MARKA 13
13
Tempul Siat Ding Thu Genlawkna
(Mat 24.1-8; Luk 21.5-9)
1Tempul ah kipat a hung pawtdawu chun, a nungzuite lak ah pakhat chun a kiang in, “Hotupa, entia, a suangte leh a In hi a lopi sam e!” a tia.
2Jesu’n a dawnhu, a kiang in, “Zia In lopi tak hi la muu maw? Zia tak ah suang kithuate hi sukchip lo in pakhat chale nutsia in um pua’n tin, a leng un kaichip sik sek hiding ahi,” a tia.
3Chun, Oliv tâng ah tempul lam nga a kichut lai un, Peter, Jakob, Johan tawh Andria chun a kiang in:
4“Zia chu bangtik leh a hung tung diam? Ziate hung tunna ding tepte’na chu bang a hem ei hil in,” ti’n a chuam in a dong un.
5Jesu’n a kiang un, “Kuama’n a hun pui mang zaw lona ding un chingthei tak in um un.
6Mi tam tak ka min in hung intiu in, ‘Ama chu ka hi,’ ti’n mi tam tak hun pui mang in au.
7Kido thu leh kido thuthangte la het tak ua leh lungkham kiu in; zia chu a hung tung ding him ahi; ahi’n, a tawpna chu hinai tadi pua’n a.
8Nam chuam leh nam chuam kido intiu in; gam chuam leh gam chuam kido intiu in; mun chuam chuam in lîn kilîng intin; kial hung tung in a. Zia chu nauvei kipatna ahi,” a tia.
Sukgentheina Ding Genlawkna
(Mat 24.9-14; Luk 21.10-24)
9 #
Mat 10.17-20; Luk 12.11,12 Himaleh, nanghaw vang chingthei tak in um un; vaihawmte hun mat sak intiu in, sunagog ah hun vua’n tin uh; keima ziakin vaihawmte leh lengte ma ah, amau hiatsakna dingin pui in um in lau.
10Chun, chanchinpha hi nam zosia kiang ah gen suak hi masa ding ahi.
11Ahi’n, mat leh piakdaw ah la um tak ua leh le, la gen ding uh chu ngaitua lawk diak kiu inla, la lungthim unle gêl masa kiu in; a hun tak ah la kiang ua hiatsak ah um chu gen mai un; nangmau ah kipat pawt la gen ding uh a hipua’n, Thagau Thiangtho in a hun hiatsak ding a hizaw ngal a.
12Zia tak chuleh, mi pakhat chun a suapi chu tha dingin hun matsak in tin, Pa chunle a chapa, chate’nle a nu leh pateu do dingin kipan intiu in, a thina ding uh le hun ngaitua in au.
13 #
Mat 10.22
Keima min ziakin mi zosia muda hi’n lau; himaleh, a tawp tiang ah thuakzote chu hukhin in um in au.
Kithoina Hi’buakpa
(Mat 24.15-28; Luk 21.20-24)
14 #
Dnl 9.27; 11.31; 12.11 Hi’buaksekpa chu a din lona ding ah ding la mu tak ua leh, (a sim kha zosia’n a umzia hechiat mai uh hen!) Judea gam ah umte chu tânggam ah jam mang mai uh hen la;
15 #
Luk 17.31
Inchung ah um chule a In sung lam in kum suk ki’hen, In sung ah a thil vala dinginle lut diak ki’hen;
16lou ah um le In lam ah puan la dingin tai ki’hen.
17Zia hun ah nauvop lai leh nau nawichep lai neite chu a chung uh a gik hi!
18Zia la jamna ding uh chu phalbi lai a hilona dingin pauchap un.
19 #
Dnl 12.1; Tpn 7.14 Zia hun tung ding ah gentheina chu, zia gual ah huaisia him him chu Pathian thilsiam tîl ah kipat tu’hun tiang ah le um kha nai lo a hi’n, a nung inle um kit ta ngai lo ding ahi.
20 Lalpa‘n zia hun chu hi’chom lo vang leh, mihing him him dam in suakcha pua’n au; himaleh, ama’n a têldawte ziakin a hun chu a sukchom ahi.
21Zia hun tak chuleh min la kiang un, “En tia, zia hin Messiah chu a um hi!” a hem, “Zia son a um hi!” a hem tileule taksang kiu in.
22Messiah lêmte leh jawlnei lêmte chu hung um intiu in, tepte’na leh thilmak lamdang tak tak hun mu sak intiu in, thei vang leh teldawte natiangle thep zaw gaw ding a hiu.
23Nang uh vang pilvâng tak in um un, bangkim ka hun hil lawk la hiu hi.
Mihing Chapa Hungna Ding
(Mat 24.29-31; Luk 21.25-28)
24 #
Isa 13.10; Jol 2.10,31; 3.15; Tpn 6.12; Isa 13.10; Ezk 32.7 Himaleh, zia buaina huaisia tak chu a hung tun zaw tak leh,
Nisa hung thim intin,
thapi le vâk ta pua’n tin;
25 #
Isa 34.4; Tpn 6.13; Jol 2.10 van ah kipat in aksite hung kia’n tin,
van ah thil hi’theinate chu hung kilîng in a.
26 #
Dnl 7.13; Tpn 1.7 Ziaphat chuleh Mihing Chapa hi a lopina tawh, thilhitheina thupi tak tawh, sûm chung ah khin hung suk in a.
27Ziatak chuleh a vansawlchâkte hun sawl intin, a mi têlte kawl kil li sung ah umte chu lei langkhat ah kipat in van tawp tiang in hun lakhawm in a.
Theichang Kung ah Zillai
(Mat 24.32-35; Luk 21.29-33)
28Theichang kung ah kipat hin tekhinthu zil un; a bâkte a hung sel ah, a duate a hung um pat tak leh nipi a nai tai ti la he sek ui.
29Zia gual ma chun, nang unle zia tawhbang chu a hung tun la mu tak ua leh, ama chu a hung nai ta hen kotbul in a um tai ti hiau in.
30Titakzet in ka hil la hiu, zia thilte chu a tunkim ma sia, zia khangthakte hi bei pua’n a.
31Lei leh van mangthai intin, ka thu ahileh vang mangthai pua’n a.
Kigin Zing A Kûlna
(Mat 24.36-44)
32 #
Mat 24.36
Himaleh, a ni leh a hun ding chu kuama’n a hepuai, vansawlchâkte’n le, Mihing chapa’n le a hepuai, Pa bep in a het ahi.
33Ziaziakchun, chingthei tak leh pilvâng tak in um zing un; a hun ding kuama’n la hepaw ngal un.
34 #
Luk 12.36-38
Mihing Chapa hi, khual gamla tak ah mi pakhat zindok gual chu ahi; zia pa chun a In a nutsia ding kuan in, a suakte kiang in thuneina a pia’n, a sep ding uh a pechiat ah, kotkhak vêngpa le ginum tak ah la vêng dingin thu a piai.
35Ziaziakchun, kiging zing in um un, Inneipa hung ding hun chu nitâk a hem, jankhang a hem, âk khuan a hem, jingkal a hem la hepaw ngal un;
36thakhat in hung thut intin, la i-mut lai hung sikha kha’n a.
37La kiang ua ka gen hi mi zosia kiang ah ka gen ahi: Kiging zing tau in, a tia.
Currently Selected:
MARKA 13: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
