APUNG ANYIM 45

Yosepüh Apa Deisinioso hau Apa Sau nung Chiteji

1Yosep, apa tsamkiso khako apa ayanghetsün thakipao tsüshiokü iulawan, nungtiphe apaüh ngüsotü chikü tsam ainou asoian ta ngiokhem kiu. Yosepüh apa deisinioso tü apa sau ta chitetsün taoko nai apa ko amao hai sautso hakü tsünoiküla. 2Ijip haiüh lukü apa monglub tsüthashikü sang songkü shap, naiuso nung ngiongem nou nokpao tsam saokü kankü khu. 3Yosepüh apa deisinioso tü ngiom, “Ngo Yosep. Jü po lo saokü aa noin süne?” Lüko tilai apa deisiniosoüh nung ngio lula, ngüso thatü lekkat küta ngüsoüh athashiau tsüshio. 4Nungaih Yosepüh ngüso tü ngiom, “Tsüojinyangkü shimkü ashi.” Ngüso shin, küta apaüh ngiom, “Asamüh sau Ijip nai janthiowan, nungh Ngo asam nio Yosep.” 5Loto layangelat, tsüdekünai asam si asam lalochi-e, tiautenai asamüh ngo nungko janan. Khaiuniahoi aa nou kipsanao asam khako hongtaiutsün nung: atsüoting Goa nou noiküla. 6Goumchi nai naiusile nung pon nime noulu noin, loüh pon pungo noishi-e, nungko eiu ah naiuso be-eiuyam tsünoi-e. 7Asam naiuso asam thsaosithsoso naiusile ainou kipsaniu ta tsangsheiau nung athanga chhisiya nouko Goa nou ngo asam kipsanau asam khako hong. 8Nungtiphe ngü nungai hongshitsün atsüoting nou to asam tsüde, lüko Goa nou noin. Apaüh ngo nokpao ün atsokteng asonghoi ongko tsak shankiu. Apa ün goumchi apem paotsangao ngo noin; Ijip goumchi apem khako ngo nokshing shingji.

9“Loto liukü jü po dongai laokü khuküta nung apa thso Yosepüh ti ngioji, nung lüchite: ‘Goa nou ngo Ijip goumchi apem khako nokshing ao shankium; tsütsangkü jü dongai ashi. 10Asam, naiuso asam thsoso naiuso thsaoso, asam onnemok hoi, asam won hoi, asam janghoi, naiuso asamüh taiutsün alum hakü, ngo shimkü Goshen Khiamkhan nai kih au shio-e. 11Asam tilai Goshen nai kih-e, ngo asam paotsangau shio-e. Nungai loüh naiusile nou pon pungo noishi-e; küta ngo asam naiuso asam tsammongso, asamüh kamtaiutsün thainian hoi, naiuatkü noi-iau tsüaiu.’”

12Yosepüh tsülaokü chiteshiji, “Lo asam apemüh, naiuso Benjaminüh lüko ngo atsüoting ta eppe. 13Ngo nungai Ijip nai titi oukong sunkü noin, nung jü po hau lüchite naiuso asamüh epkü shitsün alum thaiutha apa hau lüchite. Küta liukü khukü apa nungai nialokü ashi.”

14Apa pha nou apa nio Benjamin piplokü shapao yachu, apaüh piptsün ko Benjamin lüko shap. 15Nung ashaptsün tsülaokü, apaüh apa deiso pungkü piplo küta son nai chep. Nung phiai apa deisoüh apa ko chiteau yalo.

16Tilai nung ngem nou nokpao tsam shingoi, nokpao nou naiuso apa khemko asonghoi nouso monglingkü noiküla. 17Nokpao nou Yosep tü ngiom, “Adeiso tü ngüso thainian thsa kanao khemlo küta Kanan goumchi nai laokü lüyashi ta lüngio. 18Ngüsoüh ngüso po naiuso ngüso tsammongso nialoküta nungai laokü ashi-i. Ngo ngüso hau Ijip ün ameiting goumchi nou kiu-e, küta ngüso kih-au thaiutha saiukü eppe. 19Ngüso tü Ijip ainou ngüso tsammongnyiuso, naiuso methso ehen hoi naiuso ngüso ko hakü ngüso po nialokü shiau mokthso nou kankeitsün tsamkei ta lüngio. 20Ngüso thang si eiu jengtsaiu noitsün wankü khuwanji ta ngüso yangelat au tsünoi; tiautenai Ijip goumchi apem ko ameiting goumchi nou ngüso ün noi-e.”

21Yakob thsosoüh ngüso tü ngiotsünli chhin, Nokpao nou ngiokhem kiutsünli, Yosepüh ngüso hau mokthso nou kankeitsün tsamkei, naiuso yamai hau chihsen kium. 22Yosepüh ngüso pungkü hau neshe jamjam liloau kium, lüko apaüh Benjamin hau to tangkason tsom süme naiuso neshe pungojam lilo au kium. 23Apaüh apa po hau Ijip hai jengtsaiu ameiting nou gado che hau thsa yamkiu naiuso khülam naiuso themtsai, naiuso amao süme thaiutha chihsikhiam gado thsakan che ta yamkiukü hong. 24Apaüh apa deisinioso hongan küta ngüso khutsün taoko, ngüso tü ngiom, “Yamai lali-ekü lüya.”

25Ngüso Ijip ainou tsalokü Kanan nai ngüso po Yakob dongai laokü yashin. 26Ngüsoüh apa hau chitekü ngiom, “Yosep losaokü aa noin!” apa Ijip goumchi apem chiai nokpao thekü noin. Nungai Yakob lekkatkü aiula, naiuso ngüso tü mong tsülamkü noiküla.

27Lüko tilai ngüsoüh apa hau Yosepüh ngiotsün apem chiten, naiuso tilai apaüh apa nialoau mokthso nou kankeitsün tsamkei Yosepüh hongtsün ep, apa lekkatkü aiulatsün ainou meikü thsümounkü iula. 28Apaüh ngiom, “Jü thso Yosep losaokü aa noin!” Nung apem ngo sangtsün thawao-iu! “Ngo mo eankün khako ngo khuküta apa ko eppe-e.”

Currently Selected:

APUNG ANYIM 45: KHIABSI

Highlight

Copy