INLAHEN 7

Ṙò-òvö Ang Satēpān

1Ngaich ngö ṙô ök mākūö kūönṙô tö ò, Kô ön nö ngatī? 2Ngaich ngö ṙô anga-aṅ, Kahōlö, kayöngö inrē; hangihtöre. Meūkö An ngam tökôlò Tēv, tök yöng hī Aprahām, hē ò nö i Mesapotamīa; urēhĕkūö ò nö iyöng Haran; 3Ngaich ngö ṙô tö ò, Kē-ĕngre man; ṙāngö ngam panamre, ṙā-ang yip mak alahare; yihtöre im panam ngam hameuktö Chu min in meh. 4Ngaich yihtöre anga-aṅ nö ṙā-ang ngam panam Kaltī; ngaich iyöng Haran. Ṙā-ang umuh anga-aṅ hēk, hē ök yöng ò nö kapah, ngaich kētu anga-aṅ nö i ngih panam, ngih chūök yīö töngamuh. 5Öt kē-ĕkūö ò ngam Tēv tö amin ò nö in e; öt rēhĕn öre nöng chūöku röön anga-aṅ. Ngaich kilēḵngôre pöri Anga-aṅ nö kētö e nö in ò, nö amin ò, i yip kūön ò inrē mu-unôich; hē ò nö öl nö kūönu. 6Ngö ṙô ngam Tēv; tö yip kūön ò min nö iyöng tahëng panam; pòn hōtu nö hakövö, öt hakôlöngṙô tö cha, fënòng tum samyeūheu. 7Ngö ṙô ngam Tēv nö hēk. Kahòkkaṙen yip tarik min tö Chu, yip mahakövö cha. Keuheūthëṙen angū-ö, ngaich kunyī-inyre min cha-a, ngaich lök la-en Chu i ngih panam. 8Ngaich kē-ĕkūö ò anga-aṅ tö ngam kinlēḵngô tunnyinyngö. Kūönhë Apraham tö Isak ngaich tunyiny ngen ò im hinëvhör sumkam. Kūönu Isak tö Yāköp; ngaich hēk Yāköp tö kūönu tö yik tö nët sīön miyöngö.

9Ngaich cha-a nö kunyahaṅlōn nö in Yôsĕf; ngaich inyihngen ò nö i Aikup; holtuṙah pöri anga-aṅ tö ngam Tēv. 10Ṙānyen ò pöri Anga-aṅ i nup taṙòkhöre kanihngen ò; ngaich kētö neukhö ò, mikah inrē, nö i kūö Fërō, ök rāchakūö Aikup; ngaich vīlen ò anga-aṅ nö mahayöng nö i Aikup, i patī ò inrē. 11Yih ngaich ök yöng inyāichö keuheūtngöre chūök i Aikūp, Kanā-an inrē; ngaich pōyen ötkanôlò. Ngaich yik muvöhngö hī nö öt nyā-aṅvkūö. 12Hē Yāköp pöri nö hang sāiny i Aikup, ngaich tīnngö yik muvöhngö hī anga-aṅ ik raneh. 13Ngaich im innët van, ang Yôsĕf nö mikahtökūö yik mëmre töre; ngaich hameuktu cha-a nö in Fërō. 14Ngaich tīnngö mahavëtö ök yöngre anga-aṅ, ang Yāköp, nö in ò inrē ṙòkhöre yik mak alaha, sat anāi taneui tak. 15Ngaich chuh Aikup ang Yāköp; kapah anga-aṅ nö umuh, tö yik muvöhngö hī inrē. 16Ngaich keūni cha-a nö i Sīkem; ngaich lāpi nö el anūlö Aprahām, ök havah ò nö ṙāitö rupīö, nö i yik kūön Hamôr, i Sīkem.

17Hē ranöhten ngam kinlēḵngô, ṙô ngam Tēv nö in Aprahām; ṙuhölre ṙôken ngaich më tarik, nö i Aikup. 18Hanöng saha ök tahëng rāchakūö Aikup, ök töt akahakūö tö Yôsĕf. 19Ngaich anga-aṅ nö miyëḵ tö cha, ngaich öt hakôlò yik muvöhngö hī; lökten cha nö kavalngö yik tënö kūön cha, pòn sōtu nö aṅ. 20Hē e ang Môsös nö fötnyu; tölngö tölöök ök nö nyīö. Lūöi chumngëṅtö anga-aṅ nö harūkö nö i patī ök yöngre. 21Ngaich hē ò nö kavāliyö, kē-ĕ ngaich anga-aṅ tök kikānö kūön Fërō; ngaich haruklöngö nö kūön ò. 22Ngaich Môsös nö haköptuvö i nup taṙòkhöre mikah yik aṅ Aikup; ngaich anga-aṅ nö tömihôiṅ i ṙô, la-en inrē.

