ZEKARIAH 12
12
Jerusalem Gal Zaw’na
1Israel chung thu ah Lalpa kamsuak chu: Lalpa, vanthamjawl lian tak phaljakpa leh, leilung kingakna siampa leh mihing sunggil ah thagau siampiakpa ngei chun zia gual hin a gen hi:
2En un, Jerusalem chu a kîmvêl ah mipi zosia â ding ah khamna no in siam ding ka hi; Jerusalem khawpi bulu ah a um phat leh, Judai gam chule bulu in um ta’n a.
3Ziaphat chuleh, Jerusalem chu mizosia â dingin suangtum puakgik in siam ing ka tin; zia suang dom kâng taphot chu huaisia tak in kisuliam in au. Khawvel ah nam zosia a do dingin hung khawm ta’n au.
4Ziaphat chuleh, sakol zosia chu lauthawnsak ing ka tin; chuleh, a chung ah chuang mite chule hi’ngol ing ka, Lalpa‘n a tii. Chuleh, nam tinte sakol mitthûmna ka hun gawt phat leh, Judah Inkuante chu vang vêng bit zing ding ka hi.
5Ziaphat chuleh, Judah Inkuante chun, “Jerusalem ah chêngte chun sepai honte Lalpa, a Pathian zal un hatna a nei ui,” ti holimna’n mang ta’n au.
6Ziaphat chuleh, Judah Inkuante chu thing siakhawm lak ah beltaw’ meikuang gual in siam ing ka tin; buvui lak ah meisel gual hi’n au; tichun, a kîmvêl ua, a vei leh chang ua um namtinte chu kâng tum ta’n tin, Jerusalem chun ama mun, Jerusalem khawmun chu lua kit ta’n a.
7David Inkuante lopina leh Jerusalem luate lopina chu Judah chopkân ah hi’lêt a hi’lona ding in, Lalpa‘n Judah puan Inte chu zaw’na pemasa’n a.
8Ziaphat chuleh, Lalpa chun Jerusalem ah chêngte chu hûm intin, a lak ua a zawngkhâl pente chule David gual hi’n tiu in; chuleh, David Inkuante chu Pathian gual hi’n tiu in; a ma-âng ua Lalpa vansawlchâk um gual chu hi’n au.
9Ziaphat chuleh, Jerusalem do ding ah hung kuan nam taphot hi’mangthai ding ka hi.
Sut Ah Umna Sûnna
10 #
Joh 19.37; Tpn 1.7 #
Mat 24.20; Tpn 1.7 Chun, David Inkuan ah mite leh Jerusalem ah chêngte chung in, lainatna leh thûm piakna thagau buntha’ng ka tin; tichun, a la sut uh a mu phât ua leh, min a chapa neisun a sûn gual leh, a chatil a kâ khum gual un sûn ta’n au.
11Ziaphat chuleh, Jerusalem ah sûnna chu Megiddo phâizawl ah Hadad-rimmon mun ah lusûnna huaisia gual chu hita’n a.
12A gam pumpi, mitin in amau Inkuante chiat sûn ta’n au; David Inkuante’n amau Inkuan, a jiteu chiat inle amau Inkuan sûn in tiu in; Nathan Inkuante’n le amau Inkuan ma sûn in, a jiteu inle amau Inkuan chiat kisûn ta’n au;
13Levi Inkuante’n le amau Inkuan sûn in, a jiteu inle amau Inkuan ma sûn in au; Shimei Inkuante’n le amau Inkuan sûn in, a jiteu inle amau Inkuan chiat sûn ta’n au;
14Inkuan dang um nalai cheng inle amau Inkuan kisûn chiat in, a jiteu inle amau Inkuan chiat kisûn ta’n au.
Currently Selected:
ZEKARIAH 12: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
