APUNG ANYIM 38

Yihuda naiuso Tamar

1Nungtao thatso ko nai Yihudaüh apa deisinioso wankü Hira ta niankü khaiunia tsak sau Adullam noksong ainou noiküla, apako kiha au khu. 2Nungaih Yihuda Shua ta niankü Kanan pohai tsak thso menyiuthso tsak ko phete. Apaüh nung menyiu tsamsigoh yang, 3küta apahau melothso tsak chetkiu, apaüh apa nian Er ta niankiu. 4Loüh apa pem tsükengkü iulashi küta melothso tsak chetkiu, apa nian Onan ta niankiu. 5Loüh apaüh melothso tsak chetshi, apaüh apa nian Shela ta niankiu. Nung melothso chet taoko apa Akzib nai noiküla.

6Apa thso yamchong Er thaiutha Yihudaüh menyiu tsak eplo apa nian Tamar ta niankü noiküla. 7Er ün saisile tsümeikü noiküla, küta nungüh Apaou tsümonglingi, nungtiphe Apaou nou apa loattan. 8Nungaih Yihudaüh Er ün nio Onan tü ngiom, “Khuküta adei tsammongnyiu jihi nouko lükamha, nung nyiuhai nouko tsammongpo nou chhiau chhisiya lüchhi, küta adei thaiutha thsaosithsoso asungi.” 9Lüko Onanüh achetsinyim nou apa thaiutha tsüde ta ngeküta, apaüh meshen dei tsammongnyiu ko kamhanai, apaüh meshen dei hau lelu nou tsükiuau thaiutha, lelu iulatsün nüo nou goh ai chan-an.

10Apaüh ti chhin nungüh Apaou tsümonglingi, küta Apaou nou apa lüko loattan. 11Nungaih Yihudaüh apa le Tamar tü ngiom, “Apo tsamai laokü shiküta nungai jüthso Shela mosungkün lektso jihi tsakli lünoi.” Apaüh nung ngiotsün Shela lüko apa deiso li loattane nou ta hat nou shioko ngiokü noiküla. Nungtiphe Tamar apa po tsamai laokü shian.

12Atao intso noiküta Yihuda tsammongnyiu ean. Tilai apaüh amongsaiu tao thunlokü shin, apa naiuso apa hai Adullam hai nou Hira ne apa onnemok pun tippantsün nai Timna ai khu. 13Ajantsoüh Tamar hau apa kaio Timna nai onnemok pun tippantsün nai khuji ta chite. 14Nungtiphe apaüh jihi neshe nou leankü, apa kha ne nou loipok küta, Timna nai khutsün yamko, Enaim noksong nai naptsün bekhan ko moknoi. Yihuda thso niophi Shela loto sunganiu ta apaüh meikü ngekü noiküla, nungti lüko nyiuhai nou loüh apa ko tsamsigoh yangau mokiukü noiküla.

15Tilai Yihudaüh apa ep, apaüh nung nyiuhai nou ajisiwop chhitsün tsak ta yang, tiautenai apaüh meshen kha loipokkü noiküla. 16Yihudaüh nung nyiuhai dongai yamkok nai shiküta ngiom, “Mei, ni amai titso saoji?” (Apaüh nung nyiuhai nou apa le ta tsüngekü noiküla.)

Apaüh ngiom, “Ni ngü hau ti kiu-e?”

17Apaüh thalakü ngiom, “Ngo jü wonhoi ainou wonthso tsak honge.”

Nyiuhai nou ngiom, “Mei, Ni won nou mohongshikün lektso, athalu-e tsakli taiuau, nungaito ni ngü hau tso tsak akiu.”

18Apaüh sangkü ngiom, “Ngo athalu-e li taiuau ni hau ti kiu-e?”

Nyiuhai nou thalakü ngiom, “Ni nou niansat thaoluttsün ko auo nou hakü naiuso ni kankü noitsün pailai nou akiu ta ngiom.” Küta apaüh nungso kiuwan. Küta ngüne emsaikü noiküla, küta nyiuhai nou pem tsükengkü iula. 19Tamar apa tsamai laokü yaküta, apa kha lopoktsün ne lowan, küta jihi neshe nou tholoshi.

20Yihudaüh apa baio Hira nung nyiuhai ainou won naiuso jengtsaiu apaüh thalotaiu nou laokü kankü shiau thaiutha hong, lüko Hiraüh nung nyiuhai nou tsüep. 21Apaüh Enaim nai noitsün ajantso tü sangkü ngiom, “Nung yamkok ko noitsün ajisiwop nyiuhai nou tiai?”

Ngüsoüh thalakü ngiom, “Nungko ajisiwop chhitsün tilaitso tsünoi.”

22Apa Yihuda dongai laokü shiküta ngiom, “Ngo nung nyiuhai nou tsüepsan, Nungai noitsün khaiuniahoi nou ngiom, nungko ajisiwop chhitsün tsak tilaitso tsünoi.” 23Yihudaüh ngiom, “Apaüh jengtsaiu nou lütaiuko. Samüh khaiuniahoi nou sam tü nyailutiau tsüaiu. Ngo apa hau amai kiuwaniu, lüko ni apa tsüepsan.”

24Alei süme thatso noikütün phiai khaiunia ajantsoüh Yihuda tü ngiom, “Ale Tamarüh ajisiwop chhitsün saisile tsakli khekkü noiküla, küta lo apa pem tsükengkü noin.”

Yihudaüh ngiokhem kiukü ngiom, “Apa kengchiai tenshi küta in nai jekkü lüjahwan.”

25Apa tenlokü khu taoko, Tamarüh apa kaio dongai ngio tsak hongkü ngiom, “Ngo pem tsükengkü noitsün nung jengtsaiu nouso khaiunia sauüh nou noin, nung khaiunia nou tsangkü noin. Nung jengtsaiu nouso tü lüthaplu, küta nungso sauüh nou noin, nung niansat thaoluttsün ko auo nou hakü naiuso pailai nou kü noin.”

26Yihudaüh nungso ngeküta ngiom, “Nung nyiuhai ayam thakü nai noin. Ngo apa hau ti ayam kiuau noiküla nung tsükiukü phiowan, ngo jü thso Shela hau apa tsamsigoh yangiau noiküla.” Küta to Yihuda nung nyiuhai nouko tilaitso emkamkü tsünoishi.

27Tilai nung nyiuhai nou methso chettao atao saojikan, nungai apaüh thsoib chette ta ngelakü iula. 28Tilai apa tü methso chettao kiakü sungh, methso tsaküh pha nou tsatshi; apaotsangtsün nyiuhai nou nung thaloküta, ewoi aseng nou pha lemkü ke, küta ngiom, “Nung niochong chettsün” noiküla. 29Lüko nung methso nou apa pha lekkü lowanshi, küta apa niobao chongao thekü chet. Nungai apaotsangtsün nyiuhai nou ngiom, “Nungti thekü ni ayam losat lokü shin!” Nungtiphe apa nian Perez ta niankiu. 30Nungthanko apa nio pha nai ewoi aseng nou kekü chetshi küta apa nian Zera ta niankiu.

Currently Selected:

APUNG ANYIM 38: KHIABSI

Highlight

Copy