T. LŪKÖS 8

Kikānö Mahanôlken Yēsū

1Ngaich ilööṙen nö unôichngöre tö Ò, nö chuh i nup panam, tuhēt inrē, mumkahten ane inrē ahangkö ngam tölöök inhangkö ngam pūlngö ngam halīöngö. Hōlu Anga-aṅ tö yik tö nët sīön taka; 2Ngaich harohtum taka yik kikānö, yik tö ngaich nö halankaṙen tö-aṅhaṅv-in tö tötlöök sī-ö, ane inrē invah, Mariā ök tö Maktelīn nö invëka, ök tö sat tak sī-ö aṅ-in, yik ṙamāngen ò. 3Ane inrē Yôhanna ök pīhö Kūsa ök yōm inlanen Hērôt, Sūsanna inrē, maṙôngö yik tahëng mameukṙen cha.

Inchōḵoṙô I Ngam Tameūich

(Mt 13.1-9; Mk 4.1-9)

4Ngaich yē yik tömaṙôngö tarik nö hamūl yanihire, ane inrē yik aṅ nuk panam nö yihtöre nö in Ò, hĕng ök ṙô Ò inchōḵo ṙô, nö ngö ṙô.

5Kiröönngöre an ngam tameūch nup kulölre. Ngaich hē ò nö teūch, rēvre nup famuk taseū talöökö, ngaich rööntukui anū-ö, yihtöre nup chehechōn inrē nö sòkngö u. 6Rēvre nup famuk kui ihong; sīöplöre anū-ö, ngaich nyangngö pò u nö öt nyôp. 7Fuk ël nup töchökhukūö nup tahëng; hol u ngaich minë töchökhukūö nö sīöp, ngaich rāingökui tī tö u. 8Fuk ël tölöök tumlat nup tahëng, ngaich sīöp, ngaich hēngòng ṙòng. Ngaich ngö ṙô Anga-aṅ, hē ṙô Ò tö u. Ngòh tö elnānguvö hökngen ò nö hang.

Chööḵnyö Ngam Inchōḵoṙô

(Mt 13.10-17; Mk 4.10-12)

9Ngaich yik mahaköp nö hatönan tö inlahen ngam inchōḵoṙô. 10Ngaich ngö ṙô Anga-aṅ, Yī-ö yin tö kē-ĕvkūö pòi hōtu akahalōn tö ngam ötmikahkūö sin inlahen ngam pūlngö ngam Tēv; i yip tahëng tak pöri, höng i inchōḵoṙô; pò cha nöng meuk, ngaich nöng öt akaha el mat; hang yih cha-a, ngaich öt akaha elnang.

Manah Ngam Inchōḵoṙô I Ngam Tameūich

(Mt 13.18-23; Mk 4.13-20)

11Ngih öng kòl inlahen ngam inchōḵoṙô, Ngam kulöl an, ṙô ngam Tēv. 12Nup mi-i taseū talöökö, cha-a yip hamang yihtöre ngaich ngam sī-ö, nö kēḵngö ap ṙô nö ellōn cha; pòn sōtu cha-a nö ṙātö ellōnre, ngaich hayöökaṙen. 13Nup mi-i kui ihong, cha-a yip hamang, ngaich ṙāmölōn sin nö hōḵo ngam ṙô, ötṙēhĕvö pöri cha-a; yip töng rahëichtaṙen nö ṙātö ellōnre, ngaich ṙāngenre, hē el kanihngen. 14Nup famuk ël nup töchökhukūö, cha-a yip hamang, ngaich yē rô-òten cha, ngaich nup kanôlò, lōn ane inrē minyam, nö rāingökui tī tö cha; ngaich öt taneūnguṙen cha-a tö ṙòng. 15Nup me-el tölöök tumlat, cha-a yip tölöök, tökô-en ellōn, hamang ngam ṙô, haköpngöre ngaich, ip manööyö, ngaich nö ṙônguvö.

Ëāṅvö Tö Rūpikui

(Mk 4.21-25)

16Öt tarīkuvö tamôttökūö eṅāvö, ngaich ruptökui e tö kuvôkö, hēk öt ṙātö e inrē nö elkatòh chamam. I kui öp tösökhak pöri nö hātömat. 17Pòn rö-övö nö töhayunkavö öp töthanmeukten min; ötrēhĕn nö tö-ulāikavöṙen, öp töt akahaiṙen, ane inrē tö-ötteungtökūö nö im hanātö. 18Haṙēmngenre yin lökten, tö nup ahangre; tön ngòh tö-aṅhaṅv-in, ngaich anga-aṅ min tö kē-ĕvkūö; ngòh tötaṅhaṅv-in, ngaich kē-ĕyö min nö in ò öp töng mi-in ò, tö lōn ò.

