LA-EN LĒVĪ 3
3
Inlāmö Tökētu
1Ngaich yē öp tökētu tö ò nö pötiṙen nö tökētu nö i inlāmö; yĕn kētö aṅ i nup tö hĕng mihëṅṙö töṙeūla, yĕn kōiny hēk yĕn kan, kēten ò anga-aṅ nö i kūö ngam Mā Tēv nö töt vahav alaha. 2Ṙātö eltīre min anga-aṅ nö i kui ngam kahëtöre, ṙatnyö likeun ò ngaich nö im inkūp rūkui manūlö: ngaich yip kikōnyö kūön Āròn yip Kūönṙô min nö kicheiny ngam mahām nö el ngam tahāklö nö havinngö e. 3Ngaich anga-aṅ min nö kētö ngam inlām tökētu nö i ngam Mā Tēv nö lökten i kūö tameūyö; öp ayū inṙungngö nup aṅ ellōn, ṙòkhöre nup tösangöö inrē i uk nup aṅ ellōn, 4Nup tönët inrē elkilpong, tö nup ayū in u inrē, nup mi-i ṙat, töp tö-angūṅ inrē ip alip, nö kē-ĕyö tö ò nö lökngö i minë elkilpong. 5Ngaich yip kikōnyö kūön Āròn min nö föngö e nö el öp tahāklö i kui öp töföngö tökētu, öp mī-i kui nup ngòh nup mī-ikui öp tameūyö; tökētu an angū-ö nö löktö i kūö tameūyö, tökētu an angū-ö nö löktö i kūö tameūyö, nö löö im Mā Tēv nö tötahūsa.
6Yē öp kahëtö ò nö töpötiṙen; nö inlāmö tökētu nö im Mā Tēv, nö aṅ i nup töṙōl mihëṅṙö töṙeūla; kōiny hēk kan, kēten ò anga-aṅ min nö öt vahav alaha. 7Yĕn kētö kūön sīṅp anga-aṅ nö kahëtö ò, ngaich anga-aṅ min nö kēten ò nö i kūö ngam Mā Tēv. 8Ngaich anga-aṅ min nö ṙātö eltīre nö i kui ngam kahëtöre, ngaich ṙatnyö likeun ò i kūö ngam rūkui manūlö: ngaich yip kikōnyö kūön Āròn min nö kicheny ap mahām ò nö i kui öp tahāklö, nö havinngö e. 9Ngaich anga-aṅ min nö kētö aṅ im inlām tökētu nö tökētu nö im Mā Tēv nö löktö i kūö tameūyö; öp tösangöö ò, keuheūtlöre tösangöö öp lamrit, kēngö e min anga-aṅ hakökhöt e nö i kūö öp kinngeūkö. Nup tösangöö hanum ellōn inrē, ṙòkhöre inrē nup tösangöö i ṙòng puhū ò. 10Nup tönët elkilpong, nup ayū inrē in u, nup i ṙat, töp tö-angūö inrē ip alip, nö kē-ĕyö nö lökngö i minë elkilpong. 11Ngaich ngam Kūönṙô min nö föngö e nö ël ngam tahāklö: angū-ö an nyā-aṅkūö aṅ im tökētu nö im Mā Tēv nö lökten i kūö tameūyö.
12Yĕn pököre öp kahëtö ò ngaich kēten ò min anga-aṅ nö i kūö ngam Mā Tēv. 13Ngaich ṙātö eltīre min anga-aṅ nö i kui ò, ngaich ṙatnyö likeun ò nö i kūö öp rūkui manūlö, ngaich yip kikōnyö kūön Aròn min nö kicheny ngam mahām ò nö i kui ap tahāklö nö havinngö e. 14Ngaich anga-aṅ min nö kētö ap kahëtöre, tökētu nö i ngam Mā Tēv nö lökten i kūö tameūyö; öp tösangöö hanum nup ellōn ò, ṙòkhöre inrē nup tösangöö ellōn ò, 15Nup tönët elkilpong, nup ayū inrē in u, nup i ṙat, töp tö-angūö inrē ip alip, nö kē-ĕyö nö lökngö i minë elkilpong. 16Ngaich ngam Kūönṙô min nö föngö u nö el ngam tahāklö: nyā-aṅkūö an angū-ö tökētu nö löktö i kūö tameūyö, nö tötahūsa: ṙòkhöre nup tösangöö nö lumnööṙö ngam Mā Tēv. 17Tötchanūhuvṙen min angū-ö nö chöngö i tumkölchap yīö i nup elyöngö yīö nö ṙòkhöre, tö yīö min öt kāḵ tösangöö ötrēhĕn mahām.
Currently Selected:
LA-EN LĒVĪ 3: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
