MATHI 3

Alimkiutsün Yohanüh Chimtsün

(Mrk 1:1-8; Luk 3:1-18; Yhn 1:19-28)

1Nungtaoko Alimkiutsün Yohan Yihuda liutsa nai shiküta nungti ngiokü chim. 2“Asam mong lüphokle, tiautenai aün nokshing shimkü noin!” 3E-po Isaiaüh “Apaou thaiutha yam nou lükhemlo; apa tsakei ao thaiutha yam lukü lüshan” ta ajantsoüh liutsa nai sang songkü vekü ngiotsün nung Yohan thaiutha noiküla. 4Yohan ne ut pon nou, naiuso omthsa ao nyikhun nou shankü the, naiuso apa eheshiu ao jongku si liu-khiam nou noiküla. 5Yirusalem naiuso Yihuda ainou naiuso Yordan Haiu lemkü noitsün shingkhannio chikü ainou khaiuniahoi apa dongai shin. 6Ngüsoüh ngüso angei awankiu ta sao, naiuso apaüh ngüso Yordan Haiu ai limkiu.

7Tilai apaüh Farisi naiuso Sadoki hai piakü apahao limkiu-iao shihakü ep, apaüh ngüso tü ngiom, “Pao thsoso, ashiao nou Goa mongmattsün ainou thakhu-ao shio-e ta asam tü sauüh lotsüo? 8Asam angei ainou mong phokle-iu ta epsanao tinkü lüchhi. 9Naiuso Abraham asam paosipo ta ngiotsün nou asam angja ainou thakhu-ao shio-e ta layang. Ngo asam tü ngioji, Goa nou nung lung ainou Abraham thsaosithsoso songiao shiokü noin! 10Pai nouso eiu nai yakü sa-anao ou nou khemkü taim; sübao pai da eiu amei tsü eiu-e nung hean-e naiuso in nai jah-an-e. 11Ngo asam mong phokle-iu ta hanao khiamai limkiuji, lüko sau jü phiai shiji apaüh to asam Asio Onthso naiuso in nai limkiu-e. Apa ngo tü songtso, ngü to apa hokkhut auo soktamkiuao tso tsümai. 12Khülam tsoploau in nou apako noin. Apaüh khülam nou apa pei ai kamtaiulo-e, lüko achüo nou to laitso tsünyattsün in nai jah-an-e.”

Yisu Khiamai Limji

(Mrk 1:9-11; Luk 3:21-22)

13Nungai Yohan hao limkiu-iao thaiutha Yisu Galil ainou Yordan ai shin. 14Lüko Yohanüh Yisu lulaoao kowekü ngiom, “Ngübao ni limkiuao noikün, nung külüko ni jü dongai shiji!” 15Lüko Yisuüh thalakü apa tü ngiom, “Lo aotü nungti athekei. Tititenai nung tsangkülu samüh Goa mongchiotsün chhi-e.” Nungailu Yohanüh ah ta thala. 16Yisu limkiukü thunkü apa haiu ainou sung. Nai apa hau aün sopkiu, naiuso apaüh Goa Onthso mükhamli saokü apatü hütsün ep. 17Nai aün ainou sang tsaküh, “Nung Ngü tsüojintsün Thso apa da ngü monglamji.” Ta ngiokü noiküla.

Currently Selected:

MATHI 3: KHIABSI

Highlight

Copy