MALAKI 1
1
1Nung Apaou ainou ngiongem Israel khaiunia hau chiteau E-po Malaki tsangkü kiutsün tsak noin.
Israel Thaiutha Apaou Atsüojin:
2“Ngo asam asaita tsüojinkü noin,” ta Apaou nou apa khaiuniaso tü ngioji.
Lüko ngüsoüh thalaji, “Ni sam tü tsüojintsün titi han?”
Apaou nou thalaji, “Esau naiuso Yakob ne adeisinio noiküla, naiuso ngo Yakob naiuso apa thsaosithsoso tsüojin, 3lüko Esau naiuso apa thsaosithsoso chinyan, ngo Esau ün king goumchi lothekü waniu, naiuso apa goh tengkam liu thainian chiu nouso kihthangau iula-i-iu.”
4Esau thsaosithsoso Edom haiüh, “Sam noksong nouso lotheaniu, lüko samüh nungso shanshi-e,” ta ngionaito, Apaou nou nungti thashi-e, “Ngüso hau lüshanlou-ishi, lüko ngo nungso loüh lothean kiushi-e. Khaiunia nou ngüso tü, ‘Nung tsümeikün shingkhannio’ naiuso ‘nungko Apaou nou asaita mongmatkü noitsün mele ta jone.’”
5Israel khaiunia nousoüh ngüso nioveiüh eppe naiuso ngüsoüh ngio-e, “Apaou oukong Israel goumchi khaiukolu tsüdekü amao goh saokü lüko noin!”
Apaou Nou Meson Nouso Tü Thsüokü Thutji:
6 Apaou nou mesonhoi nouso tü ngioji, “Thso tsaküh meshen po asuhatji, naiuso tsamki tsaküh meshen tsampao asuhatji. Ngo asam po noin- asamüh tiauta ngü asu- tsühat? Ngo asam tsampao tünaito tiauta asamüh ngü asu tsühatji? Asamüh ngü lochilotsao, külüko asamüh, ‘Samüh ni titi lochilotsao ta sangji?’ 7Nungti asamüh jü amthang chiai eheau tsümeikün eheshiu chaithio thioji. Loüh asamüh sangji, ‘Samüh ni hau asuhat titi tsükiukütei?’ Jü amthang awesan tsünoikü hantsün tsangkü ta ngo asam hau chite-e. 8Tilai asamüh ngü hau aloat chaithio nou aniopek, tsüdekünai akia, tsüdekünai achione thainian tsak kankü shiji, nungaih asamüh nung chaithio nou da aphio tsüsun ta yangjiso? Nung khekkü thainian chaithio tsak nokshingpaou hau lükiulu! Apa asam tü monglingkü tsüdekünai asam hau atsüojinyang hankü tso tsak kiuha-e mo?”
9Lo asam meson nouso, Goa, ni samko meikü athe ta sangkü lükowelu. Apaüh asam misao tsüthala-e, naiuso nung asam aphio noi-e. 10Akongting Apaou nou ngioji, “Jü amthang nai in yaang tsüjah au asam ongko tsaküh amkham tsam kou nouso kiapau shioauya ta ngo yangkiuji. Ngo asam tü tsümongling, asamüh ngü hau kankü shitsün chaithio nouso ngo tsülou-e. 11Goumchi aniokun tsak ainou aniokun tsak saokü khaiuniahoi nousoüh ngü asuhatji. Ngüsoüh alumai ngü hau angannyam nouso jahkiuji, naiuso alouau lümeikün aa chaithio nouso thioji. Ngüso chikü nou ngü hau asuhat kiuji!. 12Lüko asamüh jü amthang tü atheau tsünoi ta ngiokü nungko asamüh chinyan- tsün eheshiu chaithio kiunai asamüh ngü hau asuhat tsükiuji. 13Asamüh ngioji, ‘Sam nung chikü titi oukia au tsak noin!’ naiuso asam siuhkü khuwanji. Ngü hau kiuao kantsün chaithio nung akau loutsün thainian tsak tsüdekünai chiune tsüdekünai akia nou kankü shiji. Asam ainou nung chaithio ngo lou-e ta asamüh yangji so? 14Sauüh ngü hau kiuao apa onnemok hoi ongko thainian amei tsak thalou, lüko atheau tsünoikün thainian ngü hau aloat chaithio kiukü kausaiji, apa athesan lüthe! Tititenai ngo nokpao asong tsak noin, naiuso mele chikü ngü lon hatji.”
Currently Selected:
MALAKI 1: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
