Mumkahten 1
1
Töng rö-övö an ngam Nômö
1Në ṙô ök Mumkahten, ök kikōnyö kūön Tāvit, rācha i Yērusalem.
2Chanök alaha aṅ i chanök alaha, ṙô ngam Mumkahten, chanök alaha aṅ i chanök alaha! Ṙòkhöre aṅ i chanök alaha.
3Suh ap taneūngen ngòh tarik i nuk la-en nup la-en ò el katòh ngam tavūöi?
4Kiröönngöre tö hĕng köl chap, yih inrē töhĕng köl chap, örheūheu pöri ngam tumlat nöng ngöh.
5Meutlö ngam tavūöi meutti inrē nö chuh ip chūök löklö ò nö meutlö.
6Föötöre ngam kuföt nö kū-ö tö lòhngö, havīngöre inrē nö lākapā; chavīṙa röön ngam kuföt, havantöre ngam kuföt inrē ip chinvīṙö e.
7Ṙòkhöre nup töhëm mak nö kū-ötö el mai, öt tööḵlö pöri ngam mai; ip chūök tö hëm mak nö hëmti, in e anū-ö nö hëmti nö hēk.
8Ṙòkhöre nö tööḵngen tö chanëyö; tö kônyô ngòh tarik tö e; öt tööḵngen ngam mat tö maheuṅkre, öt rēhĕn ngam nang nö tööḵlö tö ahangre.
9Öp tö ngaichngen ngaich nö angū-ö min, ök tökeuheūten inrē ngaich angū-ö min tökeuheūten; öt tufömngörevö inrē el katòh ngam tavūöi.
10Chehënu hòng öp tö ngö vinë-eny Yĕh meuk, tufömngöre ön ngòh? Tö ha-ëhelen ana, i nuk samyeūheu urēhĕkūö hī.
11Öt kanöpulōn umuh tö nuk lā urĕh, öt rēhĕn min nö kanöpulōn nö umuh tö nup tö öltöre yīhi in cha yip lā unôich nö yih.
Inkahngen Ngòh Tö Akāha
12Rācha chin chū-ö misī Mumkahten i kui Israĕl öich i Yērusalem. 13Ngaich kētö ellōn re chū-ö chöh, kiluh mikah inrē i nup el katòh ngam halīöngö tö keuheūten; öt kumchiklōn an nö la-en ngam kahëtö ngam Tēv nö in vē kūön tarik nö la-en cha. 14Keuheūt maheuṅkre chin el katòh ngam tavūöi tö tökeuheūten; yĕh meuk, ṙòkhöre nöng chanök alaha lāḵlö ngam kuföt nö unôich inrē.
15Öp tö kuròk ötkô nö vī-i nö chip, öp tö hāṅten inrē ötkô nö kaheuktu.
16Ngö ṙô ngaich chū-ö tö re, Teūngen chin tö yöng mikah, tôichlö tö yik i Yērusalem nö ṙòkhöre urēhĕkūö chu; ngaich inrē ngam ellōn chu nö pōyen mikahkūö tö mikah inkaha inrē. 17Kētö ellōn re chin inrē hòṅ akahakūö tö mikah hòṅ akahakūö inrē tö kintūöyen kumlō-ov. Meūkö e chū-ö pöri inrē nö lā-al ngam kuföt nö unôich.
18Pòn im tö pōyen mikah pōyen inrē ngam kanihngen, anga-aṅ ngam ṙamūölö mikahre ṙūölö miṙivlōn.
Currently Selected:
Mumkahten 1: CANIBSI
Highlight
Share
Copy
Want to have your highlights saved across all your devices? Sign up or sign in
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.
