APUNG ANYIM 42

Yosep Deisinioso Ijip nai Khülam tuh Khuji

1Tilai Yakobüh Ijip nai khülam taim ta ngela, apaüh apa thsoso tü ngiom, “Asamüh tiau tso tsak tsüchhiji? 2Ngü Ijip nai khülam taim ta luji, nungai khuküta sam eanau naiutsün ainou thakhuau khülam intso lütuh.” 3Nungtiphe Yosep dei che nouso Ijip nai khülam tuh saom, 4lüko Yakobüh Yosep nioteng Benjamin ngüso ko tsühongha; tiautenai apa tü tso tsak thawao nai tsümei-e ta hatkü noiküla.

5Yakob thsoso amao haiko hakü khülam tuh shin, tiautenai nungh Kanan goumchi nai naiusile noiküla. 6Yosep nung Ijip goumchi ko nokshingpaou phe, goumchi apem hau khülam jankiu kü noiküla. Nungti Yosep ün deiso shiküta ngüso kha goh ai apa khako kauthio. 7Tilai Yosepüh apa deiso ep, apaüh ngüso ngesan, lüko apaüh ngüso tsüngeli ngüso tü han. Apaüh ngüso tü kongkü sangkü ngiom, “asam ti ainou shin?”

Ngüsoüh thalakü ngiom, “Sam Kanan ainou khülam tuh shin.”

8Yosepüh to apa deiso nge lüko, ngüsoüh to apa tsüngeshi. 9Apaüh apa mea mean ngüso thaiutha meantsün yangshi küta ngiom, “Asam akautha hoi; asam sam goumchi tiko outsükong kü noin, nung lusanau shin.”

10Tsüde Apaou, ta ngüsoüh thalakü ngiom, “Sam atsamki nouso li khülam tuh shin. 11Sam apem deisinio noin. Sam akautha hoi tsüde, Apaou, sam ngiotsüo khaiuniahoi noin.”

12Yosepüh ngüsotü ngiom, “Tsüde! Asam sam goumchi tiko outsükongkü noin nung kautha au shin.”

13Ngüsoüh ngiom, “Sam apem nai deisinio chekü nime noiküla, Apaou, nung Kanan goumchi nai khaiunia tsak ün thsosolu noiküla. Nio tsak eaniu, naiuso niophiteng nou lo sam po ko noin.”

14Yosepüh thalakü ngiom, “Nung ngü ngiotsün khekkü noin.” “Asam akautha hoi, 15nungli asam tü thelu-e: ngo nokpao nian tsangkü ngiomong shinge ngio ngioji, nung asam niophiteng nou nungai moshikün lektso asam tilaitso nung ainou tsükhu-e. 16Asam ongko tsak khuküta apa nialokü ashi. Apoi nouso ehükü asam ngio ngiotsüo nou mothelukün lektso wane. Tsüde- künaito, nokpao aa noitsün lektso, asam akautha hoi.” 17Küta apaüh ngüso samnyi thaiutha akho tsamai wanan.

18Samnyap nouko Yosepüh ngüso tü ngiom, “Ngo Goa lun hattsün khaiunia tsak noin, küta ngo asam aküo tsak taiukü nailu asam aa poikiu-e. 19Asam ngiotsüo khaiuniahoi ta ngeau asam ongko tsak nung akho tsamai asam taiutsün nai anoi; küta apoi nousoüh asamüh tuh taiutsün khülam nou kankü naiusile tsammonghoi dongai khuau shio-e. 20Küta asamüh asam niophiteng jü dongai nialokü shiao noin. Nungüh asamüh ngü hao ngiotsüo chite ta hane, naiuso ngo asam tsüloatte.”

Ngüso nungtü mongchio, 21küta tsaküh tsak tü chitekü ngiom, “Ah, lo sam angjatsün nung samüh sam nio ta ti chhin nung chhi mai laokü epji; tilai apaüh sam tü ahachu saom, nungai samüh apa thatü angjakü epküla, lüko samüh tsüanglo. Nung shioko sam lo nung angja nai noin.”

