APUNG ANYIM 9
9
Noa ko Goa Athalu-e
1Naiuso Goa nou Noa naiuso apa thsoso ouk kiukü ngüso tü ngiom, “Chetsinyim küta goumchi miankü shingkü lükhu.” 2Thainian apem, waio nouso naiuso ngou nouso asamlun hatkü kih-e, ngüso apem asam oukong khemai noi-e. 3Kiansinga asangnya ngo asam hao kiutsünli, lemlemkü aa noitsün apem asam thaiutha eheshiuau noi-e. 4Lüko nyih aa nouko she sunkü asamüh lahe. 5Ajantsoüh khaiunia aa nou loatnai, apa tü thamshi-e, thainian ou ajantsoüh khaiunia loatnai ngo ee nou thamshi-e. 6Sauhaiüh khaiunia ün she lopenge, apa she lüko khaiunia noulu lopengshi-e, tititenai Goa kheknai apaüh khaiunia shan.
7Asam chetsinyim küta shingkü lükhu, goumchi miankü chetsinyimkü naiuso shingkü lükhu. 8Goa nou Noa naiuso apa thsoso tü chitekü ngioji, 9“Athaplu, Ngo asamko Jü Athalu-etsün shanji, naiuso asam phiai asam thsaosithsoso ko, 10naiuso asam ko noitsün aa thainian apem: waio nouso, tsam thainian nouso, goumchi liutsa thainian pungkü, kheng ainou shikhutsün goumchi thainian apem ko ngo nung shane. 11Naiuso ngo asam ko Jü Athalu-etsün shaniu, küta loto aa apem shelei nou tsülomoshi-e, tsüdekünai goumchi lomoau shelei laitso tsünoishi-e. 12Naiuso Goa nou ngiom, Ngo si asam, naiuso asam ko aa noitsün chikü jetko, athontsüyang vetao saokü, Jü Athalu-etsün ii nung noi-e: 13Ngo thengmia nai jü theng- miathsan taiukiuji, naiuso nung ngo si goumchi jetko athaluetsün ii noi-e. 14Tilai ngo goumchi khütha nai thengmia nouso kankü shiji, nungai nung thengmiathsan nou thengmia nai eppe. 15Jü Athalu-etsün nung: ngo si asam naiuso aa thainian apem jetko aa nou soimokü hao shelei loto tsünoishi-e. 16Naiuso thengmiathsan nou maou nai noi-e, naiuso goumchi nai noitsün aa ong ainou aa thainian apem jetko athontsüyang athalu-etsün yangsanao thaiutha ngo nungtü thape. 17Naiuso Goa nou Noa tü ngiom, Nung Athalu-etsün ii ngo si goumchi nai noitsün aa apem jetko ngo mongkü shaniu.”
Noa naiuso Apa Thsoso
18Naiuso Noa thsoso sauhai kheng ainou saom, ngüso Shem, Ham, naiuso Japet noiküla, (Ham nung Kanan po noiküla.) 19Noa thso nung süme nouso goumchi nai khaiunia apem paosiposo noin.
20Noa eiu ah khaiunia tsak noiküla, apa sainaoshep eiu ah tsün ayating khaiunia nou noiküla. 21Naiuso apaüh theng shiukü tokkü iulaküta apa tsosa nejenkhio nai noiküla. 22Nungai Ham, Kanan poüh meshen po tsosa epkü apaüh deisinio nime tü kengai shikü chiten. 23Nungai Shem si Japet neüh nepat tsak kankü shikü nung ngüne sangdongkhaiu ai woilutkü phiai lekkü shikü ngüso po tsosa noitsün tenpokkiu, naiuso ngüso kha phiai shikü noiphe ngüsoüh ngüso po tsosa noi nou tsüep. 24Naiuso Noa apa thengtok ainou thsümon küta apa thso niophi nou apa tü ti chhin, nung ngelakü iula. 25Küta apaüh ngiom,
“Kanan tü athesan tsak lünoi!
Apa meshen desinioso sua tsak noi-e.
26 Apaou, Shem Goa nian lülom!
Kanan to Shem sua noi-e.
27Goa nou Japet lüloshingkiu!
Apa thsaosithsoso to Shem khaiuniaso ko lükiha-i!
Kanan to Japet sua noi-e.”
28Shelei phiai Noa pon 350 kih 29küta loüh apa 950 aakihlaiu pon kihshikü ean.
Currently Selected:
APUNG ANYIM 9: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
