INLAHEN 4

Ikūö Kamhôka Ang Pītör Nāṅ Yôhan

1Ngaich hē cha nö ṙònghöichṙô nö ve-ekūö yik tarik; ngaich yihtöre nö in cha yik mākūö kūönṙô, ök yōm ök töhet chūök, yik Satukī inrē; 2Kunyahaṅlōn cha-a; pò cha nö haköp tö yik tarik, ngaich ahānga inrē tö ngam invanlö ṙā-ang i yip tökapah, nö lökten in Yēsū. 3Ngaich öpngökūö cha, söl im huṙöich; pò e nö ngaich nö harap. 4Maṙôngö pöri yikhamang ṙô yik tanīnöṙô, ngaich ṙātö ellōnre; ngaich yik tarik lohten nö taneui köṅny tum tak.

5Ngaich im huṙöich, yik yöngṙen, yik mākūö, tö yik kamūich inrē, hamūlöre nö i Yerūsalem. 6Umuh inrē Annas, ök mākūö kūönṙô, Kaifas, Yôhan, Aleksantör inrē, yik töng mak alaha ök mākūö kūönṙô inrē. 7Ngaich hē cha nö asöklen cha nö ellōn, ngaich ngö ṙô nö hatön, Asuh ap chöngö yīö? Hēk, i mine-eny chīö, öi la-evṙen tö u? 8Ngaich īnu Pītör, tö ngam Töhet Fanöinylö; ngaich ngö ṙô tö cha, Yī-ö yöngṙen vē tarik, yī-ö mākūö inrē; 9Yē ai töngamuh kahòkkaṙen kūö ngam tölöök la-en ai, i ngam tötkalēḵ alaha inrē, töp lökten ngam tarik nö lööken; 10Akahalōn yin yēḵ ṙòkhöre, yī-ö inrē taṙòkhöre aṅ Israĕl; tö ò nö lökten i Mine-eny Yēsū Kristū aṅ Nāsaret, ngam harātö yīö, ngam töhachohlöngö tö ngam Tēv nö ṙā-ang i yip tökapah, lökten in Ò ön ngòh tarik nö sökhaka nö i kūö yīö, nö lööken. 11Anga-aṅ An ihong tö sōḵovö tö yīö, yī-ö mamānö; ngam tövītu nö yöngkūö sinkeukngö. 12Öt tahëngu chūök inyööken; pòn öt rēhĕn nö tahëng Mine-eny, elkatòh ngam halīöngö, tö kētu nö i tarik öp löklen hī hayöökaṙen.

13Ngaich hē cha nö meuk ötpinhë-eṅkūö nā Pītör, nāṅ Yôhan; ngaich akahalōn tö cha nö tötmahaköp, tötakaha inrē nö tarik; ngaich uṙeh cha-a; ngaich cha-a nö akahalōn tö cha nö mī-in Yēsū sin. 14Ngaich meuk ök tarik cha-a nö sökhaka nö in cha, ök tölööken nö ngaich; ngaich öt huveū-eu ṙô cha-a tö e. 15Hē cha pöri nö kunyī-inyre, nö ṙā-ang i yik kamhôṅka ngaich ve-ekūöre cha-a, nö ngö ṙô, 16Sitih tī öi min tö nāṅ tarik? Tön kô ngam minkahngö la-en cha, nö hameuktuvö nö i vē taṙòkhöre mī-i Yerūsalem; öt kô in mahngö e. 17Hòṅ e pöri nö öt ṙūhöinyre nö i vē tarik; ta-a, töi pinheṅ-eṅlkūö cha, hòṅ cha nö töngamuhangen nö öt mumkahten tarik tö ngih Mine-eny. 18Ngaich cha-a nö havëten cha, ngaich tahngen cha nö mumkahten, un rēhĕn nö haköphöti nö i Mine-eny Yēsū. 19Ngö ṙô pöri nā Pītör, nāṅ Yôhan, nö sapṙô cha, Öp yòh öp töhuveū nö i kūö ngam Tēv, ngam hinang ṙô yīö, nö mötlö tö hinangṙô ngam Tēv; ngëichken e yin yēk. 20Tön rö-övö in ihö kô öt ṙô-òv tö nuk maheuṅkre, ahangre inrē. 21Ngaich hē cha nö ṙūönyôre nö pinheṅeṅlkūö cha; ngaich hökiṙen cha-a nö kiröönngöre, öt kôtökūö töp tīre nö öt hakôlò cha, kūö tarik; pòn ṙòkhöre yik tarik nö ha-öiny ngam Tēv, pòkūö ök töngaichngen. 22Pò ök tarik nö saṙaklöngkūö samyeūheu tö töfën anāi, ök töhalankaṙen.

