THRÜNTAN 17

Tsütabahkhi ju Tangzüng Amütsan

1Küyimki Abram kam 99 azorü lakheanü, Atungpuh api ki akhiuk tüsho tha, “I Wuto Thrünpuh ah; I miki tsahang tüsho lungkide laang. 2Tüsho inü nü le I dükeak tangzüng thsübah, tüsho inü nü hihdakde wüh bushihbah.” 3Abramnü amiro mükhümbah khukning, tüsho Thrünpuhnü api ki tha: 4“I thsungkheaknü a, ha nü kheak I tangzüng ah, tüsho nü trükshih ahihdo abuh thsübah. 5Kheaküa nü mung Abram de müji, tüshe nü mung ju Abraham labah; tümüde inü nü trükshih ahihdo abuh kamshihdo. 6Inü nü hodakde aso asoshihbah; tüsho inü nü trükshihbo kamshihbah. Tüsho nü kheaknü kiulongthsürübo arübah. 7Tüsho nü le nü dunglim nü tsühsoniusobo Thrünpuh thsüpü, inü I le nü tüsho nü dunglim nü tsühsoniuso lünbo dükeak akheam müla tangzüng zobah. 8Kheakü nüsa hanrü thsüde alakhi Kanan lo alala nü tüsho nü dunglim nü tsühsoniusobo kilim akheam müla yamalo thsüpü jihbah; tüsho I ju arü Thrünpuh thsübah.”

9Thrünpuhnü Abraham ki tha, “Nü thsungkheaknü, nü tüsho nü dunglim nü tsühsoniusobonü arü lünbo alala ching I tangzüng zoang. 10Ha nü tüsho nü dunglim nü tsühsoniusobonü azopü I tangzüng ah: Nüsa bolung athrürü aban tsütabahbah. 11Nüsa tsütabahbah, tüsho ju I le nü dükeak tangzüng amütsan labah. 12Nüsa lünbo ching nüsa yamkhün chingnü asürükhi yungsho nüsa tsührü yungde khiungkerü shonü thulode arükhi thsüthsü nüsa bolung athrürü aban nimung tizheah thsüsho tsütabahbeah. 13Nü yam chingnü azübekhi tüsho nü shonü thulode arükhi tsütabahbeah, tüsho I tangzüng ju nü shih ching akheam müla tangzüng labah. 14Tüsho athrürü shepü tsütamübahbanü ju mihtsürü anihbuh mihtsürü lungnü khekhita bahbah; apinü I tangzüng thsümünimdo.”

15Judüki Thrünpuhnü Abraham ki tha, “Nü niube Sarai thsungkheaknü, nünü anihbe mung Sarai de müji, tüshe amung Sara labah. 16Inü alibe müngühjihbah tüsho anihbe hode nü kilim tsührü she khülang jihbah; inü alibe müngühjihbah tüsho anihbe ju trükshih ahihdo abe thsübah; mihtsürü kiulongthsürübo anihbe kheaknü arübah.”

17Abrahamnü amiro mükhümbah müne, tüsho api mulong chingnü tha, “Mihtsürü khülang kam 100 azorü ki tsührü zübeba de? Tüsho kam 90 azorü kamkhi Saranü khungarü hanba shi?” 18Tüsho Abrahamnü Thrünpuh ki tha, “O, Ishmael nü miki lakhülaa!”

19Thrünpuhnü tha: “Yung, nü niube Saranü nü kilim tsührü khülang zübejihbah, tüsho nünü amung Isak de ajibah; inü api tüsho api dunglim anihbuh tsühsoniusobo kheak akheam müla tangzüng zobah. 20Tüsho Ishmael thsungkheak inü nü ki sojihdo. Kheahang, inü api müngühjihdo, tüsho api aso asoshihbah, tüsho hihdakde api wüh bushihbah. Api kheaknü yakzanshuhrü 12 trükkhitbah; tüsho inü api trükshih ato khülang kamshihbah. 21Tüshe nü kilim Saranü zübejihpü lakhi Isak kheak hadüchoki kim shikam I tangzüng zobah.” 22Thrünpuhnü anihbuh ki asukachihkhi akhik thsü, tüsho Abraham bahbah tso.

23Jumonü Abrahamnü api tsührü Ishmael api yam ching zübekhi tüsho shonü thulode arükhi alala, Abraham yam ching athrürü aban bea lu, tüsho Thrünpuhnü api ki thiyukhüm jihkhi nangde ju ninü tsütabahjih. 24Abraham tsütabahchoki api kam 99 azorü lakheah. 25Tüsho api tsührü Ishmael anihbuh tsütabahchoki kam 13 azorü lakheah. 26Ju ninü Abraham tüsho api tsührü Ishmael tsütabah; 27tüsho api yam ching mihtsürü alala, thüyam ching zübekhi yungsho khiungkerü shonü athulokhi api lung tsütabah.

Currently Selected:

THRÜNTAN 17: YIMCBSI

Highlight

Copy