T. LŪKÖS 4

Kalāha Ang Yēsū

(Mt 4.1-11; Mk 1.12-13)

1Tööḵlö ang Yēsū tö ngam Töhet Fanöinylö; ngaich havantöre nö i Yôtön, hachōḵoiṙen ngaich tö ngam Töhet Fanöinylö nö el-inchōn. 2Kalaha Anga-aṅ nö fën anāi tum sumkam tö ngam sī-ö; höng öt nya-aṅvkūö Anga-aṅ hē e. Keuheūthëṙen angū-ö, ngaich kapahare Anga-aṅ. 3Ngaich ngö ṙô ngam sī-ö tö Ò, Yē Meh Öm Kūön ngam Tēv, hachöngten ngòh ihong Man yĕh, nö vīngöre nö ròtī. 4Ngaich ngö ṙô Yēsū nö sapṙô ò, Töngaichngen kinūichngö an, tö tarik nö ötkô nöng kūö ròtī nö aṅ; höng kūö nup ṙô ngam Tēv pöri. 5Ngaich hachōḵoiṙen Anga-aṅ nö ip tömarô-òlkui rôngö, nö hameukhumat tö në pūlngö ngih panam, nöng öt rô-òtuṙen. 6Ngaich ngam sī-ö nö ngö ṙô tö Ò, Kē-ĕkūö Meh chin min, tö në chöngö ane inrē kanôlò u; pò u nö kētu nö in chu misī; ngaich kô-òren chu-ö höng meuk kahë-ekūöre. 7Lökten yē Meh sōntökūöre i kūö chu, ngaich anu-ö min nö ṙòkhöre nö amin Meh. 8Ngaich ngö ṙô Yēsū nö sapṙô ò, Me-eṅ Sātān, heūlngöre man lā-uk Chu; tön töngö kinūichngö an, Im Mā Tēvre man sōntökūöre; höng Anga-aṅ lahök la-en meh. 9Hachōḵoiṙen Anga-aṅ tö ò nö hēk, nö i Yerūsalem, ngaich asöklöngö nö i kui ök chūök ngam Tēv, ngaich ngö ṙô Ò, Yē Meh Öm Kūön ngam Tēv, sū-ungre Man yĕh, Öm ṙā-ang hih, 10Tön töngö kinūichngö an, Tīntö yip ma-ahāngare An min, nö mameukṙen Meh, ane inrē amahten Meh; 11Ane inrē kô-òren cha-a nö aṅtī tö eltīre nö tāyö Meh; hòṅ Mēh ötpalā-aiṙen kunröön tökūö ihong. 12Ngaich ngö ṙô Yēsū nö sap ṙô ò, Töngö öp yih ṙô, Uh man kalah ngam Mā Tēv. 13Keuheūthëṙen ngam sī-ö tö nup kinlaha; ṙāngen Ò ngaich anga-aṅ, nö rahëchhangkūö.

Rultenre Yēsū Nö La-evṙen Nö I Kelelī

(Mt 4.12-17; Mk 1.14-15)

14Ngaich Yēsū nö havantöre nö i Këleli, aṅhaṅv-in tö kanô-òṅ ngam Töhet Fanöinylö. Ngaich keuheūtngöre chūök hināngö Anga-aṅ tö yik töng ranghöre. 15Mumkahten Anga-aṅ ngaich nö el chūök cha nö ve-ekūötēv, ngaich hakūyiṙen tö taṙòkhöre.

Sō-ovö Yēsū Nö I Nasöret

(Mt 13.53-58; Mk 6.1-6)

16Yihtöre ngaich Anga-aṅ nö i Nāsaret, i chūök inruklö Ò; ngaich sāre Anga-aṅ nö kuhēthötre nö el chūök vine-eṅkūötēv, he el töhet sakāmö, söklöre ngaich Anga-aṅ nö ve-ekūö līpöre. 17Kētu ngaich ök līpöre ngam pròfĕt Isayā, nö in Ò; feheny Anga-aṅ tö mat e, ngaich kôtökūö tö chūök ngam tö ngö kinūichngö: 18Aṅhaṅv-in Chin tö ngam Töhet Fanöinylö ngam Mā Tēv; pò Ò nö vīten Chu Öich mumkahten vē yāich, tö ngih tölöök inhānga; tīnngen Chu An, Öich ve-eny ṙinānyö vē tökē-ĕ, ane inrē yip tötmeuk nö hēk nö meuk; ṙamānyö yip töhanyahka; 19Ve-eny ngam samyeūheu töhōḵovö tö ngam Mā Tēv. 20Öphang Anga-aṅ tö kūö ngam līpöre, ngaich kētö e nö hēk nö ik yōm e; ngaich ūichngöre. Ngaich yik tömaṙôngö me-el ngam chūök vine-eṅkūötēv nöng hatīönan. 21Ngaich ngö ṙô Anga-aṅ tö cha nö rĕhnyôre, Tötaheui ön ngih töhet līpöre nö teungtökūö nö el nang yīö. 22Ngaich cha-a nö ṙòkhöre mat nö ngëichken Ò, ngaich pingangkūö tö nuk ṙô lamöknyö elvāng Ò. Ngaich ngö ṙô cha-a, Röh Angah nö kūön Yôsĕf? 23Ngaich ngö ṙô Anga-aṅ tö cha, Tö hòṅ ngö ṙô yin tö Chu tö ngih inchōḵoṙô, Lame-en tövahavö, kahngenre Man, halankenre; sā tīre Man yĕh i ngih panam Meh, tö nup töpōyen ahang ih, la-en Meh i Kafarnahum. 24Ngaich ngö ṙô Anga-aṅ, Tökô-ò ṙô Chin tö yīö, öt hĕng tak pròfĕt töhōḵovö nö i panamre 25Tökô-ò ṙô Chin tö yīö, maṙôngö yik misī tafīösi nö i Israĕl, hē ngam halīöngö nö öp ngörekūö nö lūöi samyeūheu tafūöl chumngëṅtö, hē yanihih ök yöng inyāichö nö im panam. 26Ngaich höng humengkang chūök tinīnngö anga-aṅ, höng in Sarefat, ip panam Sītōn. 27Hēk pōyen misī yik töyeūnyu nö i Israĕl, hē ök pròfĕt Ēlaisa; ngaich öthĕng taka tö-ahetlöng tö ò, höng Nāman ök aṅ Sīria. 28Ngaich yik aṅ ël ngam chūök vine-eṅkūötēv, nö ṙòkhöre nö līn, hē cha nö hāngö u; 29Choholre cha-a ngaich, nö ha-ōnyen Ò nö ël ök panam, ane inrē hachōḵngen Ò nö i kui rung, i chūök vinīlö ök panam cha; pò cha nö hòṅ kuringten Ò. 30Ngaich pöri Anga-aṅ nöng lök el ṙôngö cha, ngaich kiröönngöre.

