tüsho thulu ching sangdung alala alungkinü adüngakhi thsüa, 18kiuto chipiripit ki arükhi Hitrü alala mikinü Abraham kukruk thsüpü jih. 19Ju dunglim Abrahamnü aniube Sara Kanan lomi ching Mamre müngüh (ju Hebron) Makpela ching lakhi lungkhün ching kiuyukabah. 20Junangde thulu tüsho ju ching lungkhün ju Hitrünü adüngakhi thsüa mibahpung thsüpü Abraham kilim jih.
Currently Selected:
THRÜNTAN 23: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
