T. MĀKÖS 13
13
Ṙô Pinyāingö Ngam Töhet Chūök Ang Yēsū
(Mt 24.1-2; Lk 21.5-6)
1Ngaich hē Yēsū nö kunyi-inyre, nö ṙā-ang el ök töhet chūök; ngaich hĕng tak ök haköptö Ò, tö ngö ṙô tö Ò, Mahaköphöti; yĕh meuk tö Sitih ön në ihong, Sitih vinīlö öng inrē! 2Ngaich Yēsū nö ngö ṙô tö ò, Meuk në öm yöng tövīlöngö? Öt hĕng tit min ihong ihih töṙā-ayö nö hachaphen höö, öp töt tiṙöli min.
Minë Pinhëṅ-ekūö Hěnghöre Kanihngen
(Mt 24.3-14; Lk 21.7-19)
3Ngaich hē Ò nö ūichhaka nö i kui Rôngö Òliv, nö kū-ötö ök töhet chūök; ngaich hatönan hēḵ Pītör Yāköp, Yôhan, Antaru inrē, nö ulāikenre, 4Ve-eny nang ih Man, ĕhē ön min anū-ö? Asuh ap min minkahngö hē u nö sölta? 5Kaknyöre ngaich Yēsū, nö ngö ṙô tö cha, Haṙēmngenre yin, hòṅ yīö öt halō-oikūö tö tarik. 6Maṙôngö yip yamih min nö i Mine-eny Chu, nö ngö ṙô, Chu-ö Chin Kristū; ngaich maṙôngö halō-ongkūö min. 7Yē yīö mīnö hang kinyūngö ineūkö kinyūngö inrē; ui pa-ekūö; tö hòṅ ngatī nun anū-ö öl pöri öp manāngen. 8Pò vē tarik min nö choholre nö lā-al höö, pūlngö inrē nö lā-al höö; ṙōlkang chūök min kumyeūnö; inyāichö min inrē. Anū-ö nun ranehtö chanökö kinyôḵò. 9Hīnöre pöri yī-ö. Tön kēten yīö yip min, nö i kinṙôka; fōho yin min inrē, el chūök vine-eṅkūötēv, i kūö kamhôṅka yin min, rācha inrē, öi sökhaka, tö pòkūö Chu; nö inmeukhömat cha. 10Hòṅ urĕh pöri sin, ngam tölöök inhānga nö ahangka, nö i vē taṙòkhöre tarik. 11Yē cha nö hachōten yīö im kinṙôka, nö kēḵngen yīö inrē, ui urĕh piṙūtköṙôre min; yē öp töng kinëḵeṅkūö yīö pöri hē e, angū-ö ngaich ṙô yīö; tön rö-ö yin yīö tö ṙô-òv, tön ngam Töhet Fanöinylö. 12Kēḵngen höö mīnö tö mëmre, nö im kinpaha kēḵngö kūönre inrē ngam yöng; choholre inrē nyīö min nö lā-al yöngre, ngaich hōten cha nö kumpaha. 13Surīkhu yin min tö taṙòkhöre tarik, töpòkūö ngam Mine-eny Chu. Ngòh pamītnyöre nö söl ip manā-aṅ, anga-aṅ min töhayöökaṙen.
