JOHAN 12
12
Mari’n Jesu Sathau A Nu’na
(Mat 26.6-13; Mar 14.3-9)
1Chiakân Kût hun ding ni guk masang chun, Jesu chu Lazar, a thisa a kaithaw kitna Bethani khua khan a hung kit a.
2Zia tak ah chun, ama jan an a nêksak un. Martha’n nêk a bawl ah, Lazar chu Jesu kichutpite haw lak in a pang a.
3 #
Luk 7.37,38 Mari chun spiknard sathau gimtui, man tam tak a hun chawi a, Jesu keng a nu’ zaw in a sam in a thiak ah. Insung zosia chu zia sathau gimtui chun a jel suak tai.
4Himaleh, Simon chapa Juda Iskariot, (ama matsak dingpa chun,)
5“Bangatia, zia sathau hi dangka za thum ah zawk ah, migentheite kiang ah piak hizaw lo a hem?” a tia.
6(Migentheite a khawtua ziak ah a gen ahi pua’n; ama hi mi gucha a hia, dangka dip a kol ah, a sung ah um chu a lak sek ziakin ahi zawi.)
7Jesu’n, “Amanu chu subuai kiu in, zia chu ka kivui ni â ding ah a bawl lawk ahi.
8 #
Dan 15.11
Migentheite chu la kiang un um zing ding a hiu in, keima hi vang um zing lo ding ka hi,” a tia.
Lazar Thalup A Guatnau
9Juda mipite chun, Jesu chu zia mun ah chun a um hi ti a hun het phat un, ama mu nuam leh, a thisa Lazar a kaithaw kit kha mu nuam kawm in a hung khawm tau a.
10Tichun, thiampu lalte chun Lazar le tha theina ding a ngaituau a;
11ama ziak ma ma ah chu Judate tam tak in amau nusia in, Jesu a ginchâk khawlaw tau hi.
Jesu Choihoina Tawh Jerusalem A Lut
(Mat 21.1-11; Mar 11.1-11; Luk 19.28-40)
12A jing ah chun Kûtna hung mipi tam takte chun, Jerusalem ah Jesu a hung hi, ti a hun he tau a.
13 #
Sam 118.25,26 Tichun, tûmbâkte a lau ah, Jesu lamtua dingin a chiau ah, a hung kiko ua:
“Hosanna! Lalpa min ah hung,
Israelte Lengpa chu a hampha na e!” a tiu a.
14Jesu’n sabiltungno a mu’n a chung ah a chuang a:
15 #
Zek 9.9
“Lau kin, Zion chanu!
En in la Lal chu,
sabiltungno chung ah chuang in a hung hi,”
ti kizik gual khan.
16Zia thute chu a lim in a nungzuite’n a la hethiam puau ah; himaleh, Jesu chohoi ah a hung um phatin, a chung thu a la kizik ahi dan leh, ziaziak ah chu hung tung ahi dante le a hun hechian tau hi.
17Ziaphatchun, Lazar a kaithaw lai ah mipi a kiang ah a la umte khan, thân kiang ah a thil hiatteu kha a hilsawn tau a.
18A thilmak bawlte a la muu ah, a het ziak tak ua hin, ama lamtua ding ah hungle ahi him ui.
19Pharisaite chu a kiho ua, “En un, bangma la law theilo uh hi; en tiam un, khawvel ah mite’n a nung a zui tau hi,” a tiu a.
Grik Mite Lak ah Khenkhat in Jesu A Mu nuam Ui
20Zia Kûtna Pathian ho ding ah hungte lak ah chun, Grik mi lawi khatle a hung pang un.
21Ziate chu Galili gam ah Bethsaida khua um Philip kiang in a hung un, “He pu, Jesu mu ka nuam ui,” a hung tiu a.
22Philip chu a hung ah, Andria kiang in a gensawn a; chuleh, Andria leh Philip chun Jesu a vahil tau hi.
23Jesu’n a la dawnhu ah, “Mihing Chapa hi chawihoi ah a um hun hung tung ding ei tai.
24Titakzet in ka hil la hiu, Bu changkhat lei ah a kiak ah, a thizet lo chun, a ngai ngai in a um zing sek hi; himaleh, a hung thizet tak leh chu tam tak in a ga sek hi.
25 #
Mat 10.39; 16.25; Mar 8.35; Luk 9.24; 17.33 Kuale a hinna itcha chun chân intin; kuale, zia khawvel ah a hinna itcha lo chun, kumtuang hinna nei in a.
26Kua’nle ka na a sep ding chun ei zui hen; keima umna chun ka nasemte chule a um diu ahi; kua’nle ka na a sep chun, zia mi chu ka pa’n chawihoi in a”.
