Ranehlö 25
25
Yik tahëng mikūönö Aprahām
(1 Kinṙöt 1.32-33)
1Kē pīhöre ngaich Aprahām tö tahëng, Ketura minënyi öku. 2Ngaich kayôḵnyen Simran angā-aṅ nö kūön ò, Yòksan, Metan, Mitī-an, Ispak, Su-ah inrē. 3Ngaich hakūönten Sīpa ang Yòksan, Tētan inrē. Vē yin kikōnyö kūön Tētan, Hēk̠ Ausrim, Letusim, Le-umim inrē. 4Vē kikōnyö kūön Mitī-an inrē; Efah, Efer, Hanòk, Apitā, Elta-a inrē. Ṙòkhöre yin vē nö kūön Ketura. 5Ngaich Aprahām nö keuheūttöre tī tö nuk inlānenre nö in Isāk. 6I yik kikōnyö pöri kūön yik töt pīhö ò, yik mi-in Aprahām, höng kētö inlōntö cha Aprahām; tīnngen cha ngaich angā-aṅ nö kū-ö tö lā chuhöt, ik lā chuhöt panam, nö ṙa-ang ik kikōnyö kūön ò Isāk, hē ò nö ṙòngmö aṅ.
Kinpaha Tö Ök Lināpngö Aprahām
7Në nun sakāmö samyeūheu Aprahām, rô-òtö nômö ò, hēngòng sat anāi taneui samyeūheu. 8Hökngen ök ma-alahare ngaich Aprahām, ngaich kapah angā-aṅ, nö löökö ṙēti, köiny nö tarik, söök̠ngö samyeūheu inrē; ngaich hamūltu nö i yik tarikre. 9Ngaich nā Isāk nā Ismael nak kikōnyö kūön ò nö lāpngen ò nö el kinlūhuh Makpela, el taṙeū Efròn, ök kikōnyö kūön Sōhar; aṅ Hitait, ök lākūö Mamrī; 10Ök taṙeū töhavaha tö Aprahām nö i yik kūön Hetː umuh ngaich Aprahām nö lāpi, Sëra inrē ök pīhö ò. 11Chalô tö e, unôichrit kinpāha Aprahām, tö ngam Tēv nö hakôlò, ök kūön ò Isāk; ngaich Isāk nö iyöng Pirlahairōi.
Mikūönö Ismael
(1 Kinṙöt 1.28-31)
12Vē yin kūön Ismael, ök kikōnyö kūön Aprahām, nö kayôk̠nyö Hakār ök aṅ Aikup, ök kikānö mahalanṙen Sëra, nö kūön Aprahām: 13Në nun minënyö yik kikōnyö kūön Ismael, i minë-eny cha, asā tumkölchap cha: ök lanòh Ismael, Nepayòt, Ketar inrē, Atpīl, Mipsam, 14Mismā, Tumā, Masā inrē; 15Hatat, Tēma, Yetur, Nafis, Ketēma inrē. 16Chā-a yin vē kikōnyö kūön Ismael, ngaich anū-ö në minënyö cha, i elpanam cha, i elyöngö cha; nët sīön mumā-aṅ sā tum mumā-aṅ tarik cha. 17Në nun samyeūheu nômö Ismael, hēngòng lūöi anāi sat samyeūheu: ngaich angā-aṅ nö hökngen ök ma-alahare, ngaich kapah; ngaich hamūltu nö i yik tarikre. 18Ngaich chā-a nö löktökūö Havila söl Sūr nö iyöng, öp lākūö Aikup, yē meh kū-ö tö Asiriaː iyöng ikūö yik hanöng kisānöre angā-aṅ nö ṙòkhöre.
Kinyôḵnyö Isô Nāṅ Yāköp
19Vē yin tumkölchap Isāk, ök kikōnyö kūön Aprahām: hakūönten Isāk Aprahām: 20Fën anāi samyeūheu Isāk nö köiny hē ò nö kē-ĕ Repëka, ök kikānö kūön Petuel aṅ Siria i Patanaram, ök kanānö Lēpān aṅ Siria, nö pīhö ò. 21Ngaich Isāk nö vë-ekūö ngam Mā Tēv tö pòkūö ök pīhö ò, pò ò nö ötkūönu: ngaich ngam Mā Tēv nö vë-evkūö tö ò, pirūkö nyīö ngaich ök pīhö ò Repëka. 22Ngaich nak nyīö nö kilöönö höö nö ellōn ò; ngaich ngöṙô angā-aṅ, Yē e nö ngatī, kūöyòh öichvö aṅ? Ngaich kiröönngöre angā-aṅ nö hatöntöre nö i ngam Mā Tēv. 23Ngaich ngam Mā Tēv nö ngöṙô tö ò, Nët nap mumā-aṅ tarik ellōn meh, Ane inrē nët tak nap tarik ellōn meh nö haköösiṙen min: Öp töhĕng tak min tarik, tökalēḵ töngam tahëng tak; kūönkūö öp manāngö min öp maṙöinylö. 24Ngaich hē nuk sakāmö ò nö fötö nö timtörekūö. Yĕh meuk, tumnëtö nak umuh el chūök kanūönö ò. 25Turë ök mū-urĕhnyi, keuheūtngöre alaha sā sanôi hila; ngaich kaheūkan chā-a nö Isô. 26Ngaich unôichnyi tö ò ök kahëm ò, ngaich ök eltī ò nö ṙapngöre nö i kulôichröön Isô; ngaich kaheūkö minë-eny angā-aṅ nö Yāköpː tafūöl anāi samyeūheu Isāk nö köiny hē Repëka nö kayôk̠nyen cha.
Havahngö Ök Aminre Ang Isô Nöng Maṙöinylö
27Pōyö ngaich nak nyīö kikōnyö: ngaich Isô nö töhuveū-en nö hacheūk̠, aṅ el kahôyö nö tarik, i yöng el inrūkui. 28Hangenlōn Isāk tö Isô, pòn kāk̠ alaha pô ò tö hanchōn: ngaich Repëka nö hāngenlōn tö Yāköp.
29Ngaich ang Yāköp nö tilī kanychi: yih ngaich Isô nö ṙeū-eung el kahôyö, ngaich aheuk: ngaich ngöṙô Isô tö Yāköp, 30Aṙēten chu, ha-aṅlen chu töngam töngāṅv elmat kanychi; tön ha-euk chin; lökten ök minë-eny ò nö kaheūkö nö Ētöm. 31Ngaich ngöṙô Yāköp, Ūrĕh man inyihtö ap minā-aṅre in chu. 32Ngaich ngöṙô Isô, Yĕh meuk, hòṅ kapah chin: asuh ap kanôlò chu min tö tīngam minā-aṅ chu? 33Ngaich ngöṙô Yāköp, Urĕh man chūöku ṙô kilēngôre in chu; ngaich chūöku ṙô anga-aṅ nö kilēk̠ngôre nö in ò; inyihngö ök minā-aṅre ngaich nö in Yāköp. 34Kē-ĕkūö Isô ngaich Yāköp tö rôti, lentil inrē kanychi: nyā ngaich angā-aṅ, òk inrē, chōholre ngaich, ngaich kiröönngöre; öt mikūöṙen Isô töngam minā-aṅre.
Currently Selected:
Ranehlö 25: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
Free Reading Plans and Devotionals related to Ranehlö 25
Fluent: Part 1
NIV Once-A-Day Bible
Pioneer: Taking New Ground Together, Part 5
