Sòlòmön 1
1
1Tinkökö aṅ i nup Tinkökö Sòlòmön.
Ngam Raneh Tinkökö Kikānö
2Ō hāmkūö chu man öre öm hāmkūö chu tö minuh re! Pòn mötlö ngam hanāngenlōn meh tö vain,
3Tahūsa ap tavī-i incham alaha meh, ṙöhnyu ap minë-eny meh nö tavī-i; lökten yip mahalanṙen kikānö nö hāngenlōn tö meh.
4Sarōkö chu unôichrit meh, tai ka-eūyen. Kēhöt chu ap rācha el nup urôhò ò. Kiröngö ṙanāmölōn in min in meh; hapōilö hanāngenlōn meh in min mötlö tö vāin; huveū-en yip nö hāngenlōn tö meh.
5Saha elmat takô chin chū-ö, vai pöri, Ō kikānö kūön Yērusalem; sā nup rūkui Kētār, sā nup ranangkūö Sòlòmön.
6Uich hatīönka tön saha el mat chin, kūö ngam tavūöi nö ngehngö tī tö chu. Tainy yip nö in chu kikōnyö kūön öp kikānö yöng chu, vīten chu yip yōm panô-òṅ vāin; hö-ö pöri chū-ö hayōmken panô-òṅ vāin re.
7Vë-enynang chu, me-eṅ hanāngenlōn chu, tö chūök meh ha-aṅlö nup sīṅp meh, tö chūök meh vīten u nö ṙōlhaka tö el sakāmö; kūöyòh ṙöng öich min höng karööna sā öp töhĕng tak i nup sīṅp meh nôlö meh?
Kikōnyö
8Yē meh öt akahakūö, Ō tölngö tövai aṅ in yip kikānö, tömkö röön nup sīṅp, ha-āṅlö nup kūön inrē i nup rūkui öp yōm sīṅp.
9Haṙōngten meh chin hanāngen chu, i kan kōra inröl Fërō.
10Vāyö arëkūö man nö yanöṅtu, öm tahūötuvö tö yanöṅtö.
11Vī yanöṅtö meh in min tö humlum, holtö rupīö nö haṙākö.
Kikānö
12I saha ngam rācha nö el anūichö, ngaich öp rōi chōn tötahūsa nö taveūka.
13Sā tö hĕng misakö mūr öp hanāngen chu nö in chu, öp muhulalhaka nö ihôi teh chu.
14Sā töhĕng tum panöpnyö ṙòng henna öp hanāngen chu nö in chu el panô-òṅ vāin i Engkēti.
Kikōnyö
15Yĕh meuk, hanāngen chu, vai man; yĕh meuk, vai man;
Kikānö
16Yĕh meuk, hanāngen chu, vai man, kô-en lanöökö. Uhāvö elmat ap anūichö hā;
17Sītör nup mikeūnö patī hā, pāin nup kum maha-uk patī hā.
Currently Selected:
Sòlòmön 1: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
