LUK 20

Yisu ün Oukong Thaiutha Ngiosang

(Mat 21:23-27; Mrk 11:27-33)

1Nyitso Yisu amkham tsamai khaiuniahoi tü chimkü noiküla, petchehoi nouko Akhengteng mesonhoi naiuso ngiokhem tsandetsünso shikü, “ni nungti chhiao ti ayam noin?” 2“Ni hau nung oukong kiutsün sau? Ti tsangkü ni nung chhiji? Sam tü angio” ta ngüsoüh apa tü ngiom.

3Yisuüh thalakü ngüso tü ngiom, “Ngo lüko asam tü ngio tsak sangko. Ngü hao achite, 4Yohanüh limkiutsün aün ainou süne, tsüdekünai khaiunia ainou?”

5Ngüso si ngüso chitekü ngiom, “Samüh ti ngio-e? Samüh ‘Aün ainou’ ta ngionai, ‘Naito, asamüh apa tü tiau tsümonglam?’ ta apaüh ngio-e. 6Loüh samüh ‘khaiunia ainou’ ta ngionai, khaiunia apem nou sam da lung nou yakk-e, tititenai Yohan E-po tsak noin ta ngüsoüh ngekü noin.” 7Nungtiphe ngüsoüh thala, “Nung ti ainou shin samüh tsünge.”

8Yisuüh ngüso tü ngiom, “Ngo lüko ti tsangkü nung chhiji asam tü tsüngio-e.”

Sainaoshep Eiu a-tsünso Athatlu Ngio

(Mat 21:33-46; Mrk 12:1-12)

9Nai apaüh nung athatlu ngio sahoi hao chite: “Khaiunia tsaküh sainaoshep eiu an, naiuso eiu a-tsünso hao mephaiu taiukiukü goumchi amao tsakai atao laiukü thaiutha khuwan. 10Tilai be-eiuyam atao shisao, nungai eiu a-tsünsoüh apa hao sainaoshep nou kiuao ngüso dongai tsamki tsak hong; lüko eiu a-tsünsoüh apa woiatkü tsosa hongshin. 11Loüh apaüh tsamki amao tsak hongshi; naiuso apa tü lüko woikü lomiamkü kankeiküta tsosa hongshin. 12Loüh apaüh süme nou hongshi; naiuso ngüsoüh apa lüko tawaikü kuman. 13Nai sainaoshep eiupao nou ngiom, “Ngo ti chhi-e? Ngü jü thso ngo tsüojintsün honge, ngüso apa lon hat-esao!’ 14Lüko tilai eiu a-tsünsoüh apa ep, ngüso chitekü ngiom, ‘Nung tengkam kamtsün noin, samüh apa loatküta tengkam nou theko!’ 15Ngüsoüh apa sainaoshep eiu ainou komankü loat.

“Nungtiphe Sainaoshep eiupao nou ngüso tü ti chhi-e?” ta Yisuüh sang. 16“Apaüh shiküta nung eiu a-tsünso mowan-i-e, naiuso sainaoshep eiu nou amaohai hao kiuwan-e.” Ngüsoüh nung lulanai ngiom, ‘nungti to lathesai!”

17Lüko apaüh ngüso tü thapkü ngiom, ‘Naito tsamlahoi nou sübao lung tsüthekü wanan, nung tsamnou lungkheam atengao iulan, ta asiongio nai sattaiu nou ti thaiutha hanji? 18Nung lung nou chiai sau sali-e apa nelangkü phetne-e; naiuso sau tü nung salut-e nungüh apa pukhaoli thionyoman-e.”

Liukim Kiutsün Thaiutha Ngiosang

(Mat 22:15-22; Mrk 12:13-17)

19Nung athatlu ngio nou ngüso tü ngioji ta ngelakü, ngiokhem tsandetsünso naiuso atengteng mesonhoi nousoüh Yisu nung athang nailu thalou-ao kowe; lüko ngüso khaiuniahoi lon hatkü noiküla. 20Nungtiphe ngüsoüh akuo amei ta yam. Ngüsoüh Rom nokpao phamongko apa oukong nai kiuwanao thaiutha apaüh chitetsün ngio nai tsütsüokü nou thalouao jiokü asiohoili aliluao hong. 21Ngüsoüh apa tü sangkü ngiom, “Atsandetsün, ni ngiotsüo ngioji naiuso tsandeji, naiuso phaphi phamong tsüchhiji, lüko ngiotsüo nou Goa yam chimji, ta samüh ngen. 22Samüh Caesar hao liukim kiutsün nung sam Ngiokhem thako noin süne tsüde?”

23Lüko ngüso akaosai ngekü Yisuüh ngiom, 24“Ngo hau tangka tsak ahan. Nung sau sotsom naiuso sau niansat?”

Ngüsoüh ngiom, “Caesar.”

25Apaüh ngüso tü ngiom, “Naito ti Caesar ün nung Caesar hao lükiu, naiuso ti Goa ün nung Goa hao lükiu.”

26Ngüsoüh khaiuniahoi dongko apaüh chimtsün nai thalouao tsüshiokü noiküla, naiuso apaüh thalatsün nai ngüso tsüsingiokü ngala-an.

E ainou Ahkü Shitsün Thaiutha Ngiosang

(Mat 22:23-33; Mrk 12:18-27)

27Nungai e nouso ahkü tsüshi-e ta chitetsün Sadoki ajantso apa dongai shin. 28Ngüsoüh apa tü sangkü ngiom, “Atsandetsün, khaiunia ajantso adei nou thso tsühakü menyiu nou taiukü ean nai anio nou nung menyiu louao noin, naiuso apa thaiutha tengkam sung-iao noin ta Mosaüh sam hao sattaiu kiu. 29Nungtiphe adeianio chinyat noiküla; naiuso thsoyam chong nou menyiu tsak lou, naiuso thso tsühakü ean. 30Nai nime nou apa lou, 31naiuso süme, naiuso nungti chinyat chikü nou lou lüko thso tsühakiukü ean. 32Nungphiai menyiu nou ean. 33Nungtiphe e nouso ahkü shinai ngüso ongko menyiu nou sauüh the-e? Tititenai chinyat nouso chikü nou menyiu apalu lou.”

34Yisuüh ngüso tü ngiom, “Nung goumchi khaiunia nou meshen tsamsigoh shankü melo tsamai khuji. 35Lüko melo naiuso menyiu sauhai müjam ahkü shiao maikü noin, ashiao nou goumchi ai tsamsigoh tsüyang-e. 36Tsüdekünai loüh ngüso tsü-e shi-e; tititenai ngüso e ainou ahshitsün thsosophe aün honghoi nousoli ngüso Goa thsoso noin. 37Lüko tilai Mosaüh pai-eng nai Apaou tü Abraham Goa, Isak Goa naiuso Yakob Goa ta jon, apaüh e nouso ahkü shi-e ta chim. 38Nungtiphe apa e nouso Goa tsüde, lotü aa noinso Goa, tititenai apem nou apa da aa kihji.”

39Ngiokhem tsandetsünso ajantsoüh thalakü ngiom, “Atsandetsün! ni meikü ngio-iu.” 40Tititenai ngüsoüh apa tü ngio piakü sangao tsüsom.

Mesia Thaiutha Ngiosang

(Mat 22:41-46; Mrk 12:35-37)

41Apaüh ngüso tü sang, “Mesia David thso ta ngüsoüh titi ngioji?

42Tititenai David apa pemüh Nianlom Jih thsam nai ngioji,

‘Apaou nou jü Apaou tü ngiom:

Ngo a-ehso ahok khemai motaiukün lektso,

43Ni ngüko uai anoi.’

44Davidüh apa tü ‘Apaou ‘ta jonnaito, Apa David thsaosithso theao shio-e süne?”

Yisuüh Ngiokhem Tsandetsünso Thako Lotsüoji

(Mat 23:1-36; Mrk 12:38-40)

45Khaiunia apem nou angkü noinai apaüh apa sahoiso tü ngiom, 46“Sauhaiüh ne laiukü tenkü tsakeiao, chaikamthang nai salam lou au, Yihuda kamthang nai asong noikham naiuso nyong khako asong aiuji; 47naiuso jihihoi tsam puploukü akaosai nou laiukü mi saokü hanji; nungso Ngiokhem tsandetsünso thaiutha lütsüolo, ngüso angja atsaoteng noi-e!”

Currently Selected:

LUK 20: KHIABSI

Highlight

Copy