APUNG ANYIM 26

Isak Gerar nai Kihji

1Abraham taoko piamkü naiusile shitsün tsüdekü nungai loüh naiusile atao tsak noiküla. Isak Gerar nai Filistia hai nokpao Abimelek dongai khu. 2Apaou nou Isak dongai sung küta ngiom, “Ijip nai lakhu, ngo ni ta tiai anoi ta ngioji, nung goumchi nai anoi. 3Nungko akih, ngo ni ko noi-e naiuso ni ouk kiu-e. Ngo nung goumchi chikü ni naiuso athsaosithsoso hao kiu-e. Ngo Apo Abraham tü thaloukü taiutsün tsüwane. 4Ngo ni hau maou nai kianthsüo nouso tü piakü thsaosithsoso kiu-e, naiuso ngo nung goumchi chikü ngüso hau kiu-e. Ngo athsaosithsoso ouk kiutsünli mele apem nou ngü tü ngüso ouk kiuao sange. 5Ngo ni ouk kiu-e, tiautenai Abrahamüh jüngio ang naiuso jüngiokhem nouso naiuso athoiluttsünso chikü mongkü taiu.”

6Nungti Isak Gerar nai kih. 7Tilai nungai noitsün khaiuniahoi nou apa tsammongnyiu thaiutha sangh, apaüh nung menyiu nou apa nio ta ngio. Apa jütsammongnyiu ta apaüh tsüshanlo, tiautenai Rebeka loau thaiutha nungai noitsün khaiuniahoi nou apa loatte, tititenai apa athapao shisileng thatü meikü noiküla. 8Tilai Isak nungai atao intso thaiutha noi, nokpao Abimeleküh apa koukhantso ainou thapi naiuso Isak si Rebeka ne tsüojinekü emkamkü noikü ep. 9Abimeleküh Isak dongai hongkü ngiom, “Nungaito apa atsam- mongnyiu so! Ni tiau apa jünio ta ngiom?”

Apaüh thalakü ngiom, “Apa jü tsammongnyiu ta ngio naito ngo loatte, ta ngo yang.”

10Abimeleküh ngiom, “Ni sam tü ti chhikü noin?” “Jü khaiunia ongko tsak to thatü siukü atsammongnyiu ko saiha au noiküla, nung aphio thaiutha athsale noiküla.” 11Abimeleküh khaiunia chikü tü lotsüokü ngiom, “Ajantsoüh nung khaiunia tsüdekünai apa tsammong- nyiu tü mong lokiakü kankei naito aa tsütaiu-e.”

12Isaküh nung goumchi nai chihle khiamle nou lethio, naiuso nung pon apaüh meshenüh lethio taiutsün tü phopkü be-eiuyam yamhe, tiautenai Apaou nou apa ouk kiu. 13Apa tsopung naiuso memei khaiunia tsak iula. 14Apaüh onnemok hoi, tsam thainian naiuso tsamki piakü taiu nou apa tü Filistia hai mongkia. 15Nungtiphe Filistia haiüh Abraham noi taoko, apa tsamki nousoüh thaiukü shantaiu nou temkhao nouso apem phangan kiu.

16Naiuso Abimeleküh Isak tü ngiom, “Sam goumchi wankü lükhuwan. Sam ko naito ni tekkü mongkü iula-iu.” 17Nungtiphe Isak apa ataojam kihtsün Gerar tsamei nai khuküta apa tsam lalo. 18Naiuso Isaküh apa po Abraham taoko temkhao thaiutsün müjam thaiushi, tiautenai Abraham eankü phiai Filistia haiüh nungso lophangkiu, naiuso apaüh meshen poüh jontsün nian nou ngüso tü jon.

19Isak ün tsamki hoi nou tsamei nai temkhao tsak thaiu naiuso khiam ep. 20Gerar onnemok jimhoi Isak ün onnemok jim hoiko li-e küta ngiom, “Nung khiam sam khiam noin.” Nungtiphe Isaküh nung temkhao nian “Ali-e Temkhao” ta jon.

21Isak ün tsamki hoi nou amao temkhao thaiushi, naiuso loüh nungko lüko nung temkhao thaiutha ali-e sung, nungtiphe apaüh nung tü “Atsao-e Temkhao” ta jon. 22Apa nung ainou pungekü khuküta loüh temkhao tsak thaiushi. Nung temkhao thaiutha to ti angem tsüsung, nungtiphe apaüh nung tü “Angem tsüsun Temkhao” ta jon. Apaüh ngiom, “Lo to Apaou nou sam hao nung goumchi nai kih au khaiuniatsüo nou kiu-iu, naiuso sam tsüomeikü noishi-e.”

23Isak nung ainou Bersheba nai khu. 24Nungsoh nai Apaou nou apa dongai sungkü ngiom, “Ngo apo Abraham Goa noin. Ni lahat; Ngo niko noin. Ngo ni ouk kiu-e, naiuso ni hao thsaosithsoso piakü ouk kiu-e, tiautenai jü athalu-etsün ngü yathsüotsün Abraham tü noin.” 25Isaküh nungko amthang tsak shanküta Apaou nou ta amkham. Nungai apaüh meshen tsam lah, naiuso apa tsamki nousoüh temkhao amao thaiushi.

Isak si Abimelekne jetko Athalu-e

26Abimelek Gerar ainou Isak ko pheteao thaiutha apa süpaihoi ahei Phikol naiuso apa tü lotsüotsün Ahuzat hakü shin. 27Nungtiphe Isaküh sangkü ngiom, “Ni nung thaiuko ngü ko haimei tsüde, naiuso ngü hao agoumchi wankü soiani, lo ni ngü ko pheteao tiau shin?”

28Ngüsoüh thalakü ngiom, “Loto Apaou nou niko hakü noin ta ngeji, küta sam jetko ngiomong shinge tsak taiuao yangji. 29Samüh aiutsün nung noin: samüh ni tü tsaokü chhikü shitsünli to ni samtü tsüchhi shi-iau athalou tsak kiu-iau aiuji. Sam nitü atsüojinyang noiküla, küta ni aalo nai sam ainou khu-in. Loto Apaou nou ni ouk kiuji ta tsangsheikü noin.” 30Isaküh ngüso thaiutha sümai tsak khemsan, küta ngüsoüh he naiuso shiu. 31Nungthan nyap beta khaiunia pungkü nou meshen athalou tsak tsak shanküta ngiomong shinge nou nung kejeikü taiu. Isaküh ngüsotü meikü lüya ta ngiothun kiu, küta ngüso yamke paiuli punge.

32Nung ajekhaiu ko nai Isak ün tsamki nousoüh ngüsoüh temkhao thaiu taiu nou apa hau shiküta chite. Ngüsoüh ngiom, “Samüh khiam epiu.” 33Apaüh temkhao nou tü “Ngiomong shingetsün Temkhao” ta jon. Nungti thekü Bersheba noknio nian nianlou.

Esau ün Gohmao Tsammongnyiu nouso

34Tilai Esau achetpon 40 ngoi, apaüh Het hai menyiuthso nime tsamsigoh yang, ngüne Beri thso Judit naiuso Elon thso Basma noiküla. 35Ngüneüh Isak si Rebeka ne aakih nai ti tsümongling tengkü iula-i.

Currently Selected:

APUNG ANYIM 26: KHIABSI

Highlight

Copy