23Ngaich hē ò fën anāi samyeūheu, ngaich hòṅ chöhkö yik holre anga-aṅ, yik kūön Israĕl. 24Ngaich hĕng tak ök töhachökö maheuṅk ò, ngaich laklen ò anga-aṅ; ngaich havahalvah ò, nö fël ök aṅ Aikup. 25Akahalōn yik hol ò, tö lōn ò, tö ngam Tēv, nö lökten eltī ò, nö kētö ṙinānyö cha. Ngaich pöri cha-a nö rö-ö nö akahalōn. 26Ngaich im huṙöich anga-aṅ nö meūkö tö cha, hē cha nö lā-al kūö höö; ngaich hòṅ halāmö cha, nö ngö ṙô, Mah! Holre yīna; kūöyòh öi chökhuṙen tö höö? 27Ngaich pöri ök töchökhu tī tök holre nö kuringngen ò, nö ngö ṙô, Achīö öp vamīlen meh hayöng, kahòkken ih inrē? 28Hòṅ fëlö chu ömeh, öm sā tīre vahë, tök aṅ Aikup? Meutngö ngaich Môsös, tökūö ngam ṙô, 29Ngaich i yöng panam yip aṅ Mītīa. In e anga-aṅ nö nët maneuk kūön.

30Keuheūten nuk töfën anāi samyeūheu, ngaich hĕng tak ök ma-ahānga tömeūkö tö ò, nö elinchōn Sīnāi, nö i kūö ök töhūkūö tameūyö el töyul. 31Ngaich hē Môsös nö meūkö e, pingāngö elmat anga-aṅ. Ngaich hē ò nö ṙūötöre nö ngëicha, ngaich ngö ṙô ngam Mā Tēv tö ò. 32Chū-ö Chin Tēv yik muvöhngö yīö; Tēv Aprahām, Isak, Yāköp inrē. Ngaich kichëyöre Môsös nö öt hòṅ ngëicha. 33Ngaich ngö ṙô ngam Mā Tēv tö ò, Luhngö minë kunröpöre man, i röön meh; tön töhet an ngam panam, ngam chūök meh sökhaka. 34Meuk kanihngen yip tarikre takô Chin, yip i Aikup: hang inyôṙö ṙô cha Chin inrē; ngaich hòṅ yihtöre Öich ṙānyen cha. Tā-a, hòṅ tīnten meh Chin i Aikup.

35Anga-aṅ Môsös ngam sahōḵo cha sin, nö ngö ṙô, Achīö öp vamīlen meh hayöng, kahôka inrē? Anga-aṅ tahīntö ngam Tēv nö hĕnghöre mahayöng, ṙamānyö inrē, nö lökten ik ma-ahānga, ök tömeūkö tö ò nö el töyul. 36Anga-aṅ ṙamānyen cha, tö kinheūṅtö tīre tö nuk pinngangkūö, minkangö inrē, i Aikup, el ap Mai Ētöm inrē, elinchōn inrē, fën anāi samyeūheu. 37Anga-aṅ ön ngòh Môsös tö ngö ṙô, nö i yik kūön Israĕl, Hĕng tak vahīlö An min ngam Tēv tö pròfĕt, nö aṅ in yīö; nö tö sā chu. 38Anga-aṅ an mī-i yik māṅ nö el-īnchōn, holtö ök ma-ahānga vame-eṅkūö ò, nö i kui ap Rôngö Sīnāi; kamëḵ ngam tö aṅ ṙô, nö kē-ĕkūö hī.