Vë-elkui Re Yik Ṙamātölōnre

23Hökiṙen cha-a nö kiröönngöre, ngaich yihtöre nö i yik holre; ngaich eūkö el nang cha nö ṙòkhöre tö ṙô yik mākūö kūönṙô, yik mā inrē tö cha. 24Ngaich hē cha nö hāngö e, hamūlṙôre ngaich cha-a nö ve-ekūötēv, nö ngö ṙô, Ō Mā Tēv, vamīlö ngam halīöngö, panam, mai, nup taṙòkhöre mī-in u inrē; 25Me-eṅ lamökten im Töhet Fanöinylö, Öm ngö ṙô, löknyö elvāng ök muvöhngö ih, Tāvit, ök kūön Meh, Kūöyòh aich vē tahëng mihëṅṙö nö tainy? Kūöyòh aich vē tarik nö lōntö chanök alaha? 26Hatöököre yin vē rāchakūö ngih panam, hamūltöre inrē vē yöngṙen, nö lā-al ngam Mā, lā-al ngam Kristū Ò inrē. 27Pòn kô nö i ngih panam nö lā-al ngam töhet Kūön Meh Yēsū, ngam töhachāmö kui tö Meh, hĕnghöre Heròt, Pailĕt inrē, nö hol yip Tahëng mihëṅṙö, vē tarik Israĕl inrē, nö hamūlöre, 28Nö kahang tīre tö ngam töhalēniṙen tö Meh, nö lā-urĕh. 29Mā Tēv; ngëichkö tī cha nö pnë-elkūö, kē-ĕkūö vē kūönre Me-eṅ, hòṅ cha nö öt pinë-elkūö nö ṙô tö ngam ṙô Meh; 30Hateutnyö këlre Me-eṅ inrē; halanken, hòn lökten i Mine-eny ngam Kūön Meh, Yēsū, nup minkahngö, pinngangkūö inrē.

31Hē cha nö keuheūtô nö ve-ekūötēv, ngaich ök chūök cha nö hamūlöre, nö kayīna; ngaich ṙòkhöre cha-a nö tööḵlö tö ngam Töhet Fanöinylö; ngaich ötpa-ekūö nö ṙôtö nup ṙô ngam Tēv.

Holkūöre Acha-a Tö Nuk Chehen Cha

32Ngaich ṙòkhöre yik ṙamātö ellōnre nö hēngö ellōn, lōn inrē; öt hĕng tak tö cha tö ṙô-òv tö nup chehen nö chehen ò; ṙòkhöre pöri cha-a nöng hēngö inlānen. 33Ngaich holtö minhôiṅyö yik tanīnöṙô nö eūkö invanlö ngam Mā Yēsū; pōyen inlōnti aṅ in cha-a inrē nö ṙòkhöre. 34Öt hĕng tak tö cha tö hāṅten; pò yik tötaṙeū-euv, hēk yik töpatī-iv inrē nö inyihngö u; ngaich kētö nuk ṙāi nuk tö-inyihiyö; 35Ṙātö u ngaich nö i röön yik tanīnöṙô; ngaich kö katölhökūö höö, sālōn ngòh tö hĕng tak.

36Ngaich ang Yôsĕf, ök tökaheūkö tö yik tanīnöṙô, Parnapas, ngam töngö manah, Kūön Inṙamlōn; Lēvi ök nö tarik; aṅ Kuprös. 37Panô-òṅvö anga-aṅ, inyihngö e ngaich; ngaich kētö nuk rupīö; ngaich ṙātö u nö i röön yik tanīnöṙô.

Currently Selected:

INLAHEN 4: CANIBSI

Highlight

Copy