JOHAN 7
7
Jesu Suapite’n A Taksan Lonau
1Zia nung ah chun, Jesu chu Galili gam lam in a chia a; Judate’n ama thâ a guat ziak un, Judea gam ah chun a chia nuam ta pua’n.
2 #
Thp 23.34; Dan 16.13 Zia hun ah chun Judate Biakbûk Kût chu a nai ta’n.
3A suapite chun a kiang in, “La nungzuite’n la thilbawlte hi a mutheina ding un, zia gam ah kipat hin pawt inla, Judea gam ah chia ta’n la,
4mi het ding ah thilbawl gawte chun, a gûk in kuama’n a bawl ngai puau hi. Zia tawhbang thilte hi la bawl ngal leh, khawvel hetthei dingin kimusak ta’n la,” a tiu a;
5a suapite nasan inle a gingcha nai puau a.
6Jesu’n a kiang un, “Ka hun a tung nai tadi puai, nangmau hun ahi leh a tung zing hi.
7Nang uh khawvel in a hun hawthei pua’n, keima ka hileh chu ei huau ahi, a thil phalo bawlteu a phatlo dan ka gendaw piak ziakin.
8Zia Kût ah chun nang uh vachiau in. Kei chu zia Kût ah hin hung pua’ng ka, ka hun a tun nailo ziakin,” a tia.
9Zia thute chu a gen zaw in ama chu Galili gam in a châm nalai hi.
Bawkcha Kûtna Jesu Chu
10A suapite a chia zaw phat un, a gûk ah mipite hetlo in, zia Kûtna chun a hang chia a.
11Judate’n Kûtna chun ama hawl in, khoi ah um a hem? a tiu a.
12Mipite lak ah mi tam tak chu ama chungchâng in a kinial sau sau tau a. A lak ua khenkhatte chun, ama chu mipha ahi, a tiu a; khenkhatte chun, ahi puai, ama hi mipite thêmchavai mai mai ahi, a tiu a.
13Himaleh, Judate a lau ziak un, kuama’n phuang tak in bangma a gen ngam puau.
14Kût a mat lûn lai tak un, Jesu chu tempul ah chia to in, thu a hil ta’n.
15Judate chun, zia pa hin lekha zil khalo ah, bangtidan ah zia gual ah hi lekha he ziang a hem? ti’n lamdang a sa ma mau a.
16Jesu’n a kiang un, ka thugen hi keima thu ahi pua hen, ei sawlpa ah kipat a hizawi.
17Kua’nle ama doigual a bawl chun, ka thugenle hia’n tin, keima phuakkawm a hilo dan leh, Pathian ah kipat ahi dan hethei ngei in au.
18Kuale ama phuakkawm gen chu, ama lopina ding kihawl a hisek hi; ahi’n, ama sawlpa lopina ding hawl tapo chu, zia ngei chu a dik ahi, ama ah chun diklona him him a um puai.
19Mosi’n Dan hun pia hilo a hem? Aleh, kuama’n la jawm diak puau hi. Bangatia, keima ei thâ gua la hiu em? a tia.
20Mipite chun a hun dawnhuu ah, thitha vop la hi! Kuan nang thâ a hun gua a hem? a tiu a.
21Jesu’n a dawnhu ah, thil pakhat ka bawl leh le mak la sau a.
22 #
Thp 12.3; Thl 17.10 Mosi khan zektan ding thu a hun pia’n, (zia kha Mosi ah kipan a hipua’n, suantu bul ah kipan a hizawi;) ahi’n, sabbath ni’nle zek la tan sek uh hi.
23 #
Joh 5.9
Mosi Dan bawsiat lona dingin sabbath ni’nle zek la tan ua leh, ke’n sabbath ni mi ka sukdam ziak ah bangatia ka chung ah lungna la hiu em?
24A lat dan gual mai in vaihawm ki-un la, dik tak in vawihawm zawu in, a tia.
Zia hi Khrista ahi Em?
25Jerusalem khua mi khenkhat in, “Zia pa hi thalup a guatpau kha hilo a hem?
26En tiam un, kilang tak in thu a gen hinle a kiang ah bangma a gen puau a. Vaihawm pawlte khan Messiah ahi ti a hechian tau ah ahi diam?
27Zia pa hi khoilam mi a hem ti I hechian tangal un; himaleh, Messiah chu a hung tak leh, kuama’n a hung kipatna hepua’n au, ti ahi ngal a,” a tiu a.