22Reubenüh ngiom, “Ngo asam tü melothso nou ta tawaikü lachhi ta ngiom, lüko asamüh tsüanglo. Küta lo sam apa etsün thaiutha amai laokü epshiji.” 23Yosepüh ngüso ti ngemji nung ngelakü noiküla, lüko ngüsoüh to nung tsünge, tiautenai ngüso apako ngiothun hakü chite. 24Yosep ngüso wankü khuküta shapao yachu, tilai apaüh ngio chiteao shiokü iula, apa laokü shin, ahoi ong ainou Simeon tenloküta apaüh ngüso khako kekü taiukiu.

Yosep Deisinioso Kanan nai laokü Yashiji

25Yosepüh apa deiso nekong khülam nou meankü saithio kiuau ngiokhem kiu, küta ngüso pungkü ün tangka momo nekongai laokü thiokiushi, naiuso ngüso yamai thaiutha thaisamao chishen khemkiu; nung ti chhikü noiküla. 26Apa deisoüh ngüso gado hau thsa nou yamkiukü khemkiu, küta ngüso pungekü khu. 27Yamko shamtsün taoko sotso, ngüso ongko tsaküh apa gado hau achih waoau apa nekong sopthapnai apa tangka nekong mongko achiai epsan. 28Apaüh apa deiso jonkü ngiom, “Jü tangka to ngü hao laoshian-iu.” “Nungh nungko jü nekong nai noin!” Ngüso mong taokü saokü, ahat nou ngüso tsak si tsak sangekü ngiom, “Goa nou sam tü ti chhin?”

29Tilai ngüso Kanan nai ngüso po Yakob dongai shin, ngüsoüh apa hau ngüso tü thawaotsün apem chiten. 30“Ijip nokshingpaou nou sam tü kongkü ngiom, naiuso apaüh sam tü apa goumchi outsükong kautha au shin ta mi kiukü ngiom. 31Samüh thalakü ngiom, Sam akautha hoi tsüde, sam ngiotsüo khaiuniahoi noin. 32Sam po tsak thso nou apem nai chekü nime noiküla. Nio tsak eaniu, naiuso niophiteng nou losaokü Kanan nai sam po ko noin. 33Nung khaiunia nou thalakü ngiom, Nunglo ngo asam ngiotsüo khaiuniahoi naito thapsane. Asam ongko tsak ngü ko noiküta, apoi nousoüh khülam nou asam naiukü noitsün tsammonghoi thaiutha kankü ta lükhu. 34Asam niophiting nou jü dongai nialokü ashi; nungailu ngo asam akauthahoi tsüde, lüko ngiotsüo khaiuniahoi ta nge-e; ngo asam nio asam hau laokü kiushi-e, küta asam nungko chaile he-kü noiau shio-e.”

35Nungaih tilai ngüsoüh momo nekong lokeng, khaiunia pungkü nou momo tangka nekong epsan, naiuso tilai ngüso si ngüso poüh tangka tsop nou ep ngüso hatkü iula. 36Ngüso poüh ngüso tü ngiom, “Asamüh jüthsoso apem ean-iau aiuji süne? Yosep khuwaniu; Simeon khuwaniu, naiuso loüh asamüh Benjamin kankü khuau aiuji. Omhetsün to ngo lu noin!”

37Reubenüh apa po tü ngiom, “Ngo Benjamin laokü tsükanjikan shi naito, ni jüthso nime nou loattau shio-e. Apa jü apaotsang nai ataiu, küta ngo apa laokü nialokü shishi-e.”

38Lüko Yakobüh ngiom, “Jü thso asam ko khuau tsüshio-e; apa dei eaniu, naiuso apa pemsalu poikü noin. Apa tü yamai tso thawaokü tso-e. Ngo sonthepao tsak noin, naiuso asamüh mongsaiu losantsün nou ngo loatte.”

Currently Selected:

APUNG ANYIM 42: KHIABSI

Highlight

Copy