Yöng Yēsū Tö Yik Kahëm Ò

(Mt 12.46-50; Mk 3.31-35)

19Ngaich yihtöre nö in Ò ök yöng Ò kikānö, yik hanöngkisānö Ò inrē; ngaich öt kô cha-a nö yihtöre nö in Ò, kūö më tömaṙôngö. 20Ngaich ngö vine-eny nang Anga-aṅ, Höng sökhak ap yöng Meh kikānö, yip hanöngkisānö Meh inrē nöng lā-uk, nö hòṅ meukkūö Meh. 21Ngaich ngö ṙô Ò nö sap ṙô cha, Ngam yöng Chu kikānö ane inrē yip hanöngkisānö Chu, cha-a yip hamang ṙô ngam Tēv, ngaich haköpngöre.

Vëkö Ngam Chanôchö Ang Yēsū

(Mt 8.23-27; Mk 4.35-41)

22Ngaich hĕng heuh ik hē u anū-ö sakāmö, tö Ò nö yôklö nö el kupòk, nö holtö yik mahaköp; ngaich ngö ṙô Ò tö cha, Ta-a, töi chuh lā mu-aṅ. Ngaich siṙaknyöre cha-a. 23Ngaich ṙòngmöng kiröönngöre cha-a, ngaich haṙòh Anga-aṅ. Ngaich ök yöng chanôchö kuföt nö ël ök mai; ngaich tööḵlö cha-a tö mak, ngaich nö kihngen. 24Yihtöre cha-a nö in Ò nö kilanglen Ò, nö ngö ṙô: Mahaköhöti, Mahaköphöti, ötkôlò in. Ngaich choholre anga-aṅ, ngaich vëkö ngam kuföt, ngam ëlmai inrē; ngaich ṙāngenre anū-ö, ngaich kalūöng. 25Ngaich ngö ṙô Anga-aṅ tö cha, Isuh ap mikah yīö? Pa-ekūö ngaich cha-a, hĕnghöre pingangkūö; ngaich ngö ṙô cha-a tö höö, Achīö angvö ngòh tamölṙô ngam kuföt, ngam mai inrē ngaich hāngö ṙô.

Halanken Ök Tarik Tö Sī-u Aṅ In

(Mt 8.28-34; Mk 5.1-20)

26Chalôḵ cha-a ngaich nö ik panam Keresēn, ök törònglö nö i Këlelī. 27Ngaich yôkti Anga-aṅ nö el tanyô. Ngaich hĕng tak ök tarik aṅ ök panam, mameūkö Ò, tö sī-u aṅ-in. Tömarô-angen ök nöng öt hilāṙu; öt iyöng patī, höng i kuikupah. 28Höng meuktöre anga-aṅ tö Yēsū, ngaich hūḵa, ane inrē afukngöre nö i kūö Ò, ngaich pōitô nö ngö ṙô, Sitih falngen öich min in Meh, Yēsū, Me-eṅ kūön ngam Tēv Lamātulöng. Ve-ekūö Meh chin, uh chin hakihtuṙen. 29Pò Ò nö tölṙô yik tötlöök sī-ö nö kunyi-inyre nö ṙā-ang ik tarik. Marò-òten an nö in ò; ngaich aṅtuvö anga-aṅ, nö nyanëktö sayōk; ngaich litòknyö u; ahōṙi ngaich tö ngam sī-ö nö el-inchōn.

30Hatönan ang Yēsū, nö ngö ṙô, Achīö ap mine-eny meh? Ngaich ngö ṙô ò. Līkiön chin; pòn maṙôngö yik sī-ö nö in ò. 31Ngaich ve-ekūö Ò cha-a, nö sōten Ò nö tölṙô cha nö kiröönngöre nö chuh ël nup tömaṙūnghöti.

32Tö hĕng mūl nö töpōyen nuk umuh ha-un tö ha-ôkö nö i kui rôngö. Ngaich cha-a nö ve-ekūö Ò, nö hökngen cha nö chuh in u; ngaich hökiṙen cha-a tö Ò. 33Ngaich kunyi-inyre yik sī-ö nö ṙāngö ngam tarik; ngaich kuhēthötre nö i nuk ha-un. Ngaich anū-ö nö kumöingöre nö i kui panam, ngaich fuk ël mai; ngaich kapah. 34Höng meuktöre yik maha-ôkö u, tö inlahen u, kiröönngöre cha-a ngaich nö ve-eny nö ip panam, i tavat inrē. 35Kiröönngöre cha-a, ngaich, nö ngëichkö inlahen u, nö yihtöre nö in Yēsū, ngaich kôtökūö tök tarik, ök tö-aṅhaṅv-in tö yik sī-ö kumröönngöre, nö ūichhaka nö i kalröön Yēsū, nö ngaich nö inyuttö lanööken ellōn; ngaich pe-ekūö cha-a. 36Ngaich yik mameūkö e, nö ve-eny nang cha tö ök tö-aṅhaṅv-in tö sī-ö, nö lööken. 37Ngaich ṙòkhöre yik tarik aṅ ök panam i Keresēn, nup töng ranghö e inrē, nö ve-ekūö Ò nö kiröönngöre nö ṙāngen cha. Pò cha nö pōyen pinheṅ-eṅkūö. Yôklö Anga-aṅ ngaich nö el kupòk, ngaich havantöre. 38Ve-evkūö pöri Anga-aṅ tö ngam tarik, ngam tö-aṅhaṅv-in tö yik sī-ö kumröönngöre; pò ò nö hòṅ in Ò. Tīnirit pöri anga-aṅ tö Ò, nö ngö ṙô, 39Havantöre man i patīre; ve-eny ṙôken tī ngam Tēv, töpòkūö meh. Ngaich kiröönngöre anga-aṅ; keuheūt ngam panam nö ve-eny ṙôken tī Yēsū, töpòkūö ò.