Tökiröng Ötkanòlò
(Mt 24.15-28; Lk 21.20-24)
14Yē yīö pöri min meuk ngam inyëḵngen ötinkôlò, ṙô ök pròfĕt Tanīĕl, sökhaka i chūökre nö rö-ö, (akaha elnang an yēḵ ngam vame-eṅkūö;) hökngen cha yip mi-i Yūtā nö meutngö nö i kui rôngö; 15Hökngen ngòh mi-ikui patī un yônti nö kuhēthötre nö kēḵ chehenre nö el ngam patīre; 16Un havantöre ngam me-el panô-òṅ nö kē-ĕrö tökiröng inyutre. 17Ötkô takô yip puyōsö, yip mahapōḵ kūönre, hē u anū-ö sakāmö. 18Ve-ekūötēv pöichö, hòṅ e nö öt hē el kumṙah. 19Pò u min anū-ö sakāmö nö yöng kanihngen, öt töngatī-ivö hē ranehlö tī ngam Tēv nö vī-il taṙòkhöre, söl ing töngamuh; öt hēk nö môkö. 20Yē ngam Mā Tēv öre nö öt hacheūḵngö minë sakāmö, öt hĕng tak öre töhayöökaṙen. Tön pòkūö yip katöllö Ò, Anga-aṅ nö hacheūḵngö në sakāmö. 21Ngaich yĕn tarīku min tö ngö ṙô tö yīö, Yĕh meuk, ihī-a ap yih Kristū, hēk Umū-aṅ, ui ṙātö ellōnre; 22Tön töminyôinyaṅ yip min Kristū, töminyôinyaṅ pròfĕt inrē; hameuktö minkahngö yip min, pinngangkūö inrē; pò cha nö hòṅ halō-ongkūö yip tökatöllöng; yĕn kô. 23Hīnöre yin; yĕh meuk, ngaich Chin mu-urĕhnyôre tö yīö.
Ngam Yanihi Ngam Kūön Tarik
(Mt 24.29-31; Lk 21.25-28)
24Ip hē u pöri anū-ö sakāmö, unôichrit öp kanihngen; sangulkötimat min ngam tavūöi; öt yāngömat min ngam chingëṅt; 25Suktöre min në taneūsömat, nö ṙā-ang el halīöngö; ṙòkhöre min nup kanôlò el halīöngö nö kayīna. 26Ngaich möl cha-a min nö meuk ngòh Kūön Tarik nö löktö el taṙul nö yih, nö holtö minhôiṅyö, kanôlò inrē. 27Ngaich Anga-aṅ min nö tīnngö yip ma-ahānga; ngaich hamūl yip tökatöllöng nö ṙā-ang i në tö fën lā kuföt, ṙā-ang i manā-angkūö ngih panam, söl i manā-angkūö ngam halīöngö.
Tö Haköpö In Ngam Anychīr Chōn
(Mt 24.32-35; Lk 21.29-33)
28Haköp ngam inchōḵoṙô yin i ngam anychīr chōn. Yē ngam pak ò nö ayalnyöre, ngaich sīöpnyöre rōi inrē; akahalōn yī-ö ngaich, töm sikehngö nö röhta. 29Ngatī yī-ö yēḵ akahalōn, yē yīö meuk yanihih në, tö u ngaich nö röhta, nöng i kūö inkūp, 30Tökô-ò ṙô Chin tö yīö, Öl min ngih tūmö nö ngaichngen hanöng saha sanölta u nö ṙòkhöre. 31Chuhngöre an min ngam halīöngö, ngam tumlat inrē; öt chanūhuvṙen pöri min në ṙô Chu.
Öthěng Tak Tö Akahakūö Tö Sakāmö, Ṙetak Inrē
(Mt 24.36-44)
32Öt hĕng tak pöri tö-akalōn tö e angū-ö sakāmö, ṙētak inrē; öt akahalōn yip ma-ahānga el halīöngö, öt rēhĕn ngòh Kūön, höng ngam Yöng, 33Hīnöre yī-ö; aṅhaṅtī, ve-ekūötēv inrē; tön öt akahalōn yin tö hē öp ṙētak. 34Sā öp tarik an chamuh tahëng panam, öp ṙamā-ang patīre, ngaich halēnngen yip kūönkūöre, nö kö i la-enre; tölṙô öp yōm inkūp inrē nö aṅhaṅti. 35Aṅhaṅti lökten; tön öt akahalōn yin tö hē yanihih ngam mā tö patī-ivö, yĕn chūöl hatööm yĕn ṙô hayöm yĕn peuheū; 36Hòṅ ò nö öt kôtökūö tö yīö haṙòh, yē ò nö yih nönglūk. 37Ngam ṙô Chu tö yīö, ṙô Chu an tö taṙòkhöre, Aṅhaṅti.
Currently Selected:
T. MĀKÖS 13: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
