THRÜNTAN 2
2
1Hanangde thüningbo le alomi tüsho ju ching lakhi alala akhik thsü. 2Thrünpuhnü rhimode arükhi nimung thüne nipü arün thsü, tüsho api rhimo alala chingnü thüne nipü sühakhim. 3Jumonü Thrünpuhnü nimung thünepü ju müngühjih tüsho tsangkhit, tümütüsho Thrünpuhnü thründe arükhi rhimo alala chingnü ha nimung apinü sühakhim.
4Ha Atungpuh Thrünpuhnü alomi tüsho thüningbo thrün nimung thrünkhi thüning tüsho alomi yukhean, 5ju alomi ching thulu sangrung tüsho thulu ching rim tümü mümukhuhyi. Tümüde Atungpuh Thrünpuhnü alomi kheak tsüng marüshih, tüsho alo wochakpü mihtsürü mülade alakheah; 6tüshe alomi chingnü shumuliu wutu tüsho alo alala pangshih. 7Tüsho Atungpuh Thrünpuhnü alo asungthulungnü mihtsürü kamshih, tüsho api nupung ching rhangdung sheak mütyukjih, tüsho mihtsürü ju rhangdung lakhi khülang kam.
Eden Shahwün
8 Atungpuh Thrünpuhnü Eden ching aniakhiuklim peang shahwün khülang thsü, tüsho ju ching apinü akamshihkhi mihtsürü lashih. 9Tüsho Atungpuh Thrünpuhnü alo chingnü tsühyungbe jaktsükhi sangdungbo mukhuhshih. Shahwün phulung ching rhangdung sangdung tüsho atsü amütsü mükheahbe sangdung she alakheah.
10Shahwün ching ke duhshihpü ayung khülang Eden chingnü bukkhitshih; tüsho ju kheaknü chamnakde ayung phüyi kamshih. 11Akhuhbe mung ju Pishon, hanü suna lakhi Havila lomi alala mükamde bukchoh. 12Suna müthsün, arhümthüneabe tüsho shotolungbo ha lomi ching lah. 13Mahnepü ju Gihon, hanü Kush lomi alala mükamde bukchoh. 14Mahsampü ju Tigri, ha Asiria aniakhiuklim bukchoh, tüsho aphüyipü mung ju Euphra.
15 Atungpuh Thrünpuhnü mihtsürü ju bedarübah Eden shahwün ching wochakshihpü tüsho aneakpü zojih. 16Atungpuh Thrünpuhnü mihtsürü ki thiyukhüm jihde tha, “Shahwün ching sangdung aban kheaknü nünü atsühpü kuklah; 17tüshe atsü le amütsü mükheahbe sangdung kheaknü nünü mütsühbeah; tümüde küpü nimung nünü ju tsühbanü dükde nü ashebah.”
18 Atungpuh Thrünpuhnü tha, “Mihtsürü ju zangrü lapü mütsü; inü api thsungkheak athülün arungrü khülang thrünjahnü.” 19Jumonü Atungpuh Thrünpuhnü shiwüh le wuhnubo alala alonü kamshih, tüsho arü mung jishihpü Adam kilim bedarü; tüsho Adamnü rhangdung lakhi loriloko aban tümü jikheanü ju arü mungbo kam. 20Jumonü Adamnü shiwüh tüsho wuhnubo alala mung jijih, tüshe Adam thsungkheak athülün arungrü müngüde alakheah.
21Judüki Atungpuh Thrünpuhnü Adam ju yapshede yüshih; api kheaknü rheangro khülang yihkhit tüsho ju shihtsünü müjimdojih. 22Atungpuh Thrünpuhnü mihtsürü kheaknü ayihkhitkhi rheangronü aliberü khülang thrün tüsho alibe ju mihtsürü kilim bedarü.
23Judüki Adamnü tha,
“Kheakü ha I ro chingnü ro, tüsho I shih chingnü shih;
anihbe ki aliberü de ajibah,
tümütüsho anihbe ju athrürü kheaknü yihkhit.”
24Jumonü athrürünü nihbuh abuh tüsho abe zojihbah niuberü lung thsürua labah, tüsho ane shihphü khülang kambah.
25Tüsho mihtsürü le aniube büne machihachihde bünkeang lakheah.
Currently Selected:
THRÜNTAN 2: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
