APUNG ANYIM 47
47
1Nungtiphe Yosepüh apa deiso khaiunia pungo nialoküta nokpao dongai khu. Apaüh ngiom, “Jü po naiuso jü deisinioso Kanan ainou ngüso onnemok hoi, thainian ahoi ahoi, nouso naiuso ngüsoüh thataiutsün apem kankü shikü noin. Ngüso lo Goshen khiamkhan ai noin.” 2Nungthankü apaüh apa deisinioso nokpao hau han, 3Nokpao nou ngüso tü sangkü ngiom, “Asamüh ti chhiji?”
Ngüsoüh thalakü ngiom, “Sam paosiposo lilu sam lüko onnemok jimhoi noin, Apaou” 4“Sam nung goumchiai kih au shikü noin, tiautenai Kanan goumchi nai naiusile nou thatü thsüokü noin küta sam thainian hoi thaiutha atsam- heau thsan tsünoi. Tsüojinyangkü sam hau Goshen khiamkhan nai kih- au ayam asop kiu.” 5Nokpao nou Yosep tü ngiom, “Lo apo naiuso adeisiniosoüh shisao-iu, 6Ijip goumchi ngüsoün noin; ngüso Goshen khiamkhan nai lünoi-i, nung goh haoson ameiting tsak noin. Naiuso ngüso ongko ajantso chhi shiokü hauli khaiunia hanaito, ngüso jüthainian ta paotsangau ataiukiu.”
7Nungaih Yosepüh apa po Yakob nialokü shiküta nokpao hau han, Yakobüh nokpao hau apa ün ouk kium; 8küta nokpao nou apa tü sangkü ngiom, “Ni achetpon titso?”
9Yakobüh thalakü ngiom, “Jü aakihlaiu pon 130 noin. Nungso pon thsaothsaokülu naiuso achek pon, jü paosiposo ngüso tsakeitsün aakihlaiu pon khekkü tsüde.” 10Yakobüh nokpao hau apunge ouk kiuküta tsalokü khuwan. 11Nungaih Yosepüh apa po naiuso deisinioso Ijip nai kihlo-i, nokpao nou thoiluttsün li, ngüso Rames noknio shimkü goh ameiting nai jengtsaiu kiukü kih-i. 12Yosepüh apa po, deisinioso, naiuso apa po tsammonghoi, apem hau ehenting nai saolaokü eheshiu kiu.
Naiusile
13Khülam tiaitso tsütaiukü naiusile thatü thsüokü noi nou, Ijip naiuso Kanan khaiuniahoi naiusile nou tsaosilaokü iula. 14Ngüsoüh khülam tuh phe Yosepüh chai apem khailoküta nokpao tsamai kankü khu. 15Ijip hai Yosep dongai shiküta ngiom, “Sam hau khülam akiu! Sam lamowan-i. Tso tsak achhikiu! Sam tangka apem khemaniu.” 16Yosepüh thalakü ngiom, “Asam tangka apem khemaniu tünaito, asam thainianso kankü ashi, ngo asam hau khülam nung liko kiu-e.” 17Nungtiphe ngüsoüh Yosep dongai ngüso thainianso kankü shiküta ngüso thainian mokthso hoi, onnemok hoi, won hoi, jangtso hoi, naiuso gado hoi liko apaüh ngüso hau khülam jankium. Nungpon Yosepüh thainian liko khülam he-ekiukü ngüso tsad.
18Nungthan pon nai ngüso apa dongai shikü ngiom, “Samüh akhako ayam thanou tsütsange, Apaou, küta sam tangka apem khemaniu naiuso sam thainianso athaiutha noin. Nungko samüh ni hau kiuau sam pem naiuso sam goumchi tü simkü amao ti kiuau tsüpoishi. 19Sam lamowan-i. Tso tsak achhikiu! Sam goumchi nouso sam hau lalean-i. Sam naiuso sam goumchi khülam thaiutha ko he-ekü atuhlowan. Sam nokpao sua au the-e, naiuso sam goumchi apaüh theane. Sam aakih noiau sam hau khülam nou akiu, naiuso sam goumchi nai lethioheau chihle nou akiu.”
20Yosepüh Ijip goumchi apem nokpao thaiutha tuhlo. Tiautenai naiusile thatü thsüokü noiphe, Ijip hai apemüh momo goh jananaolu noiküla, küta nung goh apem nokpao ün jengtsaiu iula. 21Yosepüh Ijip goumchi aniokun tsak ainou aniokun tsak ai ta khaiuniahoi sua au iula-i. 22Goh sübao apaüh tsütuh loha, nung goh mesonhoi haoson noiküla. Ngüsoüh ngüso goh ajanao tsünoi, tiautenai nokpao nou ngüso hau nungko kih-iau kiukü noiküla. 23Yosepüh khaiuniahoi nou tü ngiom, “Asamüh athaplu, ngo lo asam naiuso asam goh nokpao thaiutha tuhwaniu. Asamüh asam eiu ai lethioau nungai lelu noin. 24Be-eiuyam taoko asamüh haoson pungo nou jansanküta nokpao hau kiuau noin. Asamüh apoi nou leluao naiuso asam si asam tsammonghoi thaiutha eheshiuau lükankei.”
25Ngüsoüh thalakü ngiom, “Ni sam aa nou kipsankiu, ni sam ko meikü shin; Apaou, naiuso sam nokpao ün sua au the-e.” 26Nungtiphe Yosepüh Ijip ün goumchi haoson pungo nou nokpao haoson au theau ngiokhem tsak shan. Nung ngiokhem lonyi saokü aa naiuso oukong nai noin. Mesonhoi goh haosonlu nokpao jengtsaiu au tsüiula.
Yakobüh Aphiteng Kojatsün
27Israel hai thso Ijip nai Goshen khiamkhan ai kih, küta nungai ngüso memei naiuso thsohai piakü shingkü khukü iula. 28Yakob, Ijip nai apa achetpon 147 tü thalutkü pon chekü chinyat kih. 29Tilai apa thaiutha eanau atao shimkü shin, apaüh apa thso Yosep jon küta ngiom, “Apha jüsiokha chiai ataiu, küta ngo Ijip nai tsükhanane ta ngiomong shinge tsak ashan. 30Ngo jüposo khan taiunai khananha-iau aiuji; ngo Ijip ainou akanlükhun küta ngüso tiai khankü noin nungai akhananha.”
Yosepüh thalakü ngiom, “Ni ngiotsünli ngo chhi-e.”
31Yakobüh ngiom, “Ni chhi-e ta athalo tsak ashan,” küta Yakobüh apa then ai noikü nianlom kiu.
Currently Selected:
APUNG ANYIM 47: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