A Thina Ding A Genlawkna
27Tu’hin vang ka lung a gim hi. Aleh, bang ka gen ta diam? He Pa, zia dakkal ah kipat hin ei hukdok in; himaleh, ziaziak tak ah hi tu’hun ah um ka hingal a.
28He Pa, la min hun chawisâng in, a tia. Ziaphatchun, van ah kipat in aw a hung pawt a, “Ka chawisâng tai, hun chawisâng kit ngen ing ka,” a hun tia.
29Mipi a kiang ah dingte chun zia chu a hiau ah, van-gi ahi, a tiu a; khenkhat chun, vansawlchâk in ama a hun ho ahi, a tiu a.
30Jesu’n a kiang un, “Zia aw chu kei â ding ah hung pawt a hipua’n, nangmau â ding ahi zawi.
31Tu’ ma ma hin zia khawvel hin vai a hawm hi; tu’hin zia khawvel vaihawmpa hi paidaw ah um ding ahi tai.
32Chun, keima hi lei ah kipat khaikâng a ka um tak leh, mi zosia keima lam ah huai khawm ing ka,” a tia.
33Zia thu chu a thi ding dan a genna ahi.
34 #
Sam 110.4; Isa 9.7; Ezk 37.25; Dnl 7.14 Mipite chun a hun dawnhuu ah, “Dan Lekhabu ah khan Messiah chu kum tuang ah um ding ahi ti ka hiau a; aleh, nang in bangtidan ah Mihing Chapa hi khaikâng ah um ding ahi, la ti’thei a hem? Zia Mihing Chapa hi kua a hem?” a tiu a.
35Jesu’n, “Zia vâk hi hun chomkhat sung la lak un a um tadi hi, vâk la nei sung un chiau in, dan leh la chung un thimna hung tung intin, kuale thim lak ah tawite chun a chiana diu a he puau hi.
36Vâk la lak ua a um sung hin vâk hi gingcha tau in, vâk chate la hung hitheina ding un,” a tia. Jesu’n zia thu chu a gen zaw chun a chia mang ah, amau lak ah kipat chun a kisêl mang tai.
Mipite’n A Ginlonau
37Amau haw ma-âng in thilmak zia jatzojai chu bawl maleh ama a ging diak puau hi.
38 #
Isa 53.1
Jawlnei Isai in a la gen kha a guitunna ding ahi:
“Lalpa, keimau thugen kua’n a taksang em?
Chuleh, Lalpa bân chu kua kiang ah suklat in a um em?”
tia a la gen kha a guitunna dingin.
39Ziaziakchun ahi, a taksan theilo uh, Isai in a gen kit a:
40 #
Isa 6.10
“Ama’n a mit uh a hi’thûm ah,
a lung uh ahi tâk ah;
a mit ua a mu lo ua,
a lungthim ua a het thiam lo ua,
a lung hei lona ding un,
achutiloleh a la hi’dam kha ding ka hi,”
a ti kit gual in.
41Zia thute hi Isai in a lopi dan a mu’n, a kiang ah thu a gen lai ah kha a la zik ahi.
42Ahi’n la, thuneite lak ah le mi tam tak in ama chu a hun ging tau a; himaleh, kikhopna In ah kipat nawdaw a um khak diu a lau ziak un, Pharisaite ziakin langchang tak in a kipuang ngam puau hi.
43Pathian pakchakna sâng in mihing pâkchâkna a hawl zaw ngal un.
Jesu Thuhil Lâkchom
44Chun, Jesu chu ngai tak in a kiko a, “Kuale ei ging chu, keima ei ging mai hilo in, ei sawlpa ging a hizawi.
45Kuale keima ei mu chu, ei sawlpa mu ahi.
46Kei khawvel salvâk ding ah hung ka hi, kuale ei ging chu thim lak ah a um zing lona ding un.
47Kua’nle ka thu a hetnung ah le ei taksan diak lo chun, a chung thu keima’n ka tan puai: khawvel vaihawm ding ah hung ka hipua’n, khawvel hukdam ding ah hung ka hizawi.
48Kuale, keima ei doi lo ah, ka thu mang nuam lo chun, a chung thu tan piak ding pakhat a nei hi: a kiang ah ka thugente hin, nitawp ni tak leh amau chung thu hun tan piak ding ahi.
49Keima phuakkawm in thu ka gen puai, Pa ei sawlpa’n ka gen ding leh ka hil ding thu chu ei pia zaw ahi.
50Ama thupiakte chu kumtuang hinna ahi ti ka hia’i; ziaziakchun, ka thugen taphot hi Pa ei hil gual ah ka gen ahi,” a tia.
Currently Selected:
JOHAN 12: VAIPBSI
Highlight
Share
Copy
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