Ök Tarik Tö Aṅhav-in Tö Tötlöök Sī-ö

(Mk 1.21-28)

31Ngaich yihtöre Anga-aṅ nö i Kafarnahum, ök panam i Këlelī. Mumkahten cha ngaich Anga-aṅ, hē el töhet sakāmö. 32Pingangkūö ngaich cha-a tö ṙô Ò, nö mumkahten; pò Ò nö sā ṙô töpōiyen chöngö. 33Ngaich hĕng taka ök umuh tarik ël ök chūök vine-eṅkūötēv, ök tötlöökö aṅ-in tö sī-ö; pōitô ngaich anga-aṅ nö hūḵa, 34Eh! Sitih fālen öi min ihö, in Meh; Me-eṅ Yēsū aṅ Nāsaret? Yamih Öm fëlngen ih? Akahakūö chin tö Meh, Töhet Man aṅ im Tēv. 35Ngaich ngö ṙô Yēsū nö vëken ò, Ṙāngôre mana; kunyī-inyre öm ṙā-ang in ò. Ngaich hē ngam sī-ö nö afukngen ò, nö el ṙôngö, kunyī-inyre ngaich anga-aṅ nö ṙāngen ò; höng öt chökhuṙen tö ò. 36Pingangkūö ngaich më taṙòkhöre, ngaich ngö ṙô cha-a tö höö, tösitih öng ngih ṙô, tö Ò nö holtö chöngöre nö tölṙô më tötlöök sī-ö, ngaich kunyī-inyre cha-a. 37Hāngö inlahen ngaich Anga-aṅ nö keuheūtngöre chūök i nup töng ranghöre.

Pōyen Halanken Yēsū Tö Tarik

(Mt 8.14-17; Mk 1.29-34)

38Choholre Anga-aṅ ngaich nö ṙā-ang ël ngam chūök vine-eṅkūötēv; kuhēthötre ngaich nö el patī Sīmōn. Ngaich ök yöng pīhö Sīmōn, nö pōihangen nö vūöl; ve-evkūö ngaich Anga-aṅ tö cha, töpòkūö ò. 39Söklöre ngaich Anga-aṅ nö la kui ò, ngaich vëkö ngam vanūöyö ò; ṙā-ai ngaich anga-aṅ tö e. Ilööṙen ngaich anga-aṅ nö choholre, nö meukṙen cha.

40Ngaich hē ël maneutti ngam tavūöi, ṙòkhöre yik töṙōlkangen invah nö kētu nö in Ò. Ṙātö eltīre ngaich Anga-aṅ nö i kui cha, nö halanken cha. 41Ngaich më sī-ö ṙamā-ang i yik tömaṙôngö nö kunyī-inyre, pōitô nö ngö ṙô, Me-eṅ Man Kristū Öm Kūön ngam Tēv. Ve-evkūö cha-a tö Ò, höng öt halöngnyuṙô nö ṙô-òvö, pò cha nö akahakūö tö Ò nö Kristū. Mikāhaten Yēsū Nö El Chūök Vinë-ekūötēv (Mk 1.35-39)

42Ngaich peuheū-eulre angū-ö, kunyī-inyre Anga-aṅ ngaich chuh ik töhĕngkang chūök, el-inchōn. Höng chöhö Anga-aṅ ngaich tö më tömaṙôngö; yihtöre ngaich cha-a nö in Ò, ngaich hòṅ asökngen Ò lang, nö sōten Ò nö ṙāngen cha. 43Ngaich ngö ṙô Ò tö cha, Hòṅ mumkahten Chin i tahëng panam inrē, tö ngih tölöök inhangkö ngam pūlngö ngam Tēv; pòn angū-ö tinīnngö Chu. 44Ngaich mumkahten Anga-aṅ nö el chūök vine-eṅkūötēv nö i Këlelī.

Currently Selected:

T. LŪKÖS 4: CANIBSI

Highlight

Copy