APUNG ANYIM 32

Yakob Esau ko Pheteau Khemloji

1Yakob apa yamai khu taoko, honghoi ajantso apa ko pheten. 2Tilai apaüh ngüso ep, apaüh ngiom, “Nung Goa Saothang noin” nungtiphe apaüh nung athang nou tü MAHANAIM ta jon.

3Yakobüh apa dei Esau dongai Edom goumchi ai apa khako ngio kantsünso hong. 4Apaüh ngüso hau ngio-iau ayam han: “Ngo, Yakob, angio angtsün atsamki, jü Apaou Esau, ngü Laban ko kihakü noiküla, nung shioko ngo lo saokü tsülaoshikü tsangankü noian. 5Ngo tsam thainian gado hoi, onnemok hoi, won hoi, naiuso tsamki hoi taim. Akhako atsüojinyang epe ta ayang noikü ngo nung ngio hongji Apaou.”

6Tilai ngio kantsünso Yakob dongai laokü shishin, ngüsoüh ngiom, “Sam adei Esau dongai khu, apabao niko pheteau thaiutha tsalo-iu. Apaüh apako khaiunia tsom püle hakü shiji.” 7Yakob hattakü yangelat. Khaiunia sauhai apako hakü noiküla, nungso apaüh hoi nime hau janthat, loüh nungko hakü onnemok hoi, won hoi, jangtso hoi, naiuso ut hoi ta noiküla. 8Apaüh yang, “Esau shikü chonghoi nou tü pha poh nai, hoi amao tsak nouto khuloau shio-e.”

9Nungaih Yakobüh Goa tü misaokü ngiom, “Jüpao Abraham, jüpo Isak Goa, ngü tü anglu! Apaou, ni ngütü jü goumchi ai jü tsammongso dongai laokü lükhu ta ngiom, naiuso jü thaiutha ni alum meikü shankiu-e ta ngiom. 10Ni hantsün atsüojin naiuso mongkiu- tsün apemtü ngo atsamki tsümaiteng. Ngo Yordan haiu yantsün taoko pailai tsak tü simkü ti tsütaiu, naiuso lo ngo nung hoi nime hakü laokü shikü noin. 11Jü dei Esau ainou ngo akipsan, ta ngo misao saoji. Apa shitsün nung sam methso menyiuhoi apem lomowanao naiuso sam komanao shiji ta ngo hatji. 12Jü thaiutha alum meikü khu-e ta ni thalotsün naiuso haiusai nai singtso tü piakü sauühtso aweao tsüshiokü thsaosithsoso piakü ngü hao kiu-e ta thaloutsün lüyangsan.”

13-15Sotsü nungai shamankü phiai, Yakobüh apaüh taiutsün ong ainou apa dei Esau hau paopei kiuau chosan: Won asang tsom nime, naiuso apong khei, anyaothiptsün ut aosam nouko athso sunkü, jangtso asang aopüle, naiuso jangtsopong che, gado asang khei, naiuso apong che ta, 16apaüh ahoi ahoi ta janpek küta apa tsamkiso hoi pungkü apaotsangao thoilut. Apaüh ngüso tü ngiom, “Jü khako lükhu, küta ahoi pungkü jetko ajet nou ataiu naiuso tsak nungphiai athe.” 17Apaüh ayateng tsamki tü ngiokhem kiukü ngiom, “Tilai jü dei Esau niko phetekü ‘Ni ün Apaou sau? ni tiai khuji? akhako thainian nouso sauüh nou? ta sange, 18ni nung thashiau noin: Nungso atsamki Yakob ün nou. Apaüh nungso apa Apaou Esau hau paopei kankü shiji. Yakob apa pem lüko sam phikolu noin.’” 19Apaüh tsamki nime nou ta lüko nung ngiokhemlu kiukü ngiom, loüh süme nou ta lüko nunglu ngiom, naiuso sauhai thainian jim ahoi ahoi nai noiküla, ngüso chikü tü ngiom. “Tilai asam apa ko phete-e nungti asamüh Esau tü ngioau noin. 20‘Ah’ atsamki Yakob sam phikolu noin,” ta asamüh ngioau noin. “Ngo apa paopei nou shiolo-e, naiuso tilai ngo apa phete-e, tsüngean apaüh ngü hau wankiu-e” ta Yakobüh yangkü noiküla. 21Apaüh paopei nouso apa khako hongtaiu küta nungsoh naito apa nejenkhio nai shaman.

Yakob Peniel nai Langeji

22Nungsoh nai asaila ainou chuküta apa tsammongnyiune naiuso ngüneko hoikü shitsün nyiuhai nime, naiuso apa thsoso chekü tsak nouso nialokü Jabbok haiu yankü khu. 23Apaüh ngüso haiu nou yankü hongankütün phiai loüh meshenüh thataiutsün chikü hongshian, 24lüko apa to tsükhu hakü pemsa noian.

Nungaih khaiunia tsak shikü ah-nge tao saokü apako lange. 25Tilai khaiunia nou alangetsün apaüh tsüshio ta epsan, apaüh Yakob tü chhang nai shiuh, naiuso nung oujei nou hangan. 26Khaiunia nou ngiom, “Ngo akhu-i, ah-nge awon nou shiji.”

Yakobüh thalakü ngiom, “Ni ngo mo ouk kiukün lektso, ngo ni tsükhu-i-e.”

27Khaiunia nou sangkü ngiom, “Ni sau ta nian?”

Apaüh thalakü ngiom, “Ngo Yakob.”

28Khaiunia nou ngiom, “Anian loto Yakob ta tsüjonshi-e. Ni Goa ko lange-iu, naiuso khaiuniako lange-iu, küta ni shiolom, nungtiphe anian Israel ta jone.”

29Yakobüh ngiom, “Lo ngü hau anian achite.”

Lüko apaüh thalakü ngiom, “Ni tiau jü nian ngeau aiuji?” Nungaih apaüh Yakob ouk kiu.

30Yakobüh ngiom, “Ngü Goa khasikha epiu, naiuso ngo loüh aa noin,” nungtiphe apaüh nung athang nou tü Peniel ta jon. 31Yakobüh Peniel wankü khu taoko aje nou peksan, naiuso apa chhang oujei hangan shioko apa soisoikü noiküla. 32Lonyi saokü Israel thsaosi- thsosoüh chhang nai nou nyi tsüheji, tiautenai nung chhang nyi nouko Yakob tü shiuhkü noiküla.

Currently Selected:

APUNG ANYIM 32: KHIABSI

Highlight

Copy