28Ziaphatchun, Jesu’n tempul ah mi a hil lai in, a hung kiko ah: “Nang un lei hiau in, ka hung kipatnale la hiau hi. Himaleh, keima thu hung ka hi puai. Ei sawlpa chu mi thu tak ahi’n, ama chu nang un la hepuau hi.
29Himaleh, keima’n ama chu ka hia’i; ama ah kipat ka hileh, ama’n ei sawl ka hi ti ka hia’i,” a tia.
30Ziaphatchun, ama chu mat a guau ah; himaleh, a hun a tun nailo ziakin, kuama’n a chung in khut a tha puau hi.
31Tichun, mi tam tak in ama chu a hun gingcha tau a, Messiah chu a hung tak leh le zia pa thilmak bawl sâng ah tam zaw hi bawl diak ding a hem? a tiu a.
Jesu Man Ding ah Mimante A Sawlnau
32Ama chungchâng ah chun mipi a phun ui ti Pharisaite’n a hun he tau a; tichun, Pharisaite leh thiampulalte chun ama man dingin miman hotute a sawl tau a.
33Ziaphatchun, Jesu’n a kiang un, “Hun chomkhat sung la kiang un um ing ka tin, ziazaw chuleh ei sawlpa kiang ah chia ding ka hi tai.
34Ei hawl in la tiu in, ei mu ta pua’n lau; ka umna nang uh hung thei pua’n lau,” a tia.
35Ziaphatchun, Judate chu a kiho ua, I mu tâk lona ding ua chu khoi ah chia ding a diam? Aleh, Jentel kithe’jakte lak ah thugen ah chia ding ahi diam?
36Ei hawl in la tiu in, ei mu ta puan lau, keima chiana chun hung thei puan lau, a ti hi bang a ti’na ahi diam? a kitiu a.
Tuihing Lui Chu
37 #
Thp 23.36
Kût pel ding ni, nipi pen ni chun, Jesu chu ding in, a kiko ta’n: Dangchâk taphot chu ka kiang ah hung hen la,
38 #
Ezk 47.1; Zek 14.8 keima ei ging taphot chun, hung dawn tau hen. Pathian Lekha thu gen gual in, a sung ah kipat in tuihing lui hung luangdok in ah, a tia.
39Zia a gen chu, ama ging tapo in Thagau a nei ding dan uh a genna ahi; zia lai ah chun Thagau Thiangtho piak ahi naipua’n, Jesu le choisa’n in a um nai puai.
Mipite Lak ah Kikhenna
40Zia a thugen chu a hun het phat un, mipi lak ah mi tam tak chun, “Zia pa hi jawlnei chu ahi tak tak hi,” a tiu a.
41Mi khenkhatte chun, “Ziapa hi Messiah chu ahi tak tak hi,” a tiu a. Ahi’n la, a lak ua khenkhatte chun, “Messiah chu Galili gam ah kipat in hung pawt ding a hem, hung pua’n a?
42 #
2 Sa 7.12; Mik 5.2 Pathian Lekha thu chun, ‘Messiah chu David suan ah kipat hung piang intin, David chênna khawpi Beth-lehem ah hung piang ding ahi,’ ti hilo a hem?” a tiu a.
43Tichun, ama ziakin mipite lak ah kikhenna nasa tak a hung um tai.
44A lak ua mi khenkhat chun, ama chu mat tei a nuam un; himaleh, kuama’n a chung in khut a tha ngam puau hi.
Hotute Ginlona
45Miman hotute kha thiampulalte leh Pharisaite kiang in a hung kit un; amau chun, “Bangatia hun man lo la hiu em?” a la tiu a.
46Miman hotute chun, “Zia pa gual ah sawn kuama’n thu a gen ngai puau hi,” ti’n a dawnhuu a.
47Pharisaite chun, “Nanghaw le thepzaw um la hitau maw?
48Vaihawmte leh Pharisaite lak ah ama taksang a um him him ua a hem?
49Zia mipi, dan helote hi hânsia law ah um a hiu hi,” a tiu a.
50 #
Joh 3.1,2 Nikodem, tu’ma Jesu kiang ah jan ah hung pa kha, amau lak ah pang a hia, ama chun:
51“Mi ama kam ngei ah a thu het leh, a thilhite het ahi ma’n I dan un mi thiamlo a chansak ngai ah a hem?” a tia.
52Amau chun, a kiang in, “Nang le Galili mi la hia hem? Hawl inla, en tiam in, Galili gam ah kipat jawlnei a pawt ngai puai,” a tiu a.
53Chun, mitin a Inlam chiat un a chia kit tau hi#7.53—8.11 sung hi Ms khen khat in a um puai.
Currently Selected:
JOHAN 7: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
