T. MĀKÖS 11

Ha-öinytu Yīhi Nö I Yeruselem

(Mt 21.1-11; Lk 19.28-40; Jn 12.12-19)

1Ngaich hē cha nö röhta nö i Yerūsalem, nö i Petfēkē, Petenī inrē, i kui ap Rôngö Òliv; nët tak tahīnngö ngaich Anga-aṅ, tö mahaköp; 2Ngö ṙô tö cha Kūṙòh; chuh im tuhēt nan, ngam i kūö nāṅ, iṙūö kôtökūö nan min tap tö kapòkhak kūön köttö, tö kunhēthöt nāṅ in e; öp tö öölu nö ūichka uk tö tarik. Luhlen ò, ngaich kēten ò. 3Ngaich yĕn hĕng tak min tö ngö ṙô tö nāṅ, Kūöyòh an ngatī? Ngö ṙô panchö, Hòṅ īnu öp Mā tö ò; ngaich ilööṙen min anga-aṅ nö tīnten ò nö ihih. 4Kiröönngöre ngaich cha-a, ngaich kôtökūö tök kūön köttö, nö kapòkhak nö i kūö inkūp, elkahôyö, nö el talöökö. Luhlen ò cha-a ngaich. 5Ngaich yik töng sökhak nö ngö ṙô tö cha, Kūöyòh an luhlö ngam kūön köttö? 6Ngaich cha-a nöng sā ṙô Yēsū nö kilēḵngen cha, ngaich hökiṙen cha-a nö kiröönngöre. 7Kētö ök kūön köttö cha-a ngaich, nö in Yēsū, ngaich haṙĕhtö uk ò tö nuk hilā cha, Ūichlöre ngaich Anga-aṅ nö i uk ò. 8Maṙôngö yik mahaṙĕhtö hilāre nö el talöökö haṙĕh törōi chōn yik inrē, nuk ṙahal cha nö el-inchōn. 9Ngaich yik mu-urĕh, yik mu-unôich inrē, nö hūḵa, nö ngö ṙô, Hōsanna, tökôlò An ngam yamih nö, i Mine-eny ngam Mā Tēv. 10Tökôlò an ngam yamih pūlngö ngam yöng hī Tāvit, Hōsanna, nö lātulöng.

11Kuhēthötre ngaich Anga-aṅ nö i Yerūsalem; ngaich kuhēthötre nö ël ök töhet chūök. Ngaich havīngömatre Anga-aṅ nö ngëichkö tökeuheūttöre, hòṅ harap angū-ö nö ngaich; kunyi-inyre ngaich Anga-aṅ, holtö yik tö nët sīön tak, nö chuh Petenī.

Ötlēkôre Yēsū Tök Anchīr Chōn

(Mt 21.10-19)

12Ngaich im huṙöich, hē cha nö yih nö ṙā-ang Petenī, kapahare Anga-aṅ. 13Ngaich hĕng māṅ ök anychīr chōn, tömeūkö nö marôvat, nöng rōyuvö; yihtöre Anga-aṅ ngaich, lohten nö amahtuṙen nö kôtökūö tö ṙòng ò. Ngaich hē Ò nö ngaich nö sölta nö in ò, ngaich öt kanôtukūö, höng rōi. Pòn öl nö hē ṙòng anychīr. 14Ngaich ngö ṙô Anga-aṅ tö ò, Töngamuhangen, söl môkö inrē örheūheu, öm öt nyā-aṅ ṙòng tö tarik. Hāngö e yik haköptö Ò.

Chuh El Ök Töhet Chūök Ang Yēsū

(Mt 21.12-17; Lk 19.45-48; Jn 2.13-22)

