RŌMA 9
9
Ngam Tēv Tö Yip Tömaṙôngö Tarik Ò
1Ṙô tö ngam kanô-en chin in Kristū, öt minyôiny-aṅ chin, hol chu an ngam inkahngen kuilōn chu nö eū-a im Töhet Fanöinylö, 2Tö chu öich kiröngen in tö miṙivlōn, öt ṙākenre inrē öp chanökö ellōn chu. 3Pò chu yik hòṅ Anatama ṙā-ang in Kristū tö kūö yip holre, yip hanöngkisānö chu nö sā ngam alaha. 4Yip aṅ Israĕl; yip tö inrukluvö, tö kanôlòvö, minë chöngö inrē, ngam kinëtö chöngö inrē, ngam linökö la-en ngam Tēv inrē, tö minë kinlēḵngô; 5Tömuvöhnguvö tö yik lökngörit Kristū nö sā tarik, ngam i kui taṙòkhöre, tökôlò Tēv örheūheu. Āmen.
6Öt sā töt teungtökūö pöri nö yih ngam Tēv. Pò cha nö öt ṙòkhöre nö Israĕl, yip aṅ Israĕl: 7Öt rēhĕn nö ṙòkhöre nö kūön, nö pò cha nö kūön ök kūön Aprahām: tön in Isak invëka yip kūön meh min. 8Ngam tö ngö, rö-ö yik nö yip kūön ngam alaha nö kūön ngam Tēv; yip kūön ngam kinlēḵngô pöri kaheuktu nö kūön. 9Pò ngih nö ṙô ngam kinlēḵngô, Sā ngih ṙētak Chin min yih, ngaich Sārai min nö kūönu tö kikōnyö. 10Ngaich rö-ö nöng ngatī; tön pirūkö nyīö Repeka tö tī ök tö hĕng tak, ök yöng hēḵ Isak 11Pòn öl nö fötnyu, öt rēhĕn nö kēken tölöök, hēk töchōich, hòṅ ngam chööḵnyö ngam Tēv nö köp, sā ngam kintöllö, öt aṅ i la-en, aṅ in Ò pöri ngam mahave-eti, 12Ngö ök yih ṙô ik kikānö, Kūönkūö ngam ṙālö öp min maṙöinylö. 13Sā kinūichngö e nö ngö Hāngenlōn chin tö Yāköp, surīkhen Isô pöri chu-ö.
14Sitih ṙô öi pökeh? Öt lanööku hòng im Tēv? Öt halöng an ngam Tēv. 15Pòn ngö ṙô Anga-aṅ tö Môsös, Aheūkölōn chin min ip chūökre aheūkölōn, aṙē-ĕlōn Chin min inrē ip chūökre aṙē-ĕlōn. 16Lökten e nö öt aṅ in ò öp tö hòṅ lōnu, öt rēhĕn nö aṅ ò öp famal, tön aṅ im Tēv ngam tö-aheūkölōn. 17Pò ngam töhet līpöre nö ngö ṙô tö Fërō, Angū-ö ön ngih chööḵnyö chu takô hachohlen meh, pò chu hòṅ hameuktö minhôiṅyöre in meh; hòṅ ngam minënyö Chu inrē nö ahangka nö el kahôyö i në taṙòkhöre panam. 18Hòn aheūkölōn Anga-aṅ ip chūökre nö lōnuvö, ip chūökre inrē nö hòṅ hangë-eng.
Lanīnö Tö Ngam Miṙēlōn Ngam Tēv
19Ngaich hòṅ ngö ṙô me-eṅ tö Chu, Kūyòh ang nö ṙòngmö chöh fālen? Achīö ṙöng ap lamakngö ngam lōn Ò? 20Hö-ö, achīö ṙöng öm me-eṅ, Ō tarik, öm samapṙô lā-al ngam Tēv? Ngö ṙô öng min ngam tövī-i tö Ò ngam vamī-iṅl e, Kūöyòh Öm ngatī tī vī-i chu? 21Hēk, röh ang ngam vamī tanīönyö nö kanahaiṙen nö im tilin, nö hĕng lā vahī tö tölöök tanīöyö, nö im tö hĕng mumūlö, ngaich chōich ngam tahëng?
22Sitih öre yē ngam Tēv nö hòṅ hameuktö lanīnöre, ane inrē vīten ngam minhôiṅyöre nö im chehen lanīnö tö hakaptu nö im öt inkôlò; 23Hòṅ Ò inrē, nö mikahtölōn, tö ngam vanāyö Ò, nö i nup chehen neūkölōn, nup tö halēni misī nö lā urĕh tö Ò, nö im kanôlò, 24Ihö, öi tö havëtu tö Ò, öt höng ṙa-ang i yip Yahūti, tön ṙā-ang i yip Tahëng mihëṅṙö inrē tarik? 25Sā ṙô Ò inrē nö in Hōsī,
Havëkö vē chin min tarik chu,
vē töt tarik chu misī; ngam
hanāngen Ò inrē, ngam töt-
hāngen misī:
26Ngaich angū-ö min nö ip
chūök e nö ngö ṙô tö cha,
Rö-ö yin yīö tarik chu.
In e cha-a min nö havëka
nö kūön ngam Tēv.
27Ngaich Isayā nö ngö ṙô nö in Israĕl, Yē ṙôken yip kūön Israĕl nö sā kuyāyö ngam mai, höng yip chööḵ min tö hayöökaṙen: 28Pò ngam Mā Tēv min nö kēken ngam ṙôre nö ing panam, keuheūtngen e, ane inrē rökngö ṙôta e.
29Ngaich sā ṙô Isayā misī,
Yē ngam Mā Tēv yip töma-
ṙôngö nö öt ṙātö kūön nö
in hī, ngaich ayī-ö öre höng
sā Sôtòm, sā Kômòra öre
inrē misī.
Vë-elkui Israel Ang Pôl
30Sitih ṙô öi pökeh? Tö vë Tahëng, mihëṅṙö tarik, nö sölta nö im lanöökö, vē töt tamömrit lanöökö, ngam aṅ im mikah lanöökö. 31Ngaich Israĕl nö tömrit ngam chöngö lanöökö, öt sölta pöri nö im chöngö. 32Pòyòh? Pò cha nö öt chöhö e nö lökten i mikah; sāre pöri yĕn lökten i la-en. Kavē-ĕre cha-a ngaich nö im ihong kinvēngöröön: 33Sā kinūichngö e nö ngö,
Yĕh meuk, i Sīyôn tī chin ṙātö
öp ihong kinvēngöröön, ane
inrē ihong lökngövah: anga-
aṅ ngòh ṙamātö ellōnre nö
in Ò, öt sirōngkūö min.
Currently Selected:
RŌMA 9: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
