THILSIAM THU 8

Tuisâng Lêt Kiamna

1Pathian in Noah leh long sung ah a kiang ah ganhing zosia leh gancha um zosiate chu a hezing ah. Tichun, Pathian in lei chung lam ah hin hui a nunsak ah; chun, tui chu a hung kiam pan ta’n;

2Tuinâk thuk takte leh van tukvan awngte chule a hung kikhâk tau ah; van ah kipat gua hung zu chule haisak in a hung um ta’n;

3tichun, tui le lei chung ah kipat in a kiam hiai hiai tai. Chutichun, ni za khat leh sawmnga a bei nung ah chun tui chu a hung tawm ta ma ma a;

4a tha sagi’na, ni sawm leh sagi ni chun Ararat tâng ah chun long chu a hung kinga tai.

5Tui chun a tha sawmna tiang in kiam lam a manaw deu deu ah; a tha sawmna, a ni khat ni chun tâng vûmte chu a hung kilang tai.

6Ni sawmli tinnung ah chun, Noah chun long tukvan a bawl kha a hun hong ta’n;

7zia tak ah chun va-ak pakhat a hun lên dawsak ah; lei ah kipat tui a kan zaw masia va-ak chu a lêng vêl vêl ziang tai.

8Chuleh, lei chung ah tui a tam leh a tawm hetna dingin vakhu pakhat a lên dawsak kit ah;

9himaleh, tui in lei chung pumpi a chup suak nâk lai ziakin, vakhu chule chukna ding helo in, a kiang ah long lam ah chun a hung kile’kit a. Chutichun, Noah in a khut thadok in a vak man ah, long sung ah chun a kiang ah um dingin a la lut kit tai.

10Ni sagi dang a ngak kit ah, zia zaw ah chun long ah kipat vakhu a thâdok kit ah;

11nitâk lam in vakhu chu a hung lut kit ah; chuleh, a muk in Oliv dua kilotha kawm a hun tok ah; tichun, Noah chun lei chung ah tui a tawm tai ti a he tai.

12Zia kipat chu ni sagi a ngak nalai in, vakhu chu a lên dawsak kit ah; ahi’n, a kiang lam in a hung kit ta puai.

13Chun, a kum za guk leh khatna, a tha khatna, a ni khat ni’ chun, tui chu lei chung ah kipat in a kang ta’n; Noah in long khû’na chu a hawk ah, a en vêl ah; chuleh, lei chung chu a la hul suak tai.

14Tha ni’na, a ni sawmni leh sagi ni chun lei chu a hul suak tai.

15Ziaphatchun, Pathian in Noah kiang in,

16“Long ah kipat in pawt in, nang tawh, la ji tawh, la chapate leh a jiteu chiatle pawtdok un,

17la kiang ah ganhing um zosiate, vachate, ganchate, ganhing lei chung ah bokvâk zosiate tawh puidok inla, lei ah hin no nei uh hen la, chi tam tak hun suan ah a hung punna ding un,” ti’n a hil a.

18Tichun, Noah chu a pawtdok ah, a chapate leh a ji, a chapate jiteu tawh a pawtdok chiat tau a.

19Sa zosiate, ganhing zosiate, vacha zosiate, lei chung ah tawi lumlet thei taphot chu amau chi dungzui chiat un, long ah kipat chun a pawtdok tau hi.

Noah Kiang Ah Pathian Thutiam

20Ziaphatchun, Noah chun Lalpa â dingin mâichâm a bawl ta’n; sa thiang zosia lak leh, vacha thiang zosia lak ah kipat a lakhawm ah, mâichâm ah chun hâlmang thillat in a lân tai.

21 Lalpa’n a gim namtui chu a het phat in a lungthim in, “Mihingte ziakin lei chung hi hânsia law kit ta pua’ng ka; mihing lungthim ngaituanate chu a naupan lai ua kipat gilo ngen ahi ngal un; tu’hun ah ka gawtna gual hin mihing zosia hi gawt kit ta pua’ng ka.

22Lei chung a um sungsia butu leh bulâk hunte,

khawvot leh khawlumte,

nipi leh phalbite,

sûn leh jante chu bei ta pua’n a,” a ti tai.

Currently Selected:

THILSIAM THU 8: VAIPBSI

Highlight

Copy