Kūön Yāirös Kikānö Tö Ök Kikānö Lamūölkö Hilā Yēsū

(Mt 9.18-26; Mk 5.21-43)

40Ngaich im invantö Yēsū, ha-öinytu yanihih Anga-aṅ tö yik tömaṙôngö; pò cha nö ṙòkhöre nöng hökken Ò, 41Ngaich hĕng taka ök tarik yamihtöre, Yāirös ök mine-eny ò, mākūö ök chūök vine-eṅkūötēv; afukngöre anga-aṅ nö i kunröön Yēsū, nö ve-ekūö Ò, nö yihtöre nö i patī ò. 42Pò ò nö hĕng tak kūön tö kikānö, ök töng hĕng maneuk, tö nët sīön höiny samyeūheu, tö hòṅ kapah. Ngaich hē Ò nö kiröönngöre, ngaich më tömaṙôngö nöng singngen Ò. 43Ngaich hĕng taka ök kikānö tö nët sīön samyeūheu kunnyahen, tökeuheūtö tī tö nuk nômöre nö i lame-en tövahavö; ngaich nöng öt lanöökuṙen. 44Yihtöre nö i uk Ò, ngaich lūölkö hilā Ò. Ngaich ilööṙen ök kunnyahen ò nö nyôklö. 45Ngaich ngö ṙô Yēsū, Achīö ap lamūölken Chu? Ngaich ṙòkhöre nöng rö-öv ṙô, ngaich ngö ṙô Pītör, yik hamòl ò inrē, Mahaköphöti; sīngi Man tö vē tömaṙôngö, ane inrē kirāchi.

46Ngaich ngö ṙô ang Yēsū, Hĕng taka tal öp lamūölken Chu; tön akahngen ngam kanô-òṅ Chin, nö kiröönngöre nö ṙāngen Chu. 47Höng meuktöre ngam kikānö töre nö öt hayunkaṙen, ngaich pa-ekūö anga-aṅ, ve-eny ap löktötīre anga-aṅ nö lūölken Ò, i kūö më tömaṙôngö tarik; tö ò inrē nö lööken. 48Ngaich ngö ṙô Ò tö ò, Kakūönö, ap mikah meh ap tölöökentī tö meh. Kumchikngöröönre man kuṙòh kiröönngöre.

49Ṙònghöichṙô Anga-aṅ, hĕng tak ngaich ök yamihtöre, nö ṙā-ang patī ngam mākūö chūök vine-eṅkūötēv, nö ngö ṙô, Kapah ök kūön meh nö ngaich; un līptuṙen ngam Mahaköphöti. 50Hāngö e pöri Yēsū, ngaich sapṙô ò, Um pa-ekūö; höng ṙātö ellōnre; ngaich lööken min anga-aṅ. 51Chalôḵ Anga-aṅ nö im patī, ngaich öt hōtö töng tarik nö kuhēthötre nö hol Ò, höng hēḵ Pītör, Yôhan, ane inrē Yāköp, tö nak yöng ngam nyīö kikānö inrē. 52Ṙòkhöre ngaich nö peuiny, ane inrē harāman; ngaich ngö ṙô Ò. Ui peuiny; tön öt kapah an; höng haṙòh pöri

53Ngaich cha-a nöng minônngöre, nö hayīölngen Ò; pò cha nö akahalōn tö ò nö kapah. 54Keuheūthëtī Anga-aṅ nö ha-ōnyen cha; kētam Anga-aṅ tö kël ò, havëken ò, nö ngö ṙô, Kun kikānö, choholre man. 55Ngaich ök ma-alaha ò nö havantöre, ilööṙen anga-aṅ nö choholre. Ngaich Yēsū nö tölṙô kinëtö nya-aṅkūö ò. 56Pingangkūö ngaich minā yöng ò; sōḵoti pöri Anga-aṅ tö vine-eny nang tarik, tö inlahen tī Ò.

Currently Selected:

T. LŪKÖS 8: CANIBSI

Highlight

Copy