39Ök töt hāngö ṙô tö yik muvöhngö hī; sōḵovö pöri tö cha. Ngaich hòṅ havantöre ellōn cha-a nö i Aikup. 40Nö ngö ṙô tö Āròn, Vīlö tēv hī man, yip mū-urēhĕkūö hī nö kiröönngöre. Tön rö-ö in akahalōn tö lāinyngen Môsös ök mahachōḵnyen hī, ṙā-ang Aikup. 41Hē-e, cha-a nö vi kun nuā, ngaich kētö nuk tökētu nö ik insā; ngaich ṙāmölōn nö i nuk vahīre cha-a. 42Havööngökūöre ngaich ngam Tēv, ngaich hökngen cha nö hayönglenre nö i nup töpōyen el halīöngö; sā kinūichngö e nö i mat līpöre yik pròfĕt, Kētö nup tökapah öi chehechōn in Chu, tökētuvö inrē, fën anāi samyeūheu, elinchōn? Ō yī-ö aṅ patī Israĕl! 43Ngaich yī-ö kēḵ ngam inrūkui Mōlòk ngam taneūsömat ngam tēv Rēfan, nuk insā tö vī-i, ngaich hayönglenre in u. Lökten Chin kēḵngen yīö min lāmuh tö Pēpilön. 44Inrūṙukui yik muvöhngö hī, ök inmeukti nö elinchōn; sā ṙô ök vame-eṅkūö Môsös nö tölṙô ò ngaich hōten ò nö vī-i e nö sā maheuṅk ò. 45Ngaich yik muvöhngö hī nö kēhöt e nö hol Yôsūā, hē cha nö kuhēthötre, nö kēḵ aminre tö yik tahëng mihëṅṙö, yik tö ahōṙī tö ngam Tēv, nö i kūö yik muvöhngö hī; söl i nuk sakāmö Tāvit. 46Ngaich ang Tāvit nö aheukhuvö tö ngam Tēv; ngaich havëtôre nö halēnkö chūök ngam Tēv Yāköp. 47Sòlòmön pöri vamīlö patī Ò. 48Rö-ö pöri ngam Lamātulöng nö iyöng el patī në vahī-il kuntī; sā ṙô ök pròfĕt. 49Kantēra Chu an ngam halīöngö; ranöönö röön Chu ngam tumlat, Sitih tī öi min vīlö patī Chu? ngö ṙô ngam Mā Tēv; 50Hēk asuh ap min chūök haneūheu Chu? Röh ön në kuntī Chu nö vamī-iṅl në ṙòkhöre?

51Yī-ö tökehe likeun, töt tunyīnyi ellōn, elnang inrē; höng örheūheu yin sōḵo ngam Töhet Fanöinylö. Sā yik muvöhngö yīö misī, ngatī yī-ö. 52Ök yòh ök pròfĕt tö rö-ö nö öthakôlöngṙô tö yik muvöhngö yīö? Ngaich cha-a inrē nö fëlngö yik mū-urĕh mahameuktö yanihih ngam Tölöök. Yī-ö yin kamëḵngen Ò töngamuh, famëlngen Ò inrē; 53Yī-ö kamëḵ ngam chöngö, lökten i yik ma-ahānga; ngaich rö-ö öi haköpö e.

Kulehe Kūi Ang Satēpān

54Ngaich hē cha nö hāngö u, ṙatngöre ellōn cha-a ngaich; kap kui kanapre inrē, nö in ò. 55Īnu pöri Satēpan tö ngam tö Töhet Fanöinylö; haköpmatre ngaich nö ngëichkö el halīöngö, ngaich meuk kanôlò ngam Tēv; sökhaka Ang Yēsū inrē nö lāhāmö ngam Tēv. 56Ngaich ngö ṙô anga-aṅ, Yĕh meuk; meuk ngam halīöngö chin, nö luve-akkūö; sökhaka ngam Kūön Tārik nö lāhāmö ngam Tēv.

57Pōitô pöri cha-a nö hūḵa; ngaich tilupngö elngangre inrē. Faltöre ngaich nö in ò, nö hĕng tum röön. 58Kavalnyen ò ngaich cha-a, nö lā-uk kinlōngö ök panam; ngaich kuleh kui ò. Ngaich yik ameū-a nö ṙātö nuk kinṙumre nö i röön ök tö hĕng tak ṙāl tarik, ang Sôl. 59Ngaich kuleh kui Satēpan cha-a, hē ò nö havëkö ngam Mā, nö ngö ṙô, Mā Yēsū; kēḵ ngòh ma-alaha chu. 60Simngöre ngaich anga-aṅ; ngaich pōitô, nö ngö ṙô, Mā; un in cha pöchö ngih tökööl. Keuheūthërô anga-aṅ tö e, ngaich haṙòh.

Currently Selected:

INLAHEN 7: CANIBSI

Highlight

Copy