MALAKI 3
3
1Akongting Apaou nou thalaji, “Ngo jüyam khemtaiuau jüngiongem kantsün honge. Nungaih asamüh yamtsün Apaou nou Apa Amkham tsamai alekta shi-e. Asamüh epau aiutsün ngiongem kantsün shiküta jü athalou-e welut-e.”
2 Apaou shitsün ajekhaiu nouko sauüh jeilouau shio-e? Naiuso apa shitsün taoko sauüh kiplou-e? Apa tsowoi akongting naiuso son losang- tsün in tsak khekkü noi-e. 3Tangkason thasangkü losiotsün tsak khekkü apa mikhemau shi-e. Son langtsün tsaküh tangkason naiuso chaiou lakkeng losangtsünli mesonhoi nou Apaou hau ayamtha nou chaithio nouso kankü shi-iau Apaou ngiongem kantsün nou ngüso losio kiu-e. 4Nungaih ayanan taoko naili Yihuda naiuso Yirusalem haiüh Apaou nou mongchiotsünli chaithio kankü shikü apa monglingi-e.
5Akongting Apaou nou ngioji, “Ngo asam ongko mikhemau shi-e, alonga chhitsünso, tsütsamtsütsüo chhitsünso, yaang mitha kiutsünso, chaichen nouso hau chai tsükiukü kausaiattsünso, naiuso jihi nouso, mejet nouso, naiuso gohmao khaiuniahai tü thangmangtsünso, sauhaiüh ngü tü asutsühat nungso apem tü khengshikü ngo mikhem nou kongkü kiu-e.
Ekwe Thiotsün Thaiutha:
6“Ngo Apaou noin, ngo tsüli-eshiji. Nungtiphe asam Yakob thsaosi- thsoso, lüko thumkü tsümowankü noin. 7Asam khako kihkü shitsün, asam paosiposo khekkü, asam jüngio khem ainou phoklekü khuwan naiuso tsükankei. Jüdongai laokü ashi, naiuso ngo asam dongai laokü shi-e. ‘Lüko asamüh sam adongai laokü shiau ti achhi ta?’ 8Ngo asam tü sangji, Khaiunia tsaküh Goa kausaiat au ayam noin süne? Nung ayam tsüde, külüko asamüh ngü kausaiatji.’ Ti yamko kausaiatji?’ ta asamüh sangji. Nung ekwe naiuso chaithio yamko noin. 9Asam apem chiai athesan noin, tiautenai nung mele athum nou ngü kausaiatji. 10Asam ekwe akiuau noitsün thangoikü Amkham Tsamai kankü ashi, naito nungko eheau chih saiukü noi-e. Ngo aün koukhan nouso sopkü asam hau ouk nou ngeshikü ouk kiu-e süne tsü ouk kiu-e ko ta ngü tü athelu. 11Ngo asam chihsam khiamsam paosung saosung hau tsühe-ani-e, naiuso asam sainao nouso tü sainaoshep nou chingkü eiusani-e. 12Naiuso mele chiküüh asam tü ouk eptsün mele ta jone, tiautenai asam goumchi nung akih au athang amei tsak noi-e.
Goa Nou Atsüojinyang Thaloutsün:
13“Asamüh jü thaiutha ko thsüokü tsaokü chite-iu,” ta Apaou nou ngioji. “Lüko asamüh sangji, ‘athaiutha samüh ti chite?’ 14Asamüh ngiom, ‘Goa yathsüoau pokü tsünoi. Apaüh ngiotsün chhiau, tsüdekünai samüh chhikü shitsün thaiutha samüh phiowaniu ta Akongting Apaou hau hanau ti apo noin? 15Abülom khaiunia nouso bao monglingkü noiji ta samüh epji. Tsümeikün khaiunia nouso atsüomei lu tsüde, lüko ngüsoüh Goa mongaulaiu nou ngüso angei chhi tsangkü theluji naiuso nungko aikü thakhuluao shioji.’”
16Nungaih Apaou lon hattsün khaiunia nousoüh tsaküh tsak ko chite, naiuso ngüsoüh ngiotsün tü Apaou nou ang, naiuso lula. Apa khako sauhaiüh Apaou lon hatji, naiuso asuhat kiuji, nungso nian tsüpeanau ayangsanshitsün Thsam tsak ko satthiokü taiu. 17“Ngüso jü khaiunia au the-e, ta Apaou Akongting nou ngioji. Ngo chhitsün ajekhaiu ko nai ngüso jü khaiuniatengau noi-e. Pohai tsaküh apa ngio angtsün yathsüotsün thso tsak tü atsüojinyang noitsünli ngo ngüso tü atsüojinyang noi-e. 18Lojam jü khaiuniasoüh ngü yathsüotsünso naiuso tsüyathsüokünso, asio nouso naiuso angei nouso jetko titi amomo thawaoji nung eppe.”
Currently Selected:
MALAKI 3: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