15Chalô cha ngaich nö i Yerūsalem. Ngaich kuhēthötre Anga-aṅ nö el ök töhet chūök, ngaich ahōngö yik mahavah inrē, nö el ök töhet chūök. Kuringngö nuk mīs yik mahaṙīkö rupīö, nuk anūichö yik mi-inyih, yik mahavah inrē, nö el ök töhet chūök. Kuringngö nuk mīs yik mahaṙīkö rupīö, nuk anūichö yik mi-inyihkö nyö-öṅ inrē. 16Öt halöngten tarik Anga-aṅ nö tayuk neū-euṅ nö lök ël ök töhet chūök. 17Ngaich haköphöti Anga-aṅ nö ngö ṙô tö cha, Röh öng nö ngö kinūichngö, Patī chūök vine-eṅkūötēv invëka ap min, patī Chu, chūök vē taṙòkhöre tarik? Ngaich pöri yī-ö vītö e, nö kinluhu tötūmu. 18Ngaich yik mākūö kūönṙô yik kamūich inrē, nö hāngö e; ngaich lukkö inlahenre cha-a nö fëlngen Ò. Pòn pa-ekūö cha-a tö Ò; pòn ṙòkhöre yik tömaṙôngö nö pingangkūö tök ṙô Ò inköphöti.

19Haraptöre harap, kunyi-inyre ngaich Anga-aṅ, nö ṙā-ang el ap panam.

Töhaköpö Ṙamā-ang Im Anychīr Chōn

(Mt 21.20-22)

20Ngaich hē cha nö chööḵöng, tö peuheū, ngaich meuk ök anychīr cha-a nö löktö ṙĕhre nyanangngö. 21Ngaich fēḵlen Ò ang Pītör, nö ngö ṙô, Rappī; yĕh meuk, ngam anychīr chōn nö nyangngö, ngam öthakôlò Meh. 22Ngaich ngö ṙô Yēsū tö cha, Mikahav yin im Tēv. 23Tökô-ò ṙô Chin tö yīö, Ngòh tö ngö ṙô min tö ngih rôngö, Ateuklöng man yēḵ: ngaich fuk el mai, nö öt kintöngulōn, ṙātö ellōnre pöri, tö e min nö teungten; ngaich teūngen min anga-aṅ tö e. 24Lökten Chin ngö ṙô tö yīö, Nup tökeuheūttöre ṙô yīö ve-ekūötēv, have-a inrē; ṙātö ellōnre yī-ö, töre öi teūngen tö u ngaich teūngen yī-ö min tö u. 25Yē yīö söklöre ve-ekūötēv, aṙē-ĕl, yĕn hĕng tak öp töfāluṙen nö in yīö, hòṅ ngam Yöng yīö inrē, el halīöngö, nö aṙēlen yīö tö nup fālen yīö. 26Yē yīö öt aṙē-ĕl, öt rēhĕn min ngam Yöng yīö el halīöngö nö aṙēlö nup fālen yīö.

Intön Töre I Alaha Minë Minhôiyö La-en

(Mt 21.23-27; Lk 20.1-8)

27Chalô cha-a nö hēk nö i Yerūsalem. Ngaich hē Ò nö kiröönngöre nö el ök töhet chūök, ngaich yihtöre yik mākūö kūönṙô nö in Ò, yik kamūich, yik yöngṙen inrē. 28Ngaich ngö ṙô cha-a tö Ò, Asuh ap chöngö Meh, la-evṙen tö në? Achīö ap kamëḵ-eṅkūö Meh tö chöngö, Öm la-evṙen tö u? 29Ngaich ngö ṙô Ang Yēsū tö cha, Hĕng öp ṙô Chu Chu-ö inrē, hatönö yīö. Sapṙô Chu pöchö; ngaich Chu-ö min ve-eny nang yīö töp chöngö Chu, la-evṙen tö në. 30Ök vinôkö tī Yôhan, aṅ el halīöngö ök? Aṅ i tarik ṙöng? Sapṙô Chu.

31Ngaich ve-ekūöre cha-a, nö ngö ṙô, Yē hī min ngö ṙô, Aṅ el halīöngö; ngaich ngö ṙô min Anga-aṅ, Kūöyòh pöri öi öt ṙātö ellōnre in ò? 32Yē hī pöri min, Aṅ i tarik; ngö ṙô, pa-ekūö cha-a tö yik tarik pò Yôhan nö pròfĕt takô, tö lōn cha nö ṙòkhöre. 33Ngaich cha-a nö ngö ṙô, nö sapṙô Yēsū, Öt akahalōn in. Ngaich Yēsū nö ngö ṙô tö cha, Öt rēhĕn Chin chĕi Chu-ö hòṅ ve-eny nang yīö töp chöngö Chu, la-evṙen tö në.

Currently Selected:

T. MĀKÖS 11: CANIBSI

Highlight

Copy