THRÜNTAN 12

Thrünpuhnü Abram Jikhi

1Kheakü Atungpuhnü Abram ki tha, “Nüsa mihtsürü tüsho nü buh yamkhün nüsa lomi bahjihbah inü nü ki huhpü lakhi lomi ching yüang. 2Inü nü trükshih ato kamshihbah; inü nü müngühjihbah tüsho nü mung ato kamshihbah; tüsho nü müngühmühi labah.

3Shepünü nü müngühjihchonü inü müngühjihbah,

tüsho shepünü nü athruchonü inü muthrumüneanbah;

tüsho nü lung alomi yamkhün alala müngühjihbah.”

4Jumonü Atungpuhnü api ki thakhi nangde Abramnü chamachih, tüsho Lot api lung yü. Tüsho Abram ju Haran chingnü tsahmusuchoki kam 75 azorü lakheah. 5Judüki Abramnü aniube Sarai le aniurü tsührü Lot, arünü ahanmukhungkhi lakhit-kukruk tüsho Haran ching arübo azhorübo alala bea lu tüsho Kanan lomi ching yüpü tsahmusu. Junangde arü Kanan lomi ching arü. 6Abramnü Shekem ching More sangdung ato lapung khiungde lomi hode hantsah. Ju kim ching Kananrübo lomi ching lakheah. 7Judüki Atungpuhnü Abram ki akhiuk tüsho tha, “Nü tsühsoniusobo ki inü ha lo jihbah.” Tüsho apinü ju ching api ki akhiukbuh Atungpuh kilim kingaün sadam khülang thsü. 8Ju chingnü api aniyüzahlim Bethel tüsho aniakhiuklim Ai lakhi aniakhiuklim Bethel wungbo lim yü. Ju ching apinü Atungpuh kilim kingaün sadam khülang thsü tüsho Atungpuh mung ji. 9Jumonü Abramnü tsahmusu tüsho Negeb limpeang mutuklode yü.

Abram Ijip ching

10Kheakü lomi ching khümzung lakheah, tüsho Abramnü Ijip ching lacholapü yüki, tümüde lomi ching khümzung ju muthsukdakde alakheah. 11Api Ijip ching yüzahpü lachoki, apinü aniube Sarai ki tha, “Nü a jaktsükhi liberü ah de inü mükheahlah. 12Küyimki Ijiprünü nü ngübanü arünü athabah, ‘Ha api niube ah.’ Arünü I laksahbah; tüshe nü a alashihbah. 13Nü ju I niurü ah de thaang, junangde nü dünkheaknü I tsüde alabah, tüsho nü hode I rhangdung labah.” 14Junangde küyimki Abram Ijip ching arükhea, alibe ju khide jaktsüde Ijiprünü ngü. 15Pharao torübonü she alibe ngü tüsho anihbe jaktsükhi kiulongthsüpuh ki tha. Tüsho alibe ju Pharao yam ching bede yü. 16Apinü alibe dünkheaknü Abram ki tsüde rhimo tüsho api kilim namfimihnubo tüsho mihnubo, moshi, donkibo, azhorübo, tüsho kemelbo jih.

17Tüshe Abram niube Sarai dünkheaknü Atungpuhnü Pharao tüsho api yamkhün arüm atonü thsümüchi. 18Pharaonü Abram ji tüsho tha, “Nünü I ki rhimokhi ha tümü a? Nü niube ah de tümü thsükhi I ki müthakhea? 19Tümüde nünü, ‘Alibe I niurü ah’ de thabah anihbe I niube thsüpü lushihkhea? Jumonü kheakü, ha kheak nü niube lah; anihbe bea lubah tsoang.” 20Jumonü Pharaonü anihbuh thsungkheaknü api mihtsürübo ki thiyukhüm jih; tüsho arünü aniube tüsho api lakhi alala bede thiyia tsoshih.

Currently Selected:

THRÜNTAN 12: YIMCBSI

Highlight

Copy