YOB 2
2
Biya Nou Yob Lilushiji
1Nyitso loüh Goa ün thsoso Apaou khako kamshin, nungai Biya nou ngüso ongko noiküla. 2Apaou nou apatü sangkü ngiom, “Ni ti ainou shin?”
Biya nou thalan, “Goumchi nai akhu ashi, naiuso asung asao ta tsakeitsün ainou shin.”
3 Apaou nou sangkü ngiom, “Ni jü tsamki Yob ngesanmo?” “Nung Goumchi ko apali amei naiuso amongtsamtsün tsaktso tsünoi. Apaüh ngo amkhamji naiuso tsü- meikün tsüchhisiyaau tsüolokü noin. Ti koko ta tsüdetengkü apatü apha po-iau ni ngo ta kojakü noiküla, lüko Yob to lo naiuso asai thaiutha monglamkü noin.”
4Biya nou thalakü ngiom, “Aa nou noi au thaiuthako khaiunia tsaküh apaüh taiunou alum wanan-e. 5Lüko lo apa pem tawainai apaüh akhako ni lochi-e!”
6Nungtiphe Apaou nou Biya nou ta ngiom, “Apem mein, apa a-oukong khemko noin, lüko ni apa tsüloat-e.”
7Nungai Biya nou Apaou khako nou pungekü khuküta Yob pem thapokkü chaikia nou sung-in. 8Yob nung achinyan beisikin yaktaiutsün nai khukü moknoi küta apa chaikia mou nai kutau lakpai tsak lokü noiküla. 9Apa tsammongnyiuüh apatü ngiom, “Ni lo saokü nung khako lilu mongkiukü noian, nungti süne tsüde? Ni tiauta Goa hau athesankiu küta tsü-elowan?”
10Yobüh thalakü ngiom, “Ni ti ayanglu tsünoikü singioji! Tilai Goa nou sam hau tso amei tsak hongji, samüh nung monglingkü loji. Tilai apaüh sam dongai angja hongji sam titi namnamau shio-e?” Apa alumai angja eplüko, Yobüh Goa thako tsümeikü titso tsüsingio.
Yob Paiusihaiso Shiji
11Yob ün paiusihai süme nouso Teman noknio ainou Elifaz, Shua hai goumchi ainou Bildad, naiuso Naama hai goumchi ainou Zofar so noiküla. Tilai ngüsoüh Yob angja omhetsün lulan, ngüsoüh apa mong losongkiu-ao thatloum. 12Ngüso yam laiukü aita Yob epküla, lüko ngüsoüh apa tsütsangshei. Tilai ngüsoüh Yob tsangshei, ngüso shapau naiuso mongsaiuau yachu, ngüso amongsaiu nou ngüso neshe chipek naiuso pukhao loküta koi ai soksan naiuso ngüso khaiuai tsomlut. 13Nungai ngüso Yobko hakü ajekhaiu chinyatnyi naiuso chinyatsoh ngiopem tsaktso tsüngiokü goh-ai moknoi, tiautenai apa titi thatso angjakü noiküla nung ngüsoüh ep.
Currently Selected:
YOB